EZRA 7 - AMÜSA BAIBEL (BSI)

Ezra Jerusalem Rochihcho

¹ Kang anyahlipü khanglang, Persia la Artaxerxes tsü yangthsaba lide, nyüh khüdu anengnü Ezra licho. Abinü abi jümürü tsü Amungthriba bebürü Aron chahnü hiroh-i rochoepü yocho: Ezra au tsü Seraia, Azaria tsurü, Hilkia tsurü,

² Shalum tsurü, Zadok tsurü, Ahitub tsurü,

³ Amaria tsurü, Azaria tsurü, Meraiot tsurü,

⁴ Zerahia tsurü Uzi tsurü, Bukki tsurü,

⁵ Abishua tsurü Finehas tsurü Eleazar tsurü ko Aron tsurü.

⁶ Ezra tsü Israel Tsingrang Abüdongba-nü Mosa khyang jüba yuzeng la axangcheh adorü licho.

⁷ Ko abi Tsingrang Abüdongba amüwa abi chah kehchonü, abinü tsingdhingcho lüpcho yangthsabanü jücho.

⁸ Artaxerxes yangthsanung dikehpü kang dhünyeh-ula, Ezra-nü Babylon lanü Jerusalem yang Israel mülung khüdu bebürü, Levirü, amübükuh la khithsarü, amübükuh nyahrü ko anguchirü zeh shemüsucho.

⁹ Arühnü akhudiba choo adikeh nyümong Babylon pehjücho ko Tsingrangba arüku khu arühnü choo amüngau akhudiba nyümong ro Jerusalem chihcho.

¹⁰ Ezra-nü abi akang ayung Abüdongba Yuzeng yangchiba, bichiba ko Israelrü te yuzeng ko amülaba doyo licho.

Artaxerxes-nü Ezra Khyang Jüba Athrahcho

¹¹ Artaxerxes-nü thrahyuzi hi bebürü ko Abüdongba-nü Israelrü khyang jüba yuzeng ko amülabala axangchehrü Ezra khyang jücho:

¹² “Yangthsaba Artaxerxes chahnü bebürü ko Ning Tsingrang Yuzeng la axangchehrü Ezra yang.

¹³ “I yanglih apüm lanü Israelrü, bebürü ko Levirü khürü Jerusalem lang wünyükhang, nü yola wünung mülare.

¹⁴ Ite müjang lümlong jürü dhünyeh zehnü, Jerusalem ko Juda la nü chah nyümkehjücho nührü Tsingrang yuzeng tsü khütoi tsa bichiro hütsü rangcheh müdhenung nüh müthehre.

¹⁵ Ih ko I khyang lümlong jürütinü Jerusalem la Amübükuh liba, Israel Tsingrang khyang jünyüba hon ko taripi amübü tsü nüte hiwünung.

¹⁶ Nühnü Babylon lih apüm lanü khyübülungba hon ko taripi ko Israelrü ko bebürütinü Jerusalem la arüh Tsingrang khyang amübü jücho hütsürisü hiwüng.

¹⁷ “Nühnü hiba thsi hi dee müzahmüki pehng ko misüpung, Sanpung: Sanza, tsang ko yongkha lihpü Jerusalem Amübükuh la bholu chah mübüng.

¹⁸ Anyingcho hon ko taripi tsü Tsingrangba-nü lümcho la nüh ko nührü nyitsarünü dhsütahchola pehng.

¹⁹ Jerusalem la Tsingrangba khyang nührünü amübükuh la bichinung nührü khyang jüba shingtbhürü tsü jüng.

²⁰ Ko Amübükuh nengdang adesü khürü dhsütahkhang, yangthsaba kuthsi lanü nührü khyang jünung.

²¹ “Ihnü Eufrates nyüzüdu lahpi kuthsi bichirü adirü atümung te, bebüba ko ning Tsingrang yuzeng la axangcheh adorü Ezra-nü tu tsingdhingnang,

²² Taripi süreh hajar asang thsih müyü, Litoh süreh hajar dhüre, yongkha liter hajar anyüh, olive-tuji liter hajar anyüh, ko mih khütoi dhsütahrünang bechola jüngpü yuzeng jüre.

²³ Ning Tsingrang-nü Abi Amübükuh shulüm tu dhsütahrünang Ite ko I khanglang yangthsarü sütesü khodesü rihlong müchüronungthsa müzahmüki lüpcho desahng.

²⁴ Ko bebürü, Levirü khithsarü, anyahrü, anguchirü mahkhang hiba Amübükuh te chingkeh liba sü chahnüsü amüthsüh dhrisü mükhyünung yuzeng jüre.

²⁵ “Ezra, nü khyang nü Tsingrang-nü jücho lümlong tsü bichi, Eufrates nyüzüdu lahpi yuzeng bichi lirü michah yangthsanung yangthsathsarü ko yukharü throchehng.

²⁶ Khürünü nü Tsingrang yuzeng mahkhang yanglih yuzeng yocho münyikhang, abi tsü asünü mahkhang yangtsilang mütheh, mahkhang abi kuthsi müzüp khyüjo mahkhang arangyoh la yohpo khingching.”

Ezra-nü Tsingrangba Secho

²⁷ Ezra-nü yocho, “Ihrü jümürü Tsingrang, Abüdongba Seing! Abinü Jerusalem la Abüdongba Amübükuh hitoh-i hechisohnungthsa yangthsaba khyang lümchehsohcho.

²⁸ Tsingrangba achomang khu yangthsaba, abi khyang lümlong jürü ko abi pohki adirüti atümungnü Ih müisohko; Abüdongba I Tsingrang-nü Ih rezehsohko, hütsü khu Ihnü Israel la tsutpu adrong lanü athahti I yola wünung Ihnü kihchochehko.”