DANIEL 8 - AMÜSA BAIBEL (BSI)

Sanpung ko Miza khüdu Müngucheh

¹ Belshazar yangthsaba kang asangula, Ihnü müngucheh anyüuba ngucho.

² Müngucheh la Ih tsü Elam yanglih la tbünü tbüticho Susa yangdila li ngucho.

³ Ih tsü Ulai Yongkhi te yacho ko yongkhi shündhün sanpung khüdu ajüh athsengthseng anyüh, akhüu tsü athsengu ko asiu kehpü ngucho.

⁴ Ko Sanpung ajüh tsünü nyüzüdu, kihku ko kihjing langthring khichi ngucho. Tu kanglungrünü hütsü müyaticheh mahkhang abi tenü mütsiphucho. Abi athsanyücho thsa mülahchi zicho.

⁵ Hi tu adüzünang pü lümkücha yade, nyüzüdu langnü miza khüdu alih la ajing müjükehpü dsaya tsoh rocho. Anahtse anyüh kahla ajüh khüdu kehcho.

⁶ Abinü yongkhi te yaba Sanpung yanglang rocho ko abi chah khüdupinü tsohkehcho.

⁷ Abinü sanpung tsü khuhcho Ihnü dhingyacho. Arihlong chüro abinü ajüh anyüh tsü khuhsahjücho. Abi te khuhtanung Sanpung tsü tase mülicho. Abi alih la khuhtsu dhrümchicho, ko abi khümchonung hütsüla süsü mülicho.

⁸ Miza tsü arihlong alaa alaa chürocho, ta abi rihlong chürode apu jüh tsü thungsahcho. Hütsü mülih ajüh müyü chürocho, ajüh müipi tsü müdüm papa lahpi picho.

⁹ Hiri ajüh müyü yola khüdu chahnü ajüh azikyah khüdu chichehcho, ko abi tase tsü kihjinglang, nyüchürolang ko Anyengchocho Lih lang picho.

¹⁰ Ko hütsü ningchah Rothsarü mülung chii küducho, ko chenghi mülung khürülü alih la longsoh dhrümchicho.

¹¹ Abinü ningchah rothsarü anüchiba te mii tohtacho, ko abi khyang nyümong kangmübü jüba yatijücho, ko Amübükuh münyijücho.

¹² Nyümong mükhu kangmübü jünung mülih hütsüla müyurünü amünyi shitpahcho, ko yuje yudsi-yangthsa tsü alih la dhiyohchüpehcho. Ajüh tsü abinü nguchicho lüpchola akoh ngucho.

¹³ Hütsüde riwürü khüdunü khüdu te tsingdhingtacho Ihnü yuchicho, “Münguchehla nguba hi khütoi nyahli linung? Khütoi nyahli adrünung amünyinü kangmübü yati linung? Khütoi nyahli ningchah rothsarü mülung ko Amübükuh dhrümchi linung?”

¹⁴ Aparü riwürü khüdunü lalingcho Ihnü yuchicho, “Hi nyümong anyüzehlang ko anyangnyü hajar anyüh thsih asang kangmübü mühlinung. Hütsüpü Amübükuh thali thsachinung.”

Riwürü Gabriel-nü Müngucheh Changnah Yocho

¹⁵ Ihnü müngucheh tsü nyichehnung müküp lide, dhrongyengnü nyüh khüdu I bete yade,

¹⁶ Ulai yongkhilang tsünü yuva khüdunü dsi Ihnü yuchicho, “Gabriel, abinü nguba adüzü tsü changnah young.”

¹⁷ Hütsüde Gabriel ro I müshüm yacho, ko Ih adrüchonü alih la khülucho. Abinü Ite yocho, “Nyitsarü Tsurü, adüzü tsü nyichehng. Müngucheh tsü limih achangka nengdang lile.”

¹⁸ Abinü Ite chota yade, Ih alih la südo khülucho. Ta abinü I chah thahpücho, ko Ih khamüsu yasohcho.

¹⁹ Ko abinü yocho, “Ihnü nüte achangkala Tsingrangba rihlong chüroba nengdang yonung. Hiba müngucheh tsü achangka nyümong nengdang lile.

²⁰ “Nühnü nguba sanpung ajüh anyüh kehba adüzü Media ko Persia yanglihti nengdang lile.

²¹ Miza adüzü Greek yanglih ko anahtse anyüh kahla ajüh khüdu adüzü akhudiba yangthsaba.

²² Akhudiba ajüh khüdu thsangnyangde ajüh müyü chüroba adüzü, yanglih müyü chüronung ko hütsüba yanglih tsü changnahnung ko akhudiba yanglih kyo rezeh müthsanung.

²³ “Khode hütsüri yanglihti tsü changnung amünyethsa ronang, arüh khütang khürah kangnung ko arüh khingchinung, ko hütsüta ahongzi, akhürah ko kihyochüba yangthsarü khüdu chüronung.

²⁴ Abi dee rezeh kangnung, ta apu tasenü mah. Abinü adrünung achangba chürosohnung ko abi nguchi lüpchola akoh linung. Abinü rezeh nyitsarü ko Tsingrangba müyurü michah athsangnyang hironung.

²⁵ Abi tsü akhürah thsachonü, abinü kihyochüba langla akoh ngunung. Abinü apu jangjang müthsehnung ko dhrongyengnü nyitsarü adrong changsohnung. Abinü apüm yola yangthsaba adiu nyüm yanung, ta nyitsarü kheh müzehpü abi changjünung.

²⁶ Anyangnyü ko aromang kangmübü khüi nengdang nüte adüzü yocho hütsü tikehnung. Ta hütsü ade tüchochi, tunüo hütsü anyahlipü du tikehnung.”

²⁷ Ih anyahli longriyoh dhsangnang licho. Hütsüpü Ihnü shemüsu yangthsabanü nyümkehjücho nguchilang wücho, ta müngucheh tsünü Ih lümdhamasohcho ko hütsü nyichehnung mükohcho.