EFESIARÜ 3 - AMÜSA BAIBEL (BSI)

Yangpirü Nengdang Paul Nguchi

¹ Hi chahnü, nührü yangpirü khyanglangnü Jisu Khrista la arangyohrü, Ih Paul-nü Tsingrangba te kihchire.

² Tsingrangba-nü abi achomang la nührü tsasohnung nengdang hiba nguchi I khyang jüchoepü nührünü yuchiko.

³ Tsingrangba-nü abi arang lümchung mishanü Ite müdhesohcho. (Hi nengdang Ihnü akhikyahnü thrahko,

⁴ ko Ihnü thrahba tsü nührünü khikhang, Ihnü nyichehba tsü Khrista arangyu tsü tunang nührünü nyichonung.)

⁵ Papade hiba arangyu tsü amüi tsurü te müyocho, ta ade anbü khu Tsingrangba-nü abi amüsa riwürü ko azikehrü te mishako.

⁶ Ko hiba arangyu tsü Yuse atsa khunü Tsingrangba thsiking khyüla Jihudarü te Yangpirüsü nohlüm khyünung; arühsü afü khüdula khiyoh kang Tsingrangba-nü Jisu Khrista khu anyengchocho la tsü nohlüm ngunung.

⁷ Tsingrangba pathsa jiyü khüi abi zii khu I khyang jücho, hütsünü Ih Yuse Atsa dikehrü kangsohcho.

⁸ Tsingrangba tsurü achangba tenüsü Ih azauba; atanye müchangkaba Khrista nengdang Yuse Atsa yangpirü yang hinung,

⁹ ko Tsingrangba arang lümlong tsü nyitsarü atümung khyang tsüpsohnung Tsingrangba-nü hiba müngu I khyang jücho. Ade Lithro khu ninglanglih la yangthsarü ko tase bichirütinü lüpcho la Tsingrangba asithsa lümlong tsü müdhesohnung nengdang,

¹⁰ lüpcho thribong Tsingrangba-nü atsicho shang ayung la abi arangyu hi rang yohpücho.

¹¹ Tsingrangba-nü müchangkaba alümchung hi Ihsa Abüdongba Jisu Khrista khu tikehsohcho.

¹² Khrista la Ihsa yudsi khu Tsingrangba yanglang mücilangnü rezeh wünung kohle.

¹³ Hütsüeko, Ih nührü jingchosohnung nengdang chongchareko; nührü sumüzahnung Ihnü kihchire.

Khrista Amüi

¹⁴ Hi thsacholanü, Au sü chahnü ninglang ko limih la yujeba aneng nguro,

¹⁵ abi jingte Ihnü mükhoh thung kihchire.

¹⁶ Abi athangchi ahechi lanü abi anbü khu nührü ayonglang anbü la rezehsohnung zii jüng pü,

¹⁷ ko yudsi khu nührü lasih la Khrista lichehnung Ihnü kihchijüre. Nührü amüila ara ra lichehnung nengdang Ihnü kihchire,

¹⁸ hütsünü Tsingrangba tsurüti atümung te Khrista amüi tsü khütoh-i amülah, asheng ko athseng ko asohnang anyichehnung zii ngunung.

¹⁹ Ho, nührünü abi amüi müdhenung ajeng mühnyichehnye, Tsingrangba sayingnü jeng lieng.

²⁰ Tsingrangba sü ziinü Ihsa chah nguchinü Ihsanü kihchicho mahkhang lümdhingcho tenü alaa nguchinung kohro:

²¹ Abi te Lithro la ko Jisu Khrista la ahechi lede müchangkapü thsaang! Amen.