EFESIARÜ 1 - AMÜSA BAIBEL (BSI)

¹ Tsingrangba lümcho khu Khrista Jisu riwürü, Paul chahnü— Efesia la liba Tsingrangba tsurüti, Jisu Khrista la longlangcheh libati yanglang:

² Ihsa Au Tsingrang ko Abüdongba Jisu Khrista chahnü nührü te achomang ko atbachi thsaang.

Khrista la Anbü Amüwa

³ Ihsa Abüdongba Jisu Khrista Au Tsingrang khyang anengse jünung! Tunüo Ihsa Khrista te kehtachonü ninglanglih anbü amüwa lüpcho abinü Ihsa khyang müwajücho.

⁴ Ihsa abi jingte amülang mülipü amüsa linung nengdang, limih müthriedenü Tsingrangba-nü Ihsa abi yo thsanung Khrista la throchehpehcho.

⁵ Tsingrangba-nü abi amüinü Ihsa abi tsurüti kangsohnung Jisu Khrista khu dhrongchehpehcho, hütsü abi akünyang ko nahdhingkeh thsacho.

⁶ Ahechi achomang, apu amüibong tsurü khu Ihsa khyang amükang jiyü jücho nengdang, Tsingrangba neng senung.

⁷ Tunüo Khrista sücho khu Ihsa lehchehko, ko Ihsa münyi pehjüko.

⁸ Tsingrangba-nü Ihsa khyang hitoi khura jüba hi, abi achomang khütoio!

⁹ Tsingrangba lümlong ko rang müdheba apüm la, Khrista khu tikehsohnung khüi abinü dhrongchehjung licho, hiba arang lümchung tsü abinü lümcho roh-i nguchi Ihsa te müdhesohcho.

¹⁰ Hiba lümchung khüi Tsingrangba-nü akyang tikehsohnung liro, hütsü tsü Khrista athah thsapü ninglang ko alih la athricho lüpcho nübülungnung.

¹¹ Lüpcho Tsingrangba lümchung ko thrijungcho roh-i du nguchire; ko apunü dhrongchehcho roh-i, Tsingrangba-nü Ihsa abi yo thsanung Khrista la throchehcho.

¹² Hütsüeko Ihsa Khrista chah akhu longdirütinü Tsingrangba ahechi senung!

¹³ Ko yuje yusi, yuse atsa khüinü nührü khyang akangcheh hirocho nührünü yuchide, nührüsü Tsingrangba tsurü kangcho. Nührünü Khrista chah yudsichonü, Tsingrangba-nü nührü khyang anyengchocho Anbü Amüsa jonü nührü chah Abüdongba yo amüdhethsa shingkehcho.

¹⁴ Tsingrangba-nü abi nyitsarü te tu nyengchocho hütsü ngunung Anbü tsü yuzi lile, ko nyüje ajeng tsü Tsingrangba-nü abi nyitsarü khyang jünungepü hinü alongdi jüre. Ihsanü abi ahechi senung!

Paul Dangkhidangnang

¹⁵ Hi khyanglangnü, Abüdongba Jisu chah nührü yudsi ko Tsingrangba tsurü atümung nengdang nührü amüi yuchi dunü,

¹⁶ nührü nengdang Ihnü Tsingrangba khyang anengse jüba müzahre. I dangkhidangnang müipi nührü lümchehre,

¹⁷ ko Ihsa Abüdongba Jisu Khrista Au ahechi Tsingrangba te nührü khyang Anbü Amüsa, sünü nührü lümlong li kangsohnung, ko Tsingrangba nührü yang mishasohnung, khüinü nührünü abi müdhenung, hütsü jüngpü kihchijüre.

¹⁸ Abi nyitsarü khyang anyengchocho anyemüyang amüwa khüta athangchi,

¹⁹ ko Ihsa sürü yudsirü chah abi ziinü khütoi nguchiro, abi atsingse ngunungthsa nührü lümlong khangthrusohnung Ihnü kihchijüre. Ihsa chah nguchiba zii hi

²⁰ anyüh tsü Jisu Khrista asücho lanü kanglisohpü ninglanglih la Au tsalang pümsohba akohba zii khüdu du lile.

²¹ Hütsü ninglanglih yangthsarüti, taseti, ziiti, ko abüdongrüti atümung michah Khrista-nü yangthsare; hiba lih la ko aronung lih la anengti apüm michah abi neng amichahba lile.

²² Tsingrangba-nü lüpcho Khrista jing pohki yohpücho ko Lithro nengdang lüpcho michah athah kangsohcho.

²³ Lithro tsü Khrista Füpüm, abi akükyüba, sünü apümlang lüpcho la jengjüre.