FILIPIRÜ 2 - AMÜSA BAIBEL (BSI)

Khrista Sümcho ko Dicho

¹ Nührü akang Khrista la lichonü nührü rezehsohre, ko abi amüinü nührü tbachijüre. Nührü anbü la akehta lile, ko nührü kahla amüi ko dhsa lümba lile.

² Hütsünü, nührü alümcho khüdu, amüi khüdu changta, ko anbü ko lümlong khüdu thsacho khu nührünü Ih künyangsohnung thsüchire.

³ Palu lümchonü mahkhang müthsehmülanü tu tünguchi, ta khüdunü khüdu te azikyah kangnü, lede abürü tenü aparü awübaepü khiching.

⁴ Abürü tsacho du mahpü bürü nengdangsü lüm.

⁵ Khrista Jisu chah liba lümlong tsü nührü chah lisohng:

⁶ Abi chah lede Tsingrangba saying kehcho, ta abinü khingnü Tsingrangba kyo kangnung mülüm.

⁷ Hütsü müli, apu jangjang adeng kangpü, ayurü roh-i kangcho. Abi nyitsarü kangcho ko amüi tsurü kyonü rocho.

⁸ Abinü apu jangjang longlüm kangcho, ko khala chah asünung mii yochonyicho.

⁹ Hütsünü Tsingrangba-nü abi amungthriba la dhimüsucho ko abi khyang apa neng atümung tenü adiuba neng jücho.

¹⁰ Hütsünü Jisu nengla, ninglang, limih chah ko alih yonglang lirüti atümungnü arüh mükhohnü mükhukehnung.

¹¹ Ko Au Tsingrang khyang ahechi jo atümungnü Jisu Khrista tsü Abüdongbaepü misha nyengchonung.

Limih la Atsingse roh-i Vinung

¹² Hütsüeko amüiba jünirüti, Ih nührü te lide nührünü lede I yochonyicho kyo, Ih nührü tenü za lide I yochonyinung tsü alaa adhsütah. Nührübürü akangcheh nengdang drüsehnü ko dhridhrinü nguching;

¹³ tunüo nührünü longphisohnung ko abi nahdhingkeh yochonyi nguchichehsohnung Tsingrangba lede nührü chah nguchire.

¹⁴ Athsangnyang limih ko amünyi nyitsarü yola li nührü Tsingrangba tsurüti kyo achomükeh ko amüsa kangnungthsa,

¹⁵ tu tünyingkongpü ko mürehtapü lüpcho nguching. Nührünü arüh te akang yusi shude,

¹⁶ ningchah chenghitinü vicho kyo arüh yola nührünü tsingsejüng. Nührünü hütsü roh-i nguchikhang, Khrista Nyümong la hiri yuzi khu nührü khyanglangnü Ih künyangnung, tunüo hütsünü I nguchicho apüm amükang mükang pü ngusohnung.

¹⁷ Nührü yudsi amübü jüba chah I shüh tungkehjünung thsanye, Ih künyangre, ko nührü atümung te künyangtare.

¹⁸ Hütsü kyo nührüsü künyang, ko I yola künyangtaang.

Timoti ko Epafroditas

¹⁹ Abüdongba-nü lümcho thsakhang, nührü yusinü Ih thsümüsunungthsa, nührü yanglang Timoti zah müthehnung lümle.

²⁰ Ite lümlong changtarü ko yujeba nührü xükümrülü abi du lile.

²¹ Sünüsü Jisu Khrista nengdang mülümpü palu nengdang du lümre.

²² Ta Timoti amii nührünü müdhele. Atsurünü Au dikehcho kyo yuse atsa khyanglangnü abinü Ih dikehre.

²³ I nengdang müdheyingnü Ihnü abi yang müthehnung longdire.

²⁴ Ko Ipusü nührü yanglang zah ronung Abüdongba la longdire.

²⁵ Ihsa jünirü Epafroditas, sü I yola nguchi ko khata roro, ko sü Ih tronü nührü yusi hirü liro, abi nührü yanglang müthehnung adhsütah-epü Ihnü lümre.

²⁶ Abinü nührü atümung te shirütanung khütang nahmürahcho, tunüo abi füdhsa lilepü yuchi nührü dee lümküchacho.

²⁷ Yuje abi sümüphoh dhsangnangcho. Ta Tsingrangba-nü abi te chomangcho, ko abi te du mah, ta alongri michah alongri Ihnü müngunung nengdang, Ite mii chomangcho.

²⁸ Nührünü abi anyüpiu shiro künyangsohnung nengdang, ko Ipu alongri changnung nengdang, nührü yanglang abi müthehnung tsü Ih alaa alongphibae.

²⁹ Hütsüeko, Abüdongba la abi künyangseh khyüchoung; ko hitari nyitsarü jengreng drüng,

³⁰ tunüo Khrista nguchi khyanglangnü, ko nührünü mütrochehcho khu Ih tronung nengdangnü, abi akang dhsürü la li sümüphoh nguchicho.