FILIPIRÜ 3 - AMÜSA BAIBEL (BSI)

Yuje Amüsaba

¹ Achangkathsa ajünirüti, Abüdongba la künyang. Ihnü akhulang thrahcho yu loli thrahnung Ihnü müsusüre, ko hütsünü nührü nengdangsü alaa amüzahnung thsanung.

² Amünyi nguchirü, füzati ko shutsa tsehnahrüti nengdang müzahng.

³ Yuje amüjüp-pehrü tsü arüh mah, ta Ihsa-e, tunüo Ihsanü anbü la Tsingrangba mübüre, ko Khrista Jisu la künyangre. Ihsanü amichah mamohmayang tulasü müyudsire.

⁴ Hütsüri la yudsinung tsü Ihnüsü kohle. Khürünü amichah mamohmayang la tsü yudsinung kohlepü lümkhang, Ihnü alaa hütsüta lümnungbae.

⁵ Ih nyümong keh azirü thsade müjüp-pehcho. Ih Israel tsutpu Benjamin hung lanü, amüdhseng Ibri shüh lanü surocho. Yuzeng lahpinü dhingekhang Ih Farisirü khüdu,

⁶ ko dee longdhridhri Ihnü Lithro dhsümthsecho. Yuzeng khunü amüsa kangekhang Ih arah mükeh.

⁷ Ta I nengdang ajingcho apüm tsü adelü Ihnü Khrista khyanglangnü adengepü khichire.

⁸ Hütsü du mah; hitoi alaa thsidi I Büdongba Khrista Jisu müdhenung khyanglangnü lüpcho tsü adengepü Ihnü khichire. Abi khyanglangnü Ihnü lüpcho pehjüko; Ih Khrista jingchonung, ko abi te khüdu kangnung nengdang

⁹ Ihnü hütsüri apüm sehnyeh kang khichicho. Yuzeng bichichonü nguba amüsa tsü I chah adelü mühle. Ta yudsi khu Tsingrangba chahnü roba amüsa, Jisu Khrista chah yudsicho khu jüba amüsa du tsü I chah lile.

¹⁰ Ihnü mükhyahba apüm tsü, abi chongcha changtanung ko abi süba la abi kyo kangnung nengdang ko Ipu mii asü lanü kangli ronung alongdi la,

¹¹ Khrista müdhenung ko kangliroba zii tsüpnung.

Nahdhingkeh Yang Shangcho

¹² Ihnü ngupehko mahkhang pisako pü müyore.Ta Khrista Jisu-nü tu nengdang Ih apu yo kangnung rangcho, hütsü ngunung nengdang müküpre.

¹³ Jünirüti, Ihnü hütsü ngupehko pü mülümre; ta Ihnü nguchiba khüdu tsü, khanglang tu liro hütsü nbüchüpü bekhu tu liro hütsü chihnung müküpre.

¹⁴ Hütsünü amilang akang nengdang Jisu Khrista khu Tsingrangba adsiba nahdhingkeh tsü chihchehnungthsa Ihnü müchongkhüti shangre.

¹⁵ Ihsa atümung sürü anbü la lümjing liro hiba lümlong kyo libae. Ta nührü yola khürü lümlong pa likhang, Tsingrangba-nü hütsü tsidsajünung.

¹⁶ Tusütusü thsanye, Ihsanü ade yingcheh bichiba yuzeng la bekhu wünung.

¹⁷ Jüniriti, Ih iithsang. Ihrünü nührü khyang yohpüjüba adüzü atsa sürünü bichiro arüh chahnü dhingchoung.

¹⁸ Ihnü müngulangnü hi nengdang nührü te adrongpi yoko, ko adesü Ihnü nahshükih sho yore: Khrista khala chah süba münyehrü kangsohnungthsa akang adrong lile.

¹⁹ Arüh mümehmi la changkhangnung, tunüo arüh tsingrang tsü arüh mibong tsü lile. Arühnü shahnungba la müthsehre, ko hiba limih kohro nengdang du lümre.

²⁰ Ta Ihsalü, ninglang shutsakhung lile, ko Ihsanü Ihsa Kangchehjüba Abüdongba Jisu Khrista ninglang yanglih lanü ronung longphiseh yingre.

²¹ Abinü tase khüi khu lüpcho abi pohki yohpücho, hütsüba tase bichi abinü Ihsa sumüzeh asüba fü hi apu ahechi fü kyo mülichi kangsohnung.