HOSEA 14 - AMÜSA BAIBEL (BSI)

Israelrü te Hosea-nü Kihchicho

¹ Nührü Abüdongba Tsingrang yang thalieng, Israelrü. Nührü münyinü nührü jing müthi khüluko.

² Abüdongba yang thalieng, ko akihchiba khi Abi te nührü amübü thsasohng: “Ihrü mülang apüm pehjüng ko ihrü kihchicho nyieng, ko ihrünü nyengchocho kyo ihrünü Nüh senung.

³ Assyriarünü khodesü ihrü mükhümchonung ko rothsa kuritinü ihrü mütsungtinung. Ihrünü khodesü kyothri te ihrü tsingrangbaepü müyonung. O Abüdongba, tuchah mütsikehrü te Nühnü chomang.”

Abüdongba -nü Israelrü te Akang Asi Nyengchocho.

⁴ Abüdongba-nü yore, “Ihnü I müyurü nüli ronung. Ihnü I lasih apümnü arüh müinung; arüh te adelü zii müchüro.

⁵ Israelrü te akung lih la Ih tsing kyo linung. Yungpi kyo arüh pinung; Lebanon sing kyo arüh ara ranung.

⁶ Arüh ara asinü akang linung, ko olive sing kyo atsah atsa linung. Arüh Lebanon la cedar kyo axümlichinung.

⁷ Thali arüh I tsungtiba pohki linung. Arüh tbü la chisicho kyo zinung ko shükusiluh kyo zehzangnung. Arüh Lebanon yongkha kyo adangchi thsanung.

⁸ Israelrünü adelü kyothri nengdang du münguchinung; Ihnü arüh dangkhidangnang lalingnung ko arüh xükümnung; Lede müyah liba singdong kyo, Ihnü arüh tsikehsohnung; Ih arüh amüwa dong.”

Yuzika

⁹ Sürü lümlong liro arühnü hi nyichehng ko sürünü münguchehro hi müdheing. Abüdongba lang tsü yuje ko Amüsarünü hütsü bichire, ta münyirü hütsüla müthikehre.