DANIEL 9 - AMÜSA BAIBEL (BSI)

Daniel-nü Müyurü Nengdang Kihchicho

¹ Media-rü Ahaserus tsurü Darius-nü Babylon yanglih la yangthsathsa licho.

² Abi yangthsaba akhudiba kang, Abüdongba-nü azikehrü Jeremia te kang nyühre Jerusalem thsangnyangjünungba nengdang Amüsa vakhala yocho Ihnü khidhing licho.

³ Ihnü Abüdongba Tsingrangba te müyahshü müpipü, lihwüla püm kongnü kihchicho.

⁴ Ihnü Abüdongba I Tsingrang te müyurü münyi nengdang nyengcho dangkhidangnangcho. Ihnü yocho, “Abüdongba Tsingrang, nüh arangcheh, ko ihrünü Nüh dhichire. Azengtacho la Nüh longlangchehba ko Nü müirü ko Nü yocho nyirü te Nühnü müthrehba amüi ngusohre.

⁵ “Ihrünü shitpahko, ihrü amünyirü, ko ihrünü thsamehko. Ihrünü Nü yocho münyiko ko Nü athsalang lanü ximülako.

⁶ Ihrü yangthsarü, adirü, jümürü, ko ihrü yucho te nü dikehrü azikehrütinü chotacho ihrünü münyiko.

⁷ Nüh, Abüdongba Nüh lede athsalang nguchire, ta ihrübürünü ihrü michah ashah hirore. Ihrü Judea la, Jerusalem la ko ashu amünyeh apümlang tsisho liba Israelrütinü Nüte yocho münyicho müdhele, tunüo arühnü Nü chah longmülang.

⁸ O Abüdongba, ihrü yangthsarüti, ihrü adirüti ko ihrü tpurütinü ashahmükeh Nüh nyüm amünyi shitpahko.

⁹ Ihrünü Nüh nyümnye Nühnü yanglilümcho ko mülang pehjücho.

¹⁰ O Abüdongba, ihrü Tsingrang, Nühnü Nü dikehrü azikehrü khu jücho yuzeng bichi linung yode, ihrünü Nüte mühnyicho.

¹¹ Israelrü atümungnü Nü yuzeng thsangnyangko ko Nüyu mühnyi. Ihrünü Nüh nyüm amünyi shitpahko, hütsünü Nühnü Nü dikehrü Mosa Yuzeng la liba chokehchola ihrü michah hirojücho.

¹² Nühnü ihrü te yocho kyo nguchiko. Nühnü limih la apa yangdi tenü alaa Jerusalem khingchiko,

¹³ ko Mosa Yuzeng la zehcho akhingchi apüm ihrü khyang jüko. Hütsütapü mii, O Abüdongba ihrü Tsingrang, ihrünü ihrü münyi lanü ximüla Nüh künyangsoh yuje yanglang ronung mümüküp.

¹⁴ O Abüdongba, ihrü Tsingrang, Nühnü ihrü khingchinung rungnüm licho, ko hütsüta nguchicho, tunüo Nühnü lede athsalang du nguchire ko ihrünü Nüyu mühnyi.

¹⁵ “O Abüdongba ihrü Tsingrang, Nühnü Ijip lanü Nü müyurü nüchehcho khu Nü tase ngusohcho ade yingcheh lümkehre. Ihrünü amünyi shitpahko; ihrünü amüthsalang nguchiko.

¹⁶ Nühnü atsichola ihrü nyingtiko, hütsüeko adelü Jerusalem te zii tüchüro. Hi Nü yangdi ko Nü Amüsa khang lile. Ihrü münyi ko ihrü jümürü mütsachonü mükangmüshü yanglihtinü Jerusalem ko Nü müyurü mükhimüngure.

¹⁷ O Tsingrang, I dangkhidangnang ko Ihnü kihchicho nyijüng. Thsangnyang liba Nü Amübükuh külüpchijüng; atümungnü Nüh tsü Tsingrangbaepü müdhenung nengdang hütsü külüpchijüng.

¹⁸ O Tsingrang, ihrü te nyieng; ihrü chah dhing, ko Nü neng birü ihrü dhsangthsi ko yangdi chongcha tsü dhing. Ihrünü athsalang nguchicho ngang mah ta Nü yanglilüm khyanglang ihrünü Nüte kihchire.

¹⁹ Abüdongba, ihrü te nyieng; Abüdongba, ihrü mülang pehjüng. Abüdongba, ihrü te nyieng ko nguching! Atümungnü Nüh Tsingrangbaepü müdhenungthsa, tümünu. Hiba yangdi ko müyurü hiri Nüyo lile.”

Gabriel-nü Choyoh tsü Changnah Yocho

²⁰ Ihnü I münyi ko müyurü münyi nyengcho, ko Abüdongba te Abi Amüsa Amübükuh külüpchinung dangkhidangnangcho.

²¹ Ih dangkhidangnang yade, akhulang münguchehla nguba, Gabriel tsü I yacho yang mong jürocho. Hütsü anyüzehlang kangmübü jüba shikhe thsacho.

²² Abinü yocho, “Daniel, Ih hila nüte choyoh tsü nyichehsohnung rocho lile.

²³ Nühnü Tsingrangba te kihchinung dikehdenü Abinü lalingpehko. Abinü nüh müire, hütsünü nüte alalingba tsü yonung Ih rocho. Ade Ihnü müngucheh tsü changnah yode lasih jo nyieng.

²⁴ “Amünyi ko Amütsa lanü nührü müyurü ko nührü yangdi lehchehnung kang nyühre tsü dhünyehnü hipü, hütsü Tsingrangba akyahchocho shikhe lile. Müngucheh ko choyoh tsü tikehnung, ko Amüsa Amübükuh tsü müsacheh linung shulüm amünyi mülangpehjünung ko müchangkaba yuje tsü lisohnung.

²⁵ Hi müdheing ko nyichehng: Jerusalem külüpchinung Yuzeng jüba nyümong lanü Tsingrangba-nü throchehba langnübong ro chihde kang dhünyehpi dhünyeh khutsinung. Jerusalem tsü yanglong ko tbü khümkhümnü külüpchinung ko kang rohrepü anyüpi dhünyeh yanung, ta hütsü adhsangthsi shikhe thsanung.

²⁶ Ko hütsüba shikhe achangkala Tsingrangba-nü throchehcho langnüba tsü mülang mülipü kyüsehnung. Ko yangdi ko Amübükuh tsü rezeh yangthsarü rothsarünü thsangnyangjünung. Tsingrangba-nü rungnümcho khata ko achangba tsü achangka nyümong kihmülüm kyo ronung.

²⁷ Hütsüba yangthsaba tsünü kang dhünyeh nyitsarü adrong te azengchotaba adrengdreng linung, ko khode hütsüba bekhyah achangsho khu tsinang, abinü kangmübü ko amübüti changkasohnung. Athrünyinung adrünung tsü amübükuh amungthribala müdongnung ko hütsü Tsingrangba-nü rungnümcho achangbanü abi mümütohde linung.”