GALATIARÜ 5 - AMÜSA BAIBEL (BSI)

Nyüje tsü Rikieng

¹ Nyüjeba nengdang Khrista-nü Ihsa nyüje kangsohcho! Hütsüeko nyüje nyitsarü roh-i drengdreng lieng, ko anyüpiu nührü jangjang ayurü tükang.

² Nyieng! Ih Paul-nü nührü te yore. Nührünü müjüp-pehkhang Khrista tsü nührü nengdang tu müdhsütah kangre.

³ Ihnü adesü nyitsarü atümung te müzahsohre, sünü müjüp-pehnang abinü yuzeng apüm bichinung kangre.

⁴ Nührü sürünü yuzeng bichichonü Tsingrangba te langsohnung müküpro, nührü jangjangthsa Khrista tenü zapeko. Nührü Tsingrangba achomang lanü za lile.

⁵ Tunüo yudsinü Anbü khu Ihsanü amüsaba alongdi nengdang yingre.

⁶ Tunüo Khrista Jisu la amüjüp-pehrü mahkhang amümüjüp-pehrü tu papa mühle, ta amüi khu yudsinü nguchire.

⁷ Nührü hütsütoi tsa nguchi yacho! Yuje te yochonyinung lanü sünü nührü yaticho? Abinü nührü khüta kihchocho?

⁸ Hütsü nührü dsiba Tsingrangba-nü nguchichoba mah.

⁹ “Phüprah shünü langsohnung bhüpza azikyah du khyüre.”

¹⁰ Ta Ihnü adesü nührü chah longlangre. Nührünü apa tusü mükhyüchonung Ihnü Abüdongba la longlangre; ko süsü thsanye nührü longmüzibalü Tsingrangba-nü khingchinung.

¹¹ Ta jünirüti, I nengdanglü müjüp-pehnung tsü adhsütah-epü Ihnü ade yingcheh thsingyukhang, tuepü Ih ade yingcheh dhsümthsero? Hütsü yuje thsarelang, Khrista khala nengdang Ihnü thsingyuchonü tu adhsangthsi müchüronung.

¹² Sürünü nührü longmüziro, arühbürü jangjangthsa xangmisohnyüre!

¹³ Jünirüti, nührülü nyüjeba nengdang dsicho. Hütsünü hiba nyüje tsü nührü shutsa müruba nengdang tübichi, ta amüinü khüdunü khüdu dikehtang.

¹⁴ Tunüo Yuzeng apüm tsü Mosa Yuzeng khüdula tikehre: “Nü kurümrü nüpu roh-i müing.”

¹⁵ Ta nührünü kanglungrü kyo lerohpehjüta ko dhsakehjütakhang, müzahng mahkhang nührü riri changpehnung.

Anbü ko Shutsa

¹⁶ Ta Ihnü yore: Nührü akang Anbünü langnüsohng, ko nührünü shutsa mükhyahba mümürunung.

¹⁷ Tunüo tu shutsanü müruro hütsü Anbünü müruba nyümre, ko tu Anbünü müruro, hütsü shutsanü mürucho nyüm lile. Hinyi hi arorüh lile, hütsünü nührünü tu nguchinyüro hütsü münguchichehre.

¹⁸ Anbünü nührü nükhang, nührü yuzeng pohki mühle.

¹⁹ Tu shutsa nguchi hütsü müdhejungle. Hiri tsü nahtrahnaxeng, amümüsa ko mabomashi;

²⁰ kyothri mübüba, mongcho, dhsatacho, yübütacho, nahmoh, zichürocho ko müruthsa, yubejarong, achangnah;

²¹ mükohdhing, müchacho, kuh zühcho, ko hitari apasü nguchire. Sürünü hitari nguchinang arühnü Tsingrangba Yanglih müngunungepü Ihnü akhudi yocho müjang, hütsü roh-i adesü müzahsohre.

²² Ta Anbü sih tsü amüi, akünyang, yangtsa, arangcho, kangli atsa, atsaba, longlangchehba,

²³ alonglüm, ko abürü jangjang rahsehba. Hiri chah khu apa yuzeng tu mühle.

²⁴ Ko sürü Khrista yo, arühnü arüh shutsa mükhyahmürah apüm süsohko.

²⁵ Ihsa Anbü la likhang, Ihsanü Anbü la tsehnung.

²⁶ Ihsanü mümüthsehnung mahkhang mükhimünguta müthsanung, mahkhang khüdunü khüdu te nahmohta mülinung.