HABAKUK 3 - AMÜSA BAIBEL (BSI)

Habakuk Dangkhidangnang

¹ Hi azikehrü Habakuk dangkhidangnang:

² O Abüdongba, Nü nguchi Ihnü yuchiko, ko Ih adrünü jengko. Nühnü nguchiba nguchi amülah tsü ade ihrü bekhyahla nguching. Nü zichüronye ihrü te yanglilüm.

³ Edom lanü Tsingrangba thali tsehle; Paran khang lanü Amüsa Tsingrang tsehle. Abi ahechinü ning phajengko; ko Abi nengsenü alimih jengko.

⁴ Abi ningmüla atsingsela rore; Abi khehlanü mülakehjüre, Abi zii hütsüla rangpüle.

⁵ Abi bekhu adhsa ara müthehre ko asüba Abi khanglang iinung yuzeng jüre.

⁶ Abi zahde alimih shühchire; Abinü dhingde yuchoti dhridhrire. Müchangkaba azongti shühnahre; müchangkaba akhangti khüde papade abi rachicho hütsü shohyoh tsire.

⁷ Kushan-rü drücho ko Midian-rü dhridhricho Ihnü nguko.

⁸ Abüdongba, yongkhi tsünü Nü zii chürosohcho mah-o? Kihdi tsünü Nü rihlong chürosohcho mah-o? Nüh nyükhi michah rachicho; Nü nyitsarü khyang akohba hirojüde, nyükhi tsingxinyübong tsü Nü akhüluba thsacho.

⁹ Nü singthsalu bichinung ko Nü tbüdeng kyanung Nühnü rungnümcho. Nü tsingchinü alimih chirüpcho.

¹⁰ Azongtinü Nüh ngude arüh dhridhricho; ning chahnü kih tungchahchücho. Alih yonglang kihnü khongcho, ko arüh kiloh thseng chürocho.

¹¹ Nü tbüdeng mülachi müthehde ko Nü thsuh ariri mülade, nyü ko chonu mümühachicho.

¹² Nüh zichüro alimih bong tsicho; Nü rihlongla yuchoti dhrümnahcho.

¹³ Nü müyurü khümchonung ko Nühnü throchehcho yangthsaba khümchonung Nüh wücho. Amütsarü langnüba Nühnü khülusohcho ko amono riri changjücho.

¹⁴ Aranglangnü ailümrü nyüpmüsehrü künyangcho kyo, ihrü füpifüzanung tsingxinyübong rode kyo, Nü tbüdengnü rothsarü langnüba khakhu kyacho.

¹⁵ Nü kurinü kihdi dhrümnahcho ko kih amülah tsü müjümüphi kangsohcho.

¹⁶ Ihnü hiri apüm yuchire ko dhridhrire; adrüchonü I beküp zingchire. Ifü tohkeh tsire ko I mükhong lahkehtare. Tsingrangba-nü ihrü dhsümthserü khingchinung bekhyah mürode, Ihnü yuva müchüro yingnung.

¹⁷ Ngurüsih dongchah asih müsihnye, ko shükusih chah asih müsihnye, olive singsih asih müsihnye, ko luh la pung müronye, san apüm sünye, ko misü kuh adeng kangnye,

¹⁸ Ihnü mütozah longphi künyangnung, tunüo Abüdongba Tsingrang tsü I Kangchehjüba.

¹⁹ Akohbong Abüdongba-nü I khyang re jüre. Abinü shümüshü kyo I jing zisohre ko azongchah Ih khümcho yohpüre.