HAGGAI 2 - AMÜSA BAIBEL (BSI)

Amübükuh Ahechikeh Asi

¹ Hütsüba kang choo dhünyeh, nyümong mükyüpü kheh-ula, Abüdongba-nü thali azikehrü Haggai khu chotacho.

² Abinü Haggai te, Juda la governor Zerubabel ko Amungthriba Bebüba Joshua ko müyurü te hita yosohnung Haggai te yocho,

³ “Amübükuh hi khüta ahechikeh lichonang hütsü nührü yola khürünü mülümkeh-o? Ade khüta nguro? Hi tu mükyo ngure.

⁴ Ta ade nührü süsü suh tüzah, nguching tunüo Ih nührü te zeh lile.

⁵ Nührü Ijip lih lanü chürode, nührü te Ih lede zeh linungepü Ihnü nyengchoko. Adesü Ih nührü te zeh lile, hütsüeko tüdrü.

⁶ “Tunyah mülipü Ihnü ning ko limih, alih ko kihdi shühchijünung.

⁷ Ihnü yuchoti apüm mükhanung, ko arüh kuthsi hila hironung, ko Amübükuh tsü kuthsinü jengnung.

⁸ Limih la hon taripi apüm Iyo.

⁹ Amübükuh asi tsü ahiba tenü ahechiu thsanung, ko Ihnü hütsüla I müyurüti khyang rii ko yangtsa jünung” Abüdongba Akohbongnü choko.

Azikehbongnü Bebürü te Kiidhingre

¹⁰ Darius yangthsathsaba kang anyüu choo düku nyümong mükyüpü müyüula, Akohba Abüdongba-nü Haggai te thali chotacho.

¹¹ Abinü yocho, “Bebürüti te hiba atsingdhingba hi lalingsohng:

¹² Adüzünü nyüh khüdunü amüsachehcho shuh azikyah apoh la münyüp-pü hütsünü hümdhse, tsang yongkha, olive tuji, mahkhang tsuyongba masü chah ashünü thahpüsohkhang, hütsü müsa kangnung mah-o?” Khode hütsü tsingdhingcho, bebürütinü lalingcho, “Mah.”

¹³ Hütsünü Haggai-nü lalingcho, “Adüzünü nyüh khüdu me chah thahpüchonü münyiko. Hütsüpü abinü hiri tsuyongba chah thahpükhang, hütsürisü münyipehnung mah-o?” Bebürütinü lalingcho, “Ho.”

¹⁴ Achotsü Haggai-nü yocho. “Hütsü roh-i du hiba yucho nyitsarü te ko arüh khehlanü chürocho lüpcho linungepü Abüdongba-nü yore; hütsünü arühnü bholu chah mübücho kohro apüm münyicho lile.”

Abüdongba -nü Abi Amüwanung Nyengchore

¹⁵ Abüdongba-nü yore, “Nührü chah tu tikehchonang müngurü do? Amübükuh thsalinung müdikehde,

¹⁶ nührünü yashi la dsedong mükyü longdi wücho, ta dhüre du licho; nyüh khüdunü yongkha di la thohmo dhünyang longdi wücho, ta mükyü du licho.

¹⁷ Nührü chisicho lüpcho thsangnyangjünung Ihnü nyübong adhsa ko shurü müthehcho, ta hütsüpü mii nührünü lasih müthsamüla.

¹⁸ Chünye hi choo adüku-ula mükyüpü müyü nyümong, Amübükuh akhengdi thümre. Ade tinü tu tikehnang dhingdhing.

¹⁹ Hila fürü mülinye, ko shükusih, ngurüsih tsanümsih ko olive singsih mah-enye, ta ade tinü Ihnü nührü müwajünung.”

Abüdongba -nü Zerubabel te Anyengchoba

²⁰ Hütsü nyümong choo mükyüpü müyü nyümong tsü,

²¹ Abüdongba-nü Juda governor Zerubabel nengdang anyüuba yusi jücho: “Ihnü ning ko alih shühchinung ko yanglihti khülusoh thsangnyangjünung thsako.

²² Ihnü nyübong akhüluba ko arüh anürü mükhamülajünung; kuriti sünung ko anürüti khüdunü khüdu kyüsehtanung.

²³ Hütsü nyümong nüh I dikehrü Zerubabel; Ihnü khyünung ko I nengla yangthsanung throchehba tsü nüh lile.” Akohba Abüdongba-nü choko.