EFESIARÜ 5 - AMÜSA BAIBEL (BSI)

Atsingse la Lieng

¹ Nührü Tsingrangba amüi tsurü thsachonü, nührünü abi kyo linung müküpm.

² Khrista-nü Ihsa müichonü apu akang Ihsa nengdang axümlichi amübü ko kangmübü khüdu Tsingrangba khyang jücho kyo, nührü akang tsü amüila rahseh lieng.

³ Nührü Tsingrangba tsurüeko, nührü yola nahtrahnaxeng mahkhang amümüsa, mahkhang müxümüngu khiyu dangchinung athsalang mah.

⁴ Mahkhang ashamükeh, mabomashi, mahkhang lalolashi yu chonung nührü te mütang. Hütsü mülih nührünü Tsingrangba neng seing.

⁵ Nahtrahnaxengrü, amümüsarü, mahkhang müxümüngurü (tunüo müxümünguba tsü kyothri mübüba khüdue) süsü Khrista ko Tsingrangbarü yanglih la nohlüm mühlepü nührünü müdheing.

⁶ Amükhyu yunü sü khyangsü nührü tükiyohchüsoh, hitari khunü Tsingrangba rihlong chüroba abi yocho mühnyirü chah küdunung.

⁷ Hitari nyitsarü te seh tümükhong.

⁸ Nührübürü mii khüdupi amala licho, ta Abüdongba nyitsarü kangchonü, nührü ade atsingse la lile. Hütsüeko nührünü atsingse tsurüti kyo lieng,

⁹ tunüo atsingse tsünü atsa, amüsaba ko yuje chürosohre.

¹⁰ Tunü Abüdongba künyangsohro, hütsü nyichonung müküpm.

¹¹ Bürünü nguchiba amii müliba, ko ama nguchi tu nguchinung müdhsütah. Hütsü mülih, arüh tsü atsingse yang norung.

¹² (Arühnü rang nguchiba nengdang chochinung mii dee ashahnung.)

¹³ Ko khode apüm müdhenang, arüh saying tsü khohchehre;

¹⁴ ko hütsü tsidsa müdhere. Hütsünü hita yore: “Jesung, yüpsehrüti, ko asücho lanü kangli rung, ko Khrista-nü nü khyang atsingse jünung.”

¹⁵ Hütsüeko nührünü müzahmüki akang lieng. Amümüdherü roh-i tüli, ta lümlong lirü kyo lieng.

¹⁶ Bekhyah atsa apüm lihchoung, tunüo nyümongti amütsa lile.

¹⁷ Hütsüeko amüsithsarü roh-i tüthsa, ta Abüdongba lümcho nyichehnung müküpm.

¹⁸ Nührü akang du thsangnyangjüba yongkhanü tümücha; hütsümüli Anbünü jeng lieng.

¹⁹ Nengsekhi, mübükhi, ko amüsa khi la; khüdunü khüdu te chotaang; nührü lasih la nengsejü thsaang.

²⁰ Ihsa Abüdongba Jisu Khrista nengla, Au Tsingrang khyang lüpcho nengdang lede anengse jüng.

Anii ko Anitpü

²¹ Khrista jengreng drünü nührü khüdunü khüdu pohki lieng.

²² Nitpürüti, Abüdongba te roh-i palu niirü pohki lieng.

²³ Khrista tsü apu fü Lithro kangchehjürü kangnü, Lithro michah tase licho kyo; anii khüdu tsü anitpü michah tase lile.

²⁴ Hütsünü tu khüta lithronü Khrista pohki liro, hütsü roh-i nitpürünü niirü pohki lieng.

²⁵ Niirüti, tu khüta Lithro müichonü Khrista-nü apu akang jücho, hütsü roh-i palu nitpürü müing.

²⁶ Lithro tsü apu te khüdupinü ahechi la amüdhseng ko mülang müli, xubongtüyah mükeh mahkhang lapha mükeh, mahkhang tu achomükeh linung nengdang,

²⁷ Lithro tsü abi yu khu kih la thsütohnü müsacheh Tsingrangba khyang jünung shulüm abinü hi nguchicho.

²⁸ Adhrerünü abürü fü müicho roh-i palu nitpürü müinung athsalang. Sünü palu nitpürü müiro abinü apu müire.

²⁹ (Sünüsü abürü fülü müzongre, hütsümüli, Khrista-nü Lithro te nguchicho roh-i, abinü hütsü xüküm kangre;

³⁰ tunüo Ihsa abi fü la khiyohti lile)

³¹ Amüsa yunü, “Hi nengdangnü adhrerünü palu Au ko atpa pehjünung, ko anitpü te müjang linung, ko anyüh tsü khüdu du kangnung.”

³² Hiba arangyu dee asoh, hi Khrista ko lithro nengdang chorepü Ihnü yore.

³³ Ta hi nührü nengdangsü lile: Nührünü abürü roh-i nitpürü tsü müibae, ko nitpürünü niirü jengreng drübae.