FILIPIRÜ 4 - AMÜSA BAIBEL (BSI)

Athülaba

¹ Hütsüeko, Ihnü müiba ko nahmürahba, I akünyang ko I nengse jünirüti, hiroh-i Abüdongba la drengdreng yang.

² Eudia ko Synteke, Abüdongba nengla yanglilüm nühjü jünilarü roh-i kehtanung Ihnü kihchire.

³ Longlangchehba müjang dikehrü, nühnü hiri khingkurüti tronung Ihnü nütesü kihchire; tunüo arühnü Ite, ko Klement ko Ite müjang nguchirüti, sürü neng akang vakhala thrah liro arüh te yuse atsa sobhonung la dee müküp nguchi roko.

⁴ Lede Abüdongba la künyang; anyüpiusü Ihnü yore: Künyang!

⁵ Atümung te arangcho ngusohng. Abüdongba zah rore.

⁶ Tu nengdangsü lümxü tüli, ta lede akünyang lasihnü nührü dangkhidangnang müipi nührü dhsütah Tsingrangba te young.

⁷ Ko Tsingrangba atbachi, khüinü amüi tsurü anyichehba lümlong apüm khakhuro, hütsünü nührü lasih ko lümlong Jisu Khrista la nyahnü lieng.

⁸ Achangkathsa ajünirüti, tuturü yuje liro, tuturü jengreng drünung athsalang, tuturü athsalang liro, tuturü amüsa liro, tuturü amüinung liro, tuturü achomangnung liro, lango atsa likhang, lango nengsenung dekhing likhang, hiri nengdang lümdhing.

⁹ Nührünü I chahnü tu nyichocho, khyüchocho, yuchicho, ko ngucho, hütsüri tsü nguching; ko atbachi Tsingrang tsü nührü te linung.

Jiyü Nengdang Nengse

¹⁰ Hitoi nyahlipü khanglang nührünü Ih lümchehcho nengdang Ihnü Abüdongba la dee künyangre. Nührünü Ih mülümchehchoba mah, ta Ih tronung bekhyah atsa münguchehcho due.

¹¹ Ih müdsimükuchonü nyingkongrü mah, tunüo Ih tu surola linang hütsünü longsünung Ihnü nyicho lile.

¹² Ihnü khüta müdsimüku linung, ko bholo linung hütsü müdhele. I mi jeng linye, mahkhang yangseh linye, bholo linye, ko müdsimüku linye, suro apüm la Ih longsü linung arang lümlong tsü Ihnü nyichoko.

¹³ Ih rezehsohba Jisu Khrista la Ihnü apüm nguchinung kohle.

¹⁴ Ta Ih chongcha la nührünü trocho nengdang dee künyangre.

¹⁵ Ko adikehlang, khode Ih Macedonia pehjüpü Yuse Atsa thsingyu wücho, I akünyang ko chongcha la troba Lithro tsü nührü du thsachoepü nührü Filipirünü longi müdhele.

¹⁶ Ih Tesalonika la lidesü nührünü I khyang arüku adrongpi müthehko.

¹⁷ Ih jiyü yangchirü mah; ta nührü neng zikehcho ngunyüre.

¹⁸ Epafroditas-nü I khyang hirojüba nührü jiyü tsünü adelü I dhsütah apüm kükyüko. Arüh Tsingrangba khyang mübüba axümlichi akang mübü khüiba akhyüchochehba ko abi künyangsohba liro hütsü kyole.

¹⁹ Ko apu bholo liba kuthsi Jisu Khrista khu, I Tsingrang-nü nührü dhsütah apüm chixinung.

²⁰ Ihsa Au Tsingrang khyang müchangkaba ahechi thsaang! Amen.

Aza Yu

²¹ Jisu Khrista la amüsarü atümung te Salüm young. Ite liba ajünirütinü nührü te salüm müdhesohre.

²² Amüsarüti apümnü alathsa yangthsaba kuh la lirütinü salüm müdhesohre.

²³ Abüdongba Jisu Khrista achomang nührü atümung te lieng.