GALATIARÜ 4 - AMÜSA BAIBEL (BSI)

¹ Ta Ihnü yonung, atsudhre, sü Au thsiking khyünung liro atümung abi yo thsanye, azarü thsadelü abi ayurü khüdu roh-i due.

² Aunü zengjücho becho müchide, ko abi azarü thsadelü nyitsarü khürünü apu ko anguchi dhingyehjüre.

³ Hütsü kyo, Ihsasü anbü mülümjingde hiba athrijungcho anbü yangthsaba pohki ayurü kang licho.

⁴ Ta khode bekhyah adekheng tsü rocho; Tsingrangba-nü apu Tsurü müthehcho. Abi limih la atpa khüdu khu rocho,

⁵ ko yuzeng pohki lirüti lihchehnung, ko Ihsa Tsingrangba tsurüti kangnung shulüm abi Jihudarü yuzeng pohki licho.

⁶ Nührü abi tsurü thsachonü, Tsingrangba-nü apu tsurü anbü Ihsa lasiking la zürosohcho, ko hiba anbünü, “Uwa, Uwa” pü züdere.

⁷ Hütsünü, adelü nührü ayurü mah, ta atsurü khüdu lile. Ko nührü abi tsurü thsachonü Tsingrangba atsurü nengdang yohpücho thsiking apüm nührü khyang jünung.

Galatiarü Nengdang Paul Alümxüba

⁸ Papade nührü Tsingrangba mümüdhepü licho, ko hütsüde nührü sürü tsingrang mahro arüh yurü kang licho.

⁹ Ta adelü Tsingrangba nührünü müdhele, mahkhang Ihnü yonungnü, adelü Tsingrangba-nü nührü müdhele, hütsükhang khüta nührünü sumüzehba ko amüinung anbü yangthsathsaba yang thalinung? Nührünü thali arüh yurü kangnyürü do?

¹⁰ Nührünü nyümong, choo, tsingkang müyü mahkhang kang khürü pathsa khyücho mungre.

¹¹ Nührü nengdang Ihnü tu nguchicho hütsü amükangla nguchicho mah-opü, Ihnü nührü nengdang lümxüjüre!

¹² Jünirüti, Ih kyo kangnung Ihnü nührü te kihchire. Tunüo Ihsü nührü kyo lile. Nührünü Ite tu amütsa münguchi.

¹³ Ih füdhsachonü nührü te akhu Yuse tsü thsingyuchoepü nührünü müdheing.

¹⁴ Ta Ih shutsa suro tsü nührü nengdang athsadsü arangcheh khüdu thsanye, nührünü Ih mümüthsamünyü mahkhang müthrüchahchüpeh.Ta ninglang riwürü roh-i; ko Jisu Khrista roh-i nührünü Ih khyüchocho.

¹⁵ Nührü akünyangsü khütacho? Tunüo kohrelanglü, nührünü abürü nahtse mii hehcheh I khyang jünungthsa lichoepü Ihnü yochehle.

¹⁶ Ihnü nührü te yuje yochonü adelü Ih nührü rorüh kangcho mah-o?

¹⁷ Aparü nyitsarü tsünü nührü chah dee mürüp ngusohre, ta arüh nahdhingkeh tsü atsa mah. Arühnü nührü mürüpcho kyo, nührünü arüh mürüpsohnung nengdang lile, ko arüh akhyünyüba apüm tsü nührü I chahnü zasohnyüre.

¹⁸ Ko Ih nührü te lide du mah, ta lede alümcho atsanü soh mürüpkhang tsale.

¹⁹ I tsurüti, nührü chah Khrista saying müthride, azarü surode atpa khüdu mikhungcho kyo, nührü nengdang hütsü kyo Ih dhsare.

²⁰ Nührü te lang pa khüdunü nguchidhingnungthsa, Ih nührü yola linyüre, tunüo nührü nengdang Ih dee lümtpanare!

Hagar ko Sara nyüh Adüzü

²¹ Yuzeng pohki linyürü nührü te Ihnü tsingdhingnung: Yuzengnü tu yocho müyuchirü mah-o?

²² Hütsünü hita yore: Abraham tsurü anyüh licho, ayulatpü chahnü khüdu, ko nyüjelatpü chahnü khüdu.

²³ Ayulatpünü suroba tsü shutsa roh-i surocho, ta nyüjelatpünü suroba tsülü Tsingrangba-nü nyengchocho khu surocho.

²⁴ Hiri adüzü roh-i nyichehnung kohle: Khingkurü anyüh adüzü tsü azengchotacho anyüh nengdang lile. Ayurüthsa azarü nümüsuba Hagar adüzü Sinai zong chah azengchotacho.

²⁵ Hagar, sü Arabia la Sinai zong mülih yaro, hütsü ade abükyü nyitsarü ayurü surola liba Jerusalem yangdi nengdang yore.

²⁶ Ta ninglang liba Jerusalem tsü nyüje lile, ko abükyü tsü Ihsa atpa.

²⁷ Tunüo amüsa yunü yore: “Nüh azarü mülilatpü, künyang lieng! Nüh mi mükhungdhinglatpü, akünyangnü thseng züdeing! Tunüo niirü lirü tenü niirü mülirünü azarü alaa nümüsunung.”

²⁸ Ade, jünirüti, Isak roh-isü nührü Tsingrangba anyengchocho tsurüti lile.

²⁹ Hütsü shikhela shutsa roh-i nümüsuba tsurü tsünü Tsingrangba anbü khunü suroba tsü dhsümthsecho; ko ade hütsü kyo lile.

³⁰ Ta amüsa yu tsünü tu yoro? “Ayulatpü ko akhunga tsü tsisohng; tunüo ayulatpü tsurünü nyüjelatpü tsurü yola Au thsiking mükhyünung.”

³¹ Hütsünü, jünirüti, Ihsa ayulatpü tsurüti mah, ta nyüje latpü tsurüti lile.