EFESIARÜ 4 - AMÜSA BAIBEL (BSI)

Afü Akehta

¹ Abüdongba dikehcho khyanglangnü, arangyoh la libongnü kihchire: Nührü khüi nengdang dsicho hütsüba adsiba te dekhing akang lieng.

² Lede azikyah kang, longlüm, ko rangcho lieng. Khüdunü khüdu te rangchotanü nührü amüi ngusohng.

³ Anbünü jüba atbachi khüinü nührü rahrüta liro, hütsü akehta riki yohpünung müküpm.

⁴ Alongdi khüdu yang Tsingrangba-nü nührü dsicho kyo, afü khüdu ko anbü khüdu du lile.

⁵ Abüdongba khüdu, yudsi khüdu, baptiba khüdu;

⁶ Tsingrangba khüdu, Ihsa atümung Au, sü apüm michah apüm khu, ko apüm la Abüdongba lile.

⁷ Khrista-nü jücho aichi, Ihsa müipinü jiyü papa khyücho lile.

⁸ Amüsa yunü yocho roh-i: “Khode abi amungthrilang tuwücho, abinü arangyohrü adrong abi te nücho; abinü amüi tsurü khyang jiyü jücho.”

⁹ Ade “abi tuwücho” adüzü tsü tuo? Hütsü adüzü abi akhudi alimih asoh lang jürocho.

¹⁰ Apüm jengsohnung nengdang, sü ningti apüm khu tuwücho, abi ajürobong tsü lile.

¹¹ “Amüi tsurü khyang sünü jiyü jücho” Abinü khürü riwürü, khürü azikehrü, khürü thsingyuwürü, khürü san nyahrü ko khürü athsingyurü thsanung throchehcho.

¹² Khrista fü külüpkehnung ko Tsingrangba nyitsarüti khristan dikehba nguchi nengdang rungnümsohnung abinü hi nguchicho.

¹³ Hütsüeko Ihsa atümung yudsi la, ko Tsingrangba Tsurü müdheba la khüdu du kangnung; ko Khrista apisaba akichocho fü chiinü, Ihsa alümjing nyitsarü kangnung.

¹⁴ Adelü Ihsa azarü roh-i, athsingyuba nyübong müipinü füwü-füro, nyitsarü khürah, ko athsüyohchüba rahnü Ihsa münüchisohnung.

¹⁵ Ta amüila yuje cho, Khrista sü athah liro, abi chah Ihsa lang apüm la zibae.

¹⁶ Abi arahsehba la afü lohla apüm chungkehtare, ko afü la lohla müipinü afü tsü yachehsohre. Hütsünü khode lohla müipinü palu nguchi nguchinang, afü zisohre ko amüila abürü jangjang zikehre.

Khrista la Akang Asi

¹⁷ Hütsünü, Ihnü Abüdongba nengla nührü müzahsohre: lümlong müzehba

¹⁸ ko ama lümlong hiba müyudsirüti kyo tüli. Tsingrangba-nü jüba akangla tsü arüh nohlüm mühle, tunüo arühnü tusü mümüdhe, ko hongzire.

¹⁹ Arüh chah ashahnung lümlong mühle; arühnü abürü jangjangthsa amütsa kangre, ko mabomashi nguchi apüm müringpü nguchire.

²⁰ Nührünü Khrista nengdang nyichoba tsü hütsüta mah.

²¹ Nührünü yuje abi nengdang yuchiko, ko abi monoti thsachonü Jisu chah liba yuje tsü nührü te yoko.

²² Hütsüeko akhürahyohchüba mükhyahmürahchonü nührü changsohba ahiba akang khüila nührü li rocho, hütsü lanü nührü za lieng.

²³ Nührü lasih ko lümlong khüdupinü asi kang,

²⁴ ko yuje ko amüsa la Tsingrangba kyocho la thricho akang asi tsü nührünü khyüng.

²⁵ Hütsünü, adelü arahkheh tücho! Nyitsarü müipinü ajünirü te yuje choung, tunüo Ihsa atümung Khrista fü la müjang khiyohrü lile.

²⁶ Nüh zichürokhang, hütsünü nüh amünyi tüshitpahsoh, ko nyümong mükhyang zii tüchüro.

²⁷ Motsing khyang thsatsa tüjü.

²⁸ Palu akang yuje la lichehnung nengdang, ko ailümrü trochehnungthsa, sünü folicho abinü adelü tüfü ko nguchimüsung.

²⁹ Nü yu yuchirü khyang achomang jüchehba, khüinü külüpkehro, ko bekhyah te phishuro hütsütari yu chah khu, nührünü dhsakehjüba yu tücho.

³⁰ Ko Tsingrangba Anbü Amüsa tüwahsoh; tunüo Anbü tsünü nührü Tsingrangba yo amüdhethsa, ko Tsingrangba-nü nührü lehchehnung Nyümong tsü rolepü azengchocho lile.

³¹ Akha, mükhyahmürah, ko zichüroba apüm nührü chahnü zasohng. Adelü khongtaba, nyüpmüseh, ko thrünyitaba tu tülisoh.

³² Hütsü mülih, nührü khüdunü khüdu te müita ko kangli tsata lieng, ko Tsingrangba-nü Khrista khu mülang pehjücho kyo, nührü khüdunü khüdu mülang pehjütaang.