EFESIARÜ 2 - AMÜSA BAIBEL (BSI)

Asü lanü Akang Yang

¹ Papade nührü yocho mühnyicho ko amünyi ngang nührü anbü la asücho licho.

² Hütsü shikhela nührünü limih amünyi langla tsehcho; nührünü ningwüm la amünyi ziiti yangthsarü, sünü ade Tsingrangba yocho mühnyirüti michah yangthsaro, abi yochonyicho.

³ Ihsa atümung arüh kyo Ihsa mürucho la, palu shutsa ko lümlongnü khyünyücho la licho. Aparü apüm roh-i, Ihsa suro tsü Tsingrangba rihlong chüroba ngunung licho.

⁴ Ta Tsingrangba achomang bholora, ko Ihsa nengdang abi amüi dirachonü,

⁵ Ihsa ayocho mühnyichonü, anbü la asücho thsa lide abinü Ihsa Khrista te kanglisohcho. Tsingrangba achomang khu nührü khümcho lile.

⁶ Ihsa Khrista Jisu te ninglanglih la lisohnung nengdang abi yola Ihsa kanglisohcho.

⁷ Jisu Khrista amüila Ihsa te achomang shaphara aronung shang nengdang ngusohnung abinü hi nguchicho.

⁸ Tunüo Tsingrangba achomang ko yudsi khu nührü khümcho lile.

⁹ Hi nührü müküpchonü mah, ta Tsingrangba jiyü, hütsünü süsü müthsehmüla müthsanung.

¹⁰ Tsingrangba-nü Ihsa ade khüta liro, hütsü roh-i thricho, ko abinü Khrista la nguchi atsa akang nengdang Ihsa thricho khüi Ihsa khyang nguchisohnung abinü rungnümjung licho.

Khrista la khüdu

¹¹ Nührü asuro denü Yangpirüti, papade nührü khüta licho, hütsü lümchehng, tunüo Jihudarünü arühbürü tsü “amüjüp-pehrü” ko nührü te “amümüjüp-pehrü” pü dsire (khüi fü chah khehnü nguchicho)

¹² Hütsüde nührü Khrista tenü za licho. Nührü yangpirü thsachonü Tsingrangba athrochehcho nyitsarü müthsacho. Tsingrangba-nü anyitsarü te azengchotacho la nührü nohlüm mülicho, ko hiba lih la nührü alongdi müli ko Tsingrangba mülipü licho.

¹³ Ta nührü sürü ashula licho, Jisu Khrista sücho khu ade Khrista la amünyethsa noro lile.

¹⁴ Tunüo Khrista apunü Jihudarü ko yangpirü khüdu kangsoh Ihsa khyang yangtsa hirojücho. Arüh arorüh kang changnah liba züdi tsü abinü apu fünü thsangnyangjücho.

¹⁵ Abinü abi chah yucho anyüh tsü asi nyüh khüdu kangsohnung, ko yangtsa chürosohnung nengdang Jihudarü yuzeng ko yangthsa atümung changjücho.

¹⁶ Abi khala chah sücho khu Khrista-nü arüh dhsatacho changjücho; khala khu abinü yucho anyüh tsü afü khüdula kehtasoh Tsingrangba yanglang thali norocho.

¹⁷ Hütsünü nührü yangpirü Tsingrang tenü ashu za liba, ko amünyethsa liba Jihudarü yang Khrista rocho ko Yangtsa yuse atsa tsü atümung te thsingyucho.

¹⁸ Jihudarü ko Yangpirüti, Ihsa atümung Khrista khu Anbü khüdula Au yang ronung kohre.

¹⁹ Hütsünü, adelü nührü yangpirü ko shirü mah, ta nührü Tsingrangba tsurüti te shutsakhung ko Tsingrangba kukhi la khiyoh lile.

²⁰ Riwürüti ko azikehrütinü müsucheh khyüm thsakehba la tsü nührü mii zehle, khüila Jisu Khrista tsü akhengdi lung lile.

²¹ Kuh atümung mareh ko Abüdongba khyang khakhuchüjüba amüsa kuh zisohbong tsü abi lile.

²² Abi yola aparü atümung te yohrüta nührüsü anbü liba Tsingrangba kuh khüdu kang lile.