GALATIARÜ 6 - AMÜSA BAIBEL (BSI)

Khüdunü Khüdu Bhamüling Phungchojütaang

¹ Jünirüti, khürünü amülanglang nguchicho rangchehkhang, nührü anbü libatinü athsalangnü müchungchijüng. Ko nührübürüsü müthsadsünungthsa müzahmükieng.

² Khüdunü khüdu bhamüling hijütacho khu Khrista yuzeng tsü tikehsohng.

³ Nyüh khüdunü tulamüyohko khüli amülah müjang lümkhang, apu jangjang khürahyohchüre.

⁴ Ta nyitsarü müipinü abürü saying thsadsüdhing. Tsakhang, aparü khürü nguchicho te mükitapü, abürünü tu nguchichehcho, hütsü nengdang seing.

⁵ Tunüo nyitsarü müipi palu bhamüling hibae.

⁶ Nyitsarü süte khristan yusi do liro, abinü abi licho atsa tsü abi adorü te changtabae.

⁷ Nührü jangjang tükhürahyohchü; sünüsü Tsingrangba tümükhimüngu. Sünü tu shunang hütsü du xanung.

⁸ Abinü shutsa mükhyahmüru shukhang, hütsü lanü abinü asüba xanung; abinü Anbü shukhang, Anbü la tsünü abinü müchangkaba akang xanung.

⁹ Hütsüeko Ihsanü atsa nguchinung mümüthohnung; tunüo Ihsanü suh müzahpü atsa nguchikhang, Ihsanü xanung akyang ronung.

¹⁰ Hütsüeko, detingcho atümungla nyitsarü müipi te, alathsa Ihsa te müjang yudsirü te atsa nguching.

Achangka Amüzahnung ko Salüm yu

¹¹ Thrahtse adidinü nührü te Ipu khehnü thrahba hi dhing!

¹² Nyitsarü sürünü nührü müjüp-pehsohnyüro, arüh tsü shutsa la müthsehmülarüti lile. Arühnü hütsü Khrista khala shulüm müdhsümthsesohnung jingjing du nguchire.

¹³ Amüjüp-pehrünü mii yuzeng tsü mübichire; ta nührü shutsa la arüh müthsehmülanung nengdang nührü müjüp-pehsohnyüre.

¹⁴ Ta Ihlü, khüta khütanye Ihsa Abüdongba Jisu Khrista khala nengdang du müthsehnung; tunüo abi khala khu I chah limih tsü süko, ko limih te Ih süko.

¹⁵ Tunüo asi kangcho chah khu, müjüp-pehcho ko mümüjüp-pehcho tu papa mühle.

¹⁶ Khütoinü hiba yuzeng bichiro, arüh te ko Tsingrangba tsurü atümung te atbachi ko yanglilüm thsaang!

¹⁷ Hikholü, sünüsü I khyang adhsangthsi alaa tüjü, tunüo Ifü la kehba arah tsünü Ih Jisu yurüepü ngusohre.

¹⁸ Ihsa Abüdongba Jisu Khrista achomang nührü atümung te lieng, jünirüti, Amen.