HOSEA 1 - AMÜSA BAIBEL (BSI)

¹ Juda la yangthsarü Uzia, Jotham, Ahaz ko Hezekia ko Israel la Jehoash tsurü Jeroboam yangthsaba chichah, Beeri tsurü Hosea khyang Abüdongba-nü jüba yusi tsü hi licho.

Hosea Nitpü ko Atsurüti

² Khode Abüdongba-nü akhudiba Israelrü te Hosea khu chotacho, Abinü Hosea te yocho, “Wüng ko nahtrahnaxenglarü khüdu khyüng ko abükyü kyokyo tsuzarü nümüsung, tunüo nyitsarünü Abüdongba pehjü nahtrahnaxeng amülah shitpahko.”

³ Achotsü Hosea-nü Diblaim tsulatpü anengnü Gomer te kukangcho. Arüh tsurü akhudiba adhrerü khüdu suro,

⁴ ko Abüdongba-nü Hosea te yocho, “Aneng ‘Jezrel’ dsijüng, tunüo tunyah mülipü ajümürü Jehu-nü Jezrel la müpsehcho ngang Ihnü Israel yangthsaba khingchinung. Ihnü Jehu yangthsathsaba nah changkasohnung.

⁵ Ko Jezrel ngah la Ihnü hütsüde Israel rothsaba tase changjünung.”

⁶ Gomer-nü azarü anyüu, khingkurü khüdu nümüsucho. Abüdongba-nü Hosea te yocho, “aneng ‘Lo—Ruhamah’ (Mümüila) dsijüng, tunüo Ihnü adelü Israelrü mümüinung ko mülang müpehjünung.”

⁷ Ta Judarü telü Ihnü amüi ngusohnung. Ih, Abüdongba, arüh Tsingrang-nü arüh khümchonung, ta Ihnü hütsü khata, nohsheng mahkhang singthsalu ko tbüdeng mahkhang kuri ko hütsüchah pümrüti khu münguchinung.”

⁸ Atsulatpünü nyikih pehjüko khanglang, Gomer fü müdeng kangcho ko adhrerü khüdu nümüsucho.

⁹ Abüdongba-nü Hosea te yocho, “aneng Lo—Ammi (I nyitsarü mah) dsijüng, tunüo Israelrü I nyitsarü mah ko Ih arüh Tsingrang mah.”

Israel Külüpchinung.

¹⁰ Israelrü kihdi lihpi kyo mükhilong kangnung. Ade Tsingrangba-nü arüh te yore, “Nührü I nyitsarü mah” ta abinü arüh, “Nührü akang liba Tsingrang tsurütie” pü yonung thsale.

¹¹ Judarü ko Israelrü thali kehtanung. Arühnü langnürü khüdu du throchehnung ko thali arüh lih la zehzang linung. Ho, Jezrel nyümong tsü dee arangcheh linung.