EZEKIEL 3 - AMÜSA BAIBEL (BSI)

¹ Tsingrangba-nü yocho, “Nyitsarü tsurü, thrahlohcho hi tsung; hütsüpü wü Israelrü te choung.”

² Achotsü Ihnü I be kacho, ko abinü thrahlohcho tsü tsung pü jücho.

³ Abinü yocho, “Nyitsarü tsurü, Ihnü jüba thrahlohcho hi tsung; hütsünü nü mi jeng.” Ihnü hütsü tsucho, ko thsakukih kyo nyiyahcho.

⁴ Hütsüde Tsingrangba-nü yocho, “Nyitsarü tsurü, Israelrü yanglang wüng ko arüh te Ihnü nüte yocho yu tsü young.

⁵ Ihnü nüh shuparü yu athsah chorü yucho yang mümütheh, ta Israelrü yang müthehre.

⁶ Ihnü nühnü münyichehba yu athsah chorü yucho yang müthehrelang, arühnü nüyu nyinung.

⁷ Ta Israelrü sünüsü münyinyünung; arühnü Iyu mii münyinung. Arüh apüm ahongzi ko atürütseh lile.

⁸ Ade Ihnü nüh arüh kyo hongzi kangsohnung.

⁹ Ihnü nüh lung kyo akhükhah, ko ririlung kyo amüküp kangsohnung; Arüh anyümrü tüdrü.”

¹⁰ Tsingrangba-nü mütozah yocho, “Nyitsarü tsurü, longi nyieng ko Ihnü yocho lüpcho lümkehng.

¹¹ Hütsüpü yangtsila liba nü nyitsarü yanglang wüng ko arühnü nyinye mühnyinye, Ih, Amichahba Abüdongba-nü tu yoro hütsü arüh te young.”

¹² Hütsüpü Tsingrangba nbünü Ih dhimüsucho ko I khanglangnü yuva arangchehnü züde yocho Ihnü yuchicho, “Ninglang Abüdongba ahechi seing!”

¹³ Nyübongla kanglungrüti qo tiichicho, ko khülujing alihyo zingrü kyo Ihnü yuchicho.

¹⁴ Abüdongba zii I chah rocho, ko abi nbünü Ih dhitsicho ko I zichüro dee mükünyangcho.

¹⁵ Hütsüpü Ih yangtsirü li yaba Chebar Yongkhi shündhün Tel Abib la rocho, ko hütsüla nyümong dhünyeh Ihnü nguba ko yuchiba tsünü Ih lümdhama licho.

Ezekiel Roshengrü Throchehcho

¹⁶ Nyümong dhünyeh khanglang, Abüdongba-nü Ite chotacho.

¹⁷ Abinü yocho, “Nyitsarü tsurü, Ihnü nüh Israel yucho dhingyehrü throchehre. Ihnü nüte yoba amüzahnung yu tsü nühnü arüh te chomüchinung.

¹⁸ Ihnü nüte amünyi nyitsarü khüdu sünungepü yopü, nühnü abi te amüzahnung yu tsü müyopü abi amünyirü khüdu thsa sükhang, abi süba tsü nü bha thsanung.

¹⁹ Ta nühnü yopü abinü mütozah amünyi nguchi amünyirü thsa sükhang, nü kanglü mükhyünung.

²⁰ “Yujeba nyitsarü atsa khüdu amünyi nguchinung dikeh ko Ihnü abi suro amütsa khüdula züdusohde, nühnü abi mümüzahsohkhang abi sünung. Apu münyi ngang abi sünung, abi nguchi atsa tsü Ihnü mülümchehnung ko abi süba tsü nü bha thsanung.

²¹ Nühnü abi te amünyi tünguchi pü müzahsohde, abinü nü yochonyi amünyi münguchikhang, abi akang linung, khang nü akangsü rikinung.”

Ezekiel Yu Müchochehcho

²² Abüdongba zii I chah licho Ihnü müdhecho, ko Abinü Ite hita yo Ihnü yuchicho, “Shemüsung ko angahlang tsü chüdung. Ihnü nüte hütsüla chotanung.”

²³ Achotsü Ihnü angahlang tsü wücho, ko Ihnü Chebar Yongkhi shündhün nguba kyo Abüdongba ahechi Ihnü hütsüla ngucho.

²⁴ Ih alih la hapkeh khülucho, ta Tsingrangba anbü I chah rocho ko Ih khamüsu yasohcho. Abüdongba-nü Ite yocho, “Kulang wüng ko kuh khangti püm.

²⁵ Nyitsarü tsurü, nüh rangshünü rahkehpünung, ko yanglonglang müwüchehnung.

²⁶ Hiri anyümrü nyitsarü te müchotachehsohnung nü müle jahsohnung.

²⁷ Hütsüpü, Ihnü nüte khode thali chotanang ko chonung tase jünang, Ih, Amichahba Abüdongba-nü tu yoro hütsünü nühnü arüh te yonung. Khürünü hütsü nyinung, ta khürünülü nüyu münyinung, tunüo arüh tsü anyümrü yucho lile.”