GALATIARÜ 2 - AMÜSA BAIBEL (BSI)

Paul ko Aparü Riwürüti

¹ Kang dhüremüyü khanglang Ite Titas nüpü Barnabas yola Jerusalem lang thali wücho.

² Ih wünungbaepü Tsingrangba-nü Ite mishachonü Ih wücho. Ko langnürüti te pathsa shirütade yangpirüti te Ihnü thsingyuba yuse atsa tsü arüh te müdhesohcho. Atsicho la ko ade Ihnü I nguchi la amükoh müjürosohnyücho.

³ Ite liba Titas, abi Greek-rü thsanye ko khürünü khingnye abi mümüjüp-pehsohcho.

⁴ Khrista khu akehtala, Ihsa nyüje nguba chehdhingnung, müjang yudsirüti kangpü Ihsa yola züro lile. Arühnü Ihsa ayurü kangsohnyücho,

⁵ ta Yuse yuje tsü nührü nengdang khümcho yohpünyücho khu, ihrünü azachahsü arüh pohki müzüdu.

⁶ Ta sürü langnürüti liro, arüh tu khüroh-i licho I nengdang tu papa müthsachonü Ihnü hi yore; Tsingrangba-nü tsahdhing yu mükhare, hütsüri langnürütinü I khyang alümcho asi tusü müjü.

⁷ Lahshümüjü, Jihudarü te yuse thsingyunung Peter khyang nyümkehjücho roh-i, yangpirü te yuse thsingyunung I khyang Tsingrangba-nü nyümkehjücho arühnü nguko.

⁸ Tunüo Tsingrangba zinü Jihudarü nengdang Peter riwürü kangsohcho kyo, yangpirü nengdang Ih riwürü kangsohcho.

⁹ Jakob, Peter ko Johan sürü anüchirü licho, arühnü I khyang Tsingrangba-nü hiba pathsa nguchi jücho tsü müdhecho, hütsünü ihrü atümung müjang dikehrü amüdhethsa arühnü Barnabas ihjü te salüm thsacho. Barnabas Ihjü yangpirü yola, ko arüh Jihudarü yola nguchinung yutrümcho.

¹⁰ Arühnü khyünyüba tsü Ihnü nguchinyü yoba arüh mülung la achongcharü trosohnyücho.

Antiok la Paul-nü Peter Yübücho

¹¹ Ta khode Peter Antiok lang rocho, abinü thsamehchonü Ihnü misha abi nyümcho.

¹² Tunüo Jakob-nü müthehcho nyitsarü khürü hütsü ro müchiede, Peter-nü yangpirü jünirüti yola tsuyong licho. Ta hiri nyitsarüti ropü khanglanglü, amüjüp-pehrüti drünü, abinü shehli arüh te mütsuyongcho.

¹³ Hütsü roh-i aparü Jihudarü jünirüti nüsü Peter kyo müci süm kangpehcho; ko hütsüla Barnabas-nü arüh müci sümcho ngu iitsicho.

¹⁴ Khode arühnü yuse atsa yuje la tsü müchong mütsehcho Ihnü ngucho, Ihnü arüh atümung betenü Peter te yocho, “Nüh Jihudarü khüdu, ta Jihudarü khüdu mükyopü, yangpirü kyo lire. Khang, nühnü khüta yangpirüti Jihudarü kyo lisohnung khingro?”

Jihudarü ko Yangpirü Yudsinü Khümchore

¹⁵ Ajüje, ihrü Jihudarü khung, “Amünyirü yangpirü mah.”

¹⁶ Yuzeng bichichonü mah, ta Jisu Khrista chah yudsi khu dunü Tsingrangba jingte langsohrepü ihrünü müdhele. Ko ihrünüsü, Yuzeng bichichonü mah, ta Jisu Khrista chah yudsicho khu Tsingrangba te langsohnung nengdang Jisu Khrista chah yudsicho. Tunüo Yuzeng bichichonü süsü Tsingrangba jingte langsohnung mükoh.

¹⁷ Hütsütakhang, Ihsa Khrista khu Tsingrangba jingte langsohnung müküpde yangpirü roh-i du Ihsasü münyirüti kangkhang, Khrista tsü amünyi chürosohji mah-o? Khodesü mah!

¹⁸ Ihnü rehnah pehba yuzeng khüdu külüpchinung dikehkhang, hütsü I jangjang yuzeng thsangnyangrü khüdu kangsohre.

¹⁹ Tsingrangba nengdang akang linung khyanglangnü, Ih yuzeng chah süko.

²⁰ Ih Khrista te khala chah hamkehko. Hütsünü adelü akang liba tsü Ih mah, ta I chah Khrista akang lire. Ade Ih liba akang hilü, Tsingrangba Tsurü sünü Ih müicho, ko I nengdang akang jücho abi chah yudsi khu lire.

²¹ Ihnü Tsingrangba achomang tsü adeng mükangsohre. Ta yuzeng khu nyüh khüdu Tsingrangba jingte langsohkhang, Khrista süba tsü adeng.