EZRA 9 - AMÜSA BAIBEL (BSI)

Ezra-nü Shuparü te Kuthriyangthritaba Yuchicho

¹ Hiri apüm nguchiko khanglang, Israel langnürü khürünü Ite ro yocho, müyurüti, bebürüti ko Levirütinü mükangmüshü limih nyitsarüti; Amon-rü, Moab-rü ko Ijip mahkhang Kanan-rü, Hit-rü, Periz-rü, Jebus-rü ko Amor-rü hiri tenü za mülire. Hütsürinü nguchiba athrünyinung nguchi tsü arünüsü nguchire.

² Jihudarünü shupalarü te kukangre, hütsüta Tsingrangba Amüsa nyitsarüti tsü münyipehko. Langnürüti ko ayingthsarüti tsü athsangnyangrü ayingba kangko.

³ Ihnü hi yuchide, awahchonü I jengki rehnahcho ko I kuva ko benbüh zümnah longyüseh pümcho.

⁴ Ih hütsüla anyüzehlang kangmübü mübünung yingcheh longyüseh pümcho, ko Israel Tsingrang-nü yangtsilangnü rorüh münyi nengdang yochonü nehrüti atümung I mükang shibülungcho.

⁵ Khode anyüzehlang kangmübü jünung akyang chihcho, Ih longyü lichola tsünü arohnahcho I jengki tsü khyüpü shemüsucho, ko Ihnü Abüdongba I Tsingrang yang I kheh müyungchü mükhukeh dangkhidangnangcho.

⁶ Ihnü yocho, “O Tsingrang, Nüte I thah dhimüsunung mii Ih khura shahre. Ihrü münyinü ihrü thah michah bhümkeh ning chihko.

⁷ Ihrü jümürü chahnü chünye yingcheh, ihrü, Nü müyurünü münyi khura shitpahko. Ihrü münyi khu, ihrü yangthsarü ihrü bebürüti yangpirü yangthsarü kheh la züduko ko ihrü kingthrümko, kengchoko ko arangyohrü kang kümtsiko. Ihrü chünye suro hita khüdupinü jowüsohko.

⁸ Ade azachah nengdang, O Abüdongba, ihrü Tsingrang, Nühnü ihrü te chomangpü ayurü suro lanü ihrü khürü tsichehsoh hiba Amüsa müdümla lisohre. Ayurü suro mülih Nühnü ihrü khyang akang asi jüko.

⁹ Ihrü ayurüthsa licho ta Nühnü ihrü ayurü kang müpehjü. Nühnü Persia yangthsaba khyang ihrü müisoh ihrü tsisoh ko thsangnyang liba Amübükuh thsachinung mülajü ko Juda ko Jerusalem la khümcho lisohcho.

¹⁰ “Ta ade, O Tsingrang, hita tikehpehko ihrünü tu yonung? Adesü Nühnü azikehrü, Nü dikehrü khu jüba amülaba yuzeng tsü ihrünü mübichi.

¹¹ Ihrü linung wüba limih tsü amümüsaepü arühnü ihrü te yoko, tunüo hütsüla lirüti tsü jongnah khüulangnü khüulangchi amünyi nguchinü jeng licho.

¹² Ihrü künyang lipü alih tsü ihrü chahnü trahchocho khyang lede shulüm jünyükhang, hütsüla lirü te kuthriyangthri müthsanung ko khodesü arüh mütronung mahkhang mükohsohnung arühnü ihrü te yoko.

¹³ Ihrü münyi ko thsameh nengdang hütsütoi ihrü khingchi tikehnye, Nüh ihrü Tsingrang-nü ihrü chah lengcho tenü müchi khingchipü ihrü akang lisohrepü ihrünü müdhele.

¹⁴ Khang ihrünü khüta thali Nü amülaba yuzeng thsangnyang hütsüri amükhyu nyitsarü te kuthriyangthrinung? Ihrünü thali nguchikhang, Nü rihlong chüro ihrü riri changsohnung ko süsü mülisohnung.

¹⁵ Abüdongba Israel Tsingrang, Nüh yuje lile, ta Nühnü ihrü akang lisohre. Ihrünü ihrü thsamehcho Nüte nyengchore; Nüh yang ronung ihrü tu athsalang mühle.”