EZRA 8 - AMÜSA BAIBEL (BSI)

Yangtsilangnü Thalirüti

¹ Artaxerxes yangthsaba shikhe Babylon la yangtsila lirüti ko Ezra yola Jerusalem lang thalirüti tsutputila athahti:

^2-14 Finehas tsutpu lanü Gershom, Ithamar tsutpu lanü Daniel, David tsutpu lanü Shekania tsurü Hatush, Parosh tsutpu lanü Zekaria, abi tsutpu lanü nyüh 150 zeh (arüh jümü yukheh athrahcho lile) Pahath Moab tsutpu lanü Zerahia tsurü Eliehoenai, nyüh 200 zeh Zatu tsutpu lanü Jahaziel tsurü Shekania, nyüh 300 zeh Adin tsutpu lanü Jonathan tsurü Ebed, nyüh 50 zeh Elam tsutpu lanü Athalia tsurü Jeshaia, nyüh 70 zeh Shefatia tsutpu lanü Mikael tsurü Zebadia, nyüh 80 zeh Joab tsutpu lanü Jehiel atsurü Obadia, nyüh 218 zeh Bani tsutpu lanü Josifia tsurü Shelomit, nyüh 160 zeh Bebai tsutpu lanü Bebai tsurü Zekaria, nyüh 28 zeh Azgad tsutpu lanü Hakatan tsurü Johanan, nyüh 110 zeh Adonikam tsutpu lanü Elifelet, Jeuel, ko Shemaia, nyüh 60 zeh (arüh akalang rocho) Bigvai tsutpu lanü Uthai ko Zakur, nyüh 70 zeh.

Ezra-nü Amübükuh shulüm Levirü Ngucho

¹⁵ Ihnü arüh atümung Ahava yangdi lang poh jowüba yongkhi shündhün shibülungsohcho ko hütsüla ihrü nyümong asang licho. Ihnü arüh yola bebürü chah khu Levirü müngucho.

¹⁶ Ihnü langnürü hiri düku dsinung müthehcho: Eliezer, Ariel, Shemaia, Elnathan, Jarib, Elnathan Nathan, Zekaria ko Meshulam ko adorü anyüh, Joiarib ko Elnathan.

¹⁷ Ihnü arüh Kasifia la athah Iddo yang, abi ko abi shangrüti amübükuh thsarüti te Amübükuh la Tsingrangba dikehnung nyitsarü müthehngpü tsingdhingnung wüsohcho.

¹⁸ Tsingrangba achomang khu arühnü azahcheh nyüh khüdu Sherebia, Mahli tsutpu lanü Levirü khüdu ko atsurüti ko ajünirüti arüh dhürekeh ihrü yang müthehcho.

¹⁹ Arühnü Merari tsutpu lanü Hashabia ko Jeshaia ko arüh tsutpurü arüh mükyü zeh müthehcho.

²⁰ Hütsüchah lahkeh Levirü te trotanung yangthsaba David ko abi te trotarütinü arüh jümürü trochehcho chahnü trahchocho amübükuh thsarü arüh 220 rosohcho. Arüh atümung abürü nengnü thrahyoh licho.

Ezra-nü Nüpü Müyurü Kong Dangkhidangnangcho

²¹ Hütsüla Ahava yongkhi shündhün ihrü atümung Tsingrangba bete ihrü jangjang longlüm kang kongnung ko ihrü shitseh ayung langnünung ko ihrü, ihrü tsuzarüti ko ihrü kuthsi apüm tsungtinung kihchinung Ihnü sobhocho.

²² Langla arorühti nyümnü Ihrü nyahnung yangthsaba te rothsarü mülung chingnung Ihnü shahcho, tunüo Ihnü abi te ihrü Tsingrang-nü abi chah longlangrü müipi müwajüre, ta sürünü Abi tenü za tsiro arüh te mükünyangre ko khingchirepü yoko.

²³ Hütsünü Ihnü tsungtinung shulüm ihrünü kong dangkhidangnangcho ko Abinü ihrü kihchicho lalingcho.

Amübükuh Nengdang Jiyü

²⁴ Bebü ayingti yolanü Ihnü Sherebia, Hashabia ko aparü dhüre throchehcho.

²⁵ Hütsüpü Amübükuh la bichinung yangthsaba, abi khyang lümlong jürü ko ayingthsarü ko Israelrütinü jücho hon, taripi ko shingtbhürü tsü ho-dhingcho ko Ihnü hütsüri bebürü khyang jücho.

^26-27 Ihnü arüh khyang jüchoti tsü: Taripi— 22 metric tons Taripi shingtbhürü 100 — süreh 70 Hon süreh— 3,400 Hon mütpah-tbhü 20— süreh 8.4 Imüyeng mütpah-tbhü atsa 2— hon mütpah-tbhü angang toi.

²⁸ Ihnü arüh te yocho, “Abüdongba nührü jümürü Tsingrang bete nührü Amüsa lile, hütsü roh-i amüküp mübü hiroba tsü hon ko taripi shingtbhürü tsü lile.

²⁹ Nührünü wü Amübükuh müchide müzah nyahng. Bebürü kuh la tsü hütsü ho-dhing ko Bebürü, Levirü ko Jerusalem la Israelrü khyang jüng.”

³⁰ Hütsünü Jerusalem amübükuh lang hiwünung shulüm hon, taripi ko shingtbhürü tsü bebürü ko Levirünü xükümcho.

Jerusalem Lang Thalicho

³¹ Ihrünü choo akhudiba dhüreanyüu nyümong Ahava yongkhi pehjü Jerusalem lang shemüsucho. Ihrü Tsingrang ihrü te zehcho ko shitseh ayung arorüh khehlanü ihrü tsungticho.

³² Ihrü Jerusalem chihpü nyümong asang kyahshangcho.

³³ Hütsüpü müyüu nyümong tsü ihrünü Amübükuh lang wücho ko hon, taripi ko shingtbhürü tsü ho-dhingcho ko Uria tsurü bebüba Meramot khyang jücho. Abi yola Finehas tsurü Eleazar ko Levirü nyüh anyüh ko Jeshua tsurü Jozabad, Binnui tsurü Noadia zehcho.

³⁴ Lüpcho ho-dhing khidhingcho ko hütsüdenü ajeng thrahyoh yohpücho.

³⁵ Hütsüpü yangtsilangnü rorüh atümungnü Israel Tsingrang khyang kangmübü roh-i trüp mübünung amübü hirocho. Arühnü Israelrü atümung nengdang misüpung 12, Sanpung 96, ko sanza 77 mübücho; arühnü arühbürü münyi lanü müsachehnung mizasü 12 mübücho. Kanglungrü hi apüm Abüdongba yang kangmübü roh-i trüpcho.

³⁶ Arühnü yangthsabanü arüh khyang jüba athrahcho tsü Eufrates governor ko abi ayingti khyang jücho; ko arühnü nyitsarüti ko Tsingrangba kuh la arüku jücho.