DANIEL 7 - AMÜSA BAIBEL (BSI)

Daniel-nü Müngucheh Changnah Yocho (7.1— 12. 13) Kangdi Müyü Müngucheh

¹ Babylon la Belshazar yangthsaba akhudiba kang, Ihnü romang khüdu melang khüdu ko müngucheh khüdu ngucho.

² Ihnü melang tsü thrah yohpücho, ko hütsü romang nguba tsü hi: Kihjü khüdu chah nyübongnü apümlangnü kihloh chüro fo yacho.

³ Ko kihjüla tsünü kanglungrü arangchücheh alang papa müyü chürocho.

⁴ Akhudiba tsü adhingnung kihkhünying, ta müdi kyo aqo kehcho. Ihnü dhingyade, aqo tsü longkhangcho. Kanglungrü tsü dhimüsucho ko nyitsarü kyo yasohcho. Hütsüpü nyitsarü lümlong hütsü khyang jücho.

⁵ Kanglungrü anyüuba tsü shühmü kyopü athsejingnü yacho. Abe la thringrü asang mükahyeh bicho, ko yuva khüdunü hütsüte yocho, “Shuh tsü nü kohcho tsung!”

⁶ Ihnü dhingyade, apa kangdi khüdu chürocho. Hütsü khünying kyocho, ta arung chah uza qo kyo aqo müyü keh ngucho, ko athah müyü kehcho. Ko tase tsü hütsü khyang jücho.

⁷ Ihnü dhingyade, kanglungrü amüyüu chürocho. Hütsü re azeh, adrünung ko anehnung khüdu licho. Aha idhse kyoba azi tsünü rehnah ko hütsü michah dhrümchicho. Kanglungrü apa mükyo, hilü ajüh dhüre kehcho.

⁸ Ihnü ajüh tsü dhingyade, hütsüri yola apa ajüh azikyah khüdu chürocho, ko hütsünü hütsüla kehba ajüh asang rehsah pehjücho. Hiba ajüh chah nyitsarü nahtse ko be kehcho ko hütsü dee kükhing licho.

Lede Liba Khüdu Münguchehcho

⁹ Ihnü dhingyade, yangthsarü pümjiti yohpücho. Ko lede liba nyüh khüdu tsü yangthsarü pümji yola khüdu chah pümcho. Ajengki tsü shurü kyo athru ko akuva tsü shunbüh amüdhseng kyocho. Abi pümji mihmüle ko khülujing lanü michang trucho ko hütsüla, miloh mülacheh yacho.

¹⁰ Hütsüla abi dikehnung nyitsarü hajar adrong licho, ko abi bete million adrong licho. Yukhaba bekhyah chihcho ko vakhati khangthrucho.

¹¹ Ihnü dhingyade, ajüh azikyah tsünü kükhing chocho Ihnü yuchicho. Ihnü dhingde, kanglungrü amüyüuba tsü kyüsehcho, ko afü tsü michang la dhiyohchü trüp-pehcho.

¹² Apa kanglungrüti chahnü arüh tase khyümüicho, ta arüh azachah du linung mülacho.

¹³ Hiba müngucheh la, Ihnü nyitsarü tsurü khüdu kyo ngucho. Abi tsü nyükhinü shütipü I yanglang chürocho.

¹⁴ Ko limih yanglihti, ahungti ko yuchotinü abi dikehsohnung, abi khyang tase, adhichi ko yangthsathsaba tase jücho. Abi tase lede linung ko abi yanglih khodesü müchangkanung.

Müngucheh Changnah Yocho

¹⁵ Ihnü nguba müngucheh tsünü Ih nehsohcho, ko dee longmüzicho.

¹⁶ Hütsüla yarü nyüh khüdu yanglang Ihnü küducho ko hütsü changnah yonung kihchicho. Ko abinü Ite adüzü tsü yocho.

¹⁷ Abinü yocho, “Hiri kanglungrü müyü adüzü limih la yanglih müyü chüronung.

¹⁸ Ko Akohba Tsingrangba müyurütinü yangthsanung tase ngunung ko lede nengdang yohpünung.”

¹⁹ Hütsüpü Ihnü kanglungrü amüyüuba khüi aparü tenü pa adrünung khüdu, ko imüyeng müzi ko idhse hanü aparü rehnah arüh dhrümchicho, hiba nengdang tsü alaa müdhenyücho.

²⁰ Ko adesü athah la ajüh dhüre ko akhanglang chüroba ajüh ko apa ajüh asang lohchehjüba nengdang tsü Ihnü müdhenyücho. Hütsüchah anahtse ko abe kehcho ko dee kükhing licho. Hütsü apa apüm tenü alaa adrünung licho.

²¹ Ihnü dhingyade, hütsüba jüh tsünü Tsingrangba müyurü te khatacho ko kohcho.

²² Hütsüpü lede liba khüdu tsü rocho ko Akohba Tsingrangba tsurüti khüm yukhacho sobhocho. Tsingrangba müyurütinü yanglih ngunung becho chihko.

²³ Ite adüzü yoba tsü hi: “Müyüuba kanglungrü tsü limih la aronung liba amüyüuba yanglih ko hütsü apa yanglihti tenü pathsa linung. Hütsünü limih apüm kohnung ko dhrümchinung.

²⁴ Ajüh dhüre tsü hütsüba yanglih la yangthsa thsanung yangthsarü dhüre linung. Hütsüpü apa yangthsaba khüdu chüronung; abi tsü akhurü tenü dee pathsa linung ko abinü yangthsarü asang tsü mahchehnung.

²⁵ Abinü Akohba Tsingrang nyüm chonung ko abi müyurüti sehchinung. Apunü arüh yang, yudsi yuzeng ko thsüti mülihchijünung müküpnung, ko Tsingrangba müyurü tsü abi pohki kang asangpü achangsho linung.

²⁶ Hütsüpü ninglangrü yukhaba linung, ko abi tase khyülijo, abi riri changjünung.

²⁷ Hütsüpü limih la yanglihti tase ko adi tsü Akohba Tsingrangba müyurü khyang jünung. Arüh yanglih tsü achangka mülinung ko limih yangthsarüti atümungnü arüh dikehnung ko arüh yu nyinung.”

²⁸ Yukheh tsü hi achangka. Ih drümüyangchonü Ih pha-a kangcho, ko Ihnü I lüm la du yohpücho.