FILIPIRÜ 1 - AMÜSA BAIBEL (BSI)

¹ Jisu Khrista dikehrü Paul, ko Timoti chahnü Filipi la lirü Jisu Khrista la amüsarü atümung, Pastorti ko Dikonti yanglang:

² Ihsa Au Tsingrang ko Abüdongba Jisu Khrista chahnü nührü khyang achomang ko atbachi thsaang.

Yudsirüti Nengdang Paul Dangkhidangnang

³ Ihnü nührü lümcheh müipi nührü nengdang I Tsingrang nengsere;

⁴ tunüo akhudi nyümong lanü ade yingcheh Yuse Atsa nguchi la nührünü Ih trochonü

⁵ nührü atümung nengdang dangkhidangnang müipi Ihnü akünyangnü dangkhidangnangre.

⁶ Ko Tsingrangba sünü nührü chah nguchi atsa hi dikehcho, abinü Jisu Khrista Nyümong chii hütsü müthümde nguchinungepü Ihnü yudsire.

⁷ I lasih la nührü lede lile! Hütsünü nührü lümkehnung tsü I nengdang athsalange. Tunüo Ih arangyoh la lide, ko Yuse Atsa phikhümnü drengdrengsohde nührü atümung Ite achomang nguchi la trotarü licho.

⁸ Jisu Khrista amüila Ihnü nührü nengdang khütoh-i nahmürahro, Tsingrangba yuzi lile.

⁹ Nührünü atsauba tsü throchehnung kohnung nengdang,

¹⁰ nührü amüi tsü athsalang lümlong ko yuje yukhaba la alaa zisohnung Ihnü dangkhidangnangjüre. Hütsünü du Khrista Nyümong la nührü amümüsa ko mülangjüba lanü za lichehnung.

¹¹ Tsingrangba ahechi ko anengse nengdang, Jisu Khrista khu dunü jünung kohba amüsa sih atsa tsünü nührü akang jengsohng.

Akang Linung tsü Khrista

¹² Ajünirüti, I chah dhsükehba tsünü Yuse atsa zikehba la alaa du trochoepü Ihnü nührü khyang müdhesohnyüre.

¹³ Hütsü khunü, Ih arangyoh la liba tsü Khrista dikehrü thsachonüepü yangthsaba kuh nyahrüti ko aparü atümung te müdhesohre.

¹⁴ Ih arangyoh la lichonü Abüdongba la jünirüti alaa longlangsohko, ko arühnü müringpü thsingyunung müci mülahcho.

¹⁵ Ajüje, khürünü nahmoh ko yubejarong khu Khrista nengdang thsingyure, ta khürülü lümlong atsanü thsingyure.

¹⁶ Yuse Atsa phikhümnung nguchi tsü Tsingrangba-nü I khyang jüchoepü müdhechonü arühnü amüinü nguchire.

¹⁷ Ta aparü tsünü Ih arangyoh la lide alaa adhsangthsi jünung lümnü, yuje mahpü amütsa lümlong hinü Khrista sobhore.

¹⁸ Tumüthsa! Yujenye arahkhehnye akohcho atroba atümung langnü Khrista nengdang thsingyucho shulüm Ih künyangre. Ko Ih mütozah künyangnung,

¹⁹ tunüo nührü dangkhidangnang ko Jisu Khrista Anbü chahnü robanü Ih lehcheh müthehnungepü Ihnü müdhele.

²⁰ Ihnü dee mükhyahba ko alongdi tsü I nguchi la khodesü amükoh müjürosohnung, ta bekhyah ayung alathsa ade Ihnü rezeh linung, hütsü khu Ih akang linye, ko sünye I akang khu Khrista hechisohnung.

²¹ I nengdang akang linung tsü Khrista, ko sünung tsü ajingcho lile.

²² Ta akang licho khu Ihnü alaa adongcho nguchichehnung thsakhang, Ihnü khüi tuo müthrocheh.

²³ Ih anyüh kahla khütang lümdhamare. Ihnü hiba akang hi pehjüpü Khrista te linyüre, tunüo hütsü deenü atsauba.

²⁴ Ta nührü khyanglangnü Ih akang linung tsü dee adhsütah kangre.

²⁵ Ihnü hi tsüple, ko hütsü roh-i akang linungepü Ihnü müdhele. Nührü zikehsohnung ko yudsi la künyangsohnung Ih nührü atümung yola linung;

²⁶ hütsünü khode Ih nührü yang thali ronang, Jisu Khrista la nührü akangla I khyanglangnü alaa künyangnung.

²⁷ Ih nührü shirünung rochehnye mürochehnye, nührü nahdhingkeh khüdula drengdrengnü, ko yuse atsa yudsi nengdang akhyünyücho tsungphung khüdula khata yalepü yuchinung longdire; ko alathsa nührü akang lili tsü Khrista Yuse atsanü mülacho roh-i lisohnyüre.

²⁸ Nührü rorüh tüdrü; lede suzehng, ko hi khu arüh changnung ko nührünü kohnungepü arühnü yuzi ngunung, tunüo nührü khyang akoh jübong tsü Tsingrangba lile.

²⁹ Tunüo Khrista chah yudsinung du mah, ta abi nengdang chongchanü dikehnung shikhe atsa tsü nührü khyang jüko.

³⁰ Ade nührünü rothsa la Ite nohlüm khyünung kohle. Hiba rothsa tsü atsicho la Ihnü khatacho nührünü nguko, ko ade mii nührünü yuchicho roh-i asusuh Ihnü rothsa yale.