HOSEA 13 - AMÜSA BAIBEL (BSI)

Israel Michah Achangka Yukhaba

¹ Atsichola Efraim hungnü chode, aparü Israel hungnü drü licho; arühnü Efraim chah du dhingcho. Ta müyurünü Baal mübücho, hütsü ngang arüh sünung.

² Ade yingcheh arühnü mübünung kyothri idhsenü, taripinü nyitsarü lümchonü akhehnü trüpthri külüp amünyi shitpahre. Hütsüpü arühnü “Kangmübü jüng” pü yore. Misüpung kyothri chah nyitsarünü khüta müthsüpnung?

³ Hütsünü hiri nyitsarü anyangnyü yingdhsa ko yingkih kyo changpehnung. Pungkhyangla nyübongnü fopehba mayü ko mikhu tsisingla mikhu kyonung.

⁴ Abüdongba-nü yore, “Ih nührü Ijip lanü nüchehba Abüdongba Tsingrang lile. Nührü I chah khu apa Tsingrang mühle. Nührü khümchorü tsü Ih du.

⁵ Ihnü lihpi akungase la nührü xükümcho.

⁶ Ta khode nührü alih asu la zürocho, nührü thangchi ko longnyüpcho, hütsüpü nührünü Ih nbüchü müthseh kangcho.

⁷ Hütsüeko Ihnü kangdinü kyo nührü benung. Khünyingnü kyo nü langla jümnung.

⁸ Aza chahcho shühmünü kyo Ihnü nührü benung, ko nührü rehnahnung. Kangdinü kyo Ihnü hütsülanü nührü changsohnung, ko rangmü kanglungrünü kyo zangzang rehnahnung.

⁹ “Ihnü nührü changjünung, Israelrü! Hütsüde sünü nührü tronung?

¹⁰ Nührünü yangthsarü ko anüchirü chingcho, ta arühnü khüta yanglih tsü khümchonung?

¹¹ I zichüro nührü khyang yangthsarü jücho, ko rihlongchüro arüh khyümüicho.

¹² “Israelrü münyi ko thsamehcho tsü thrahbülung lile, ko athrahcho tsü tsa riki lile.

¹³ Israel akang linung lang lile, ta akhunga suronungde atpa mi lanü müchüronyücho kyo, hütsü khyünung mongdongle.

¹⁴ Ihnü hiri nyitsarü asülih lanü mahkhang asü zii lanü mükhümchonung. Asüba, nüh arümra hirung! Asülih! Nüh achangba hirung. Adelü Ihnü hiri nyitsarü mümüinung.

¹⁵ Israelrü za kyo zinye, Ihnü lipilih lanü nyüchürolang nyübong adhsa müthehnung, ko kihna ko kihkong kungchehsohnung. Hütsünü lüpcho hitsinung.

¹⁶ Ih nyümcho ngang Samaria khingchinung. Amüyurüti rothsa la sünung; arüh tsurüti alih la lahsehnung, ko longla hirüti xaphohjünung.”