DANIEL 2 - AMÜSA BAIBEL (BSI)

Nebukadnezar Melang

¹ Nebukadnezar yangthsacho kang anyüula, abinü melang khüdu melangcho. Hütsü khu abi lümtpanachonü müyüpsehchehcho,

² achotsü hütsü müchehnung amüchehrü, rahzikehrü, azi-amongrü, ko amongrü dsi rocho. Khode arühnü ro abi jingte yacho,

³ abinü arüh te yocho, “Ihnü melang khüdu melangko ko hütsünü Ih dee longmüzire. Hütsü tu adüzünang Ihnü müdhenyüre.”

⁴ Arühnü yangthsaba te Aramaik yula lalingcho, “O yangthsaba! Nüh kutsüp lieng. Ihrü te nü melang tsü young ko ihrünü hütsü changnah yonung.”

⁵ Yangthsabanü arüh te yocho, “Ihnü hi dhrongchehpehko, nührünü Ite I melang ko hütsü adüzü young. Nührünü müyochehkhang, Ihnü nührü zangzang khanahpehnung ko nührü kushirü thsangnyangjünung.

⁶ Ta nührünü Ite melang ko hütsü adüzü tsü yochehkhang, Ihnü nührü khyang jiyü ko adhichi jünung. Hütsüeko ade, I melang ko hütsü adüzü tsü tunang young.”

⁷ Arühnü adesü yangthsaba te laling yocho, “Nüh adibong dunüsü ihrü te melang tsü yokhang, ihrünü hütsü adüzü yonung.”

⁸ Hütsüde yangthsabanü yocho, “Hi Ihnü lümcho roh-i due! Nührünü Ite melang tsü müyokhang, Ihnü nührü atümung khingchinung müdhe,

⁹ nührünü bekhyah pehnung müküpre. Bekhyah mülihchide amülichi chüronung longdi nührünü Ite arahkheh chonung nührü yola yutrümko. Melang tsü young, khang nührünü adüzü tsüsü yochehnungepü Ihnü müdhenung.”

¹⁰ Arühnü lalingcho, “Yangthsabanü müdhenyüba tsü yochehnungthsa limih la süsü mühle. Khütoi dinye, mülahnye, tu yangthsarünü abi amüchehrü, rahzikehrü ko amongrü te hitarilü khodesü mütsingdhing.

¹¹ Yangthsaba khyang hütsü tsingrangrünü chah khu sünü mümishachehjünung, ko arüh nyitsarü yola mühle.”

¹² Hinü yangthsaba rihlong khütang chürosohcho ko abinü Babylon la asithsamüdherü atümung süsohnung yuzengjücho.

¹³ Hütsüta arüh atümung khyang Daniel ko ashangrüti mii zeh arüh süsohnung yuzengjücho.

Tsingrangba-nü Daniel te Melang Adüzü Yocho

¹⁴ Hütsüde Daniel-nü yangthsaba nyahrü anüchiba Ariok, sü khyang hütsüba müpsehba nguchinung nyümkehjücho, abi yanglang wücho. Abinü yu tsü dee müzah lümdhingpü,

¹⁵ Ariok te tuepü yangthsabanü yuzeng hiroh-i zii jünungthsa kangcho pü tsingdhingcho. Achotsü Ariok-nü Daniel te atikehcho tsü yocho.

¹⁶ Hütsüde Daniel-nü yangthsaba yanglang wünü abinü yangthsaba te melang adüzü tsü yochehnung nengdang bekhyah alaa chingkehcho.

¹⁷ Hütsüpü Daniel-nü kulang wüpü ashangrüti Hanania, Mishael ko Azaria-rü te atikehcho tsü yocho.

¹⁸ Abinü arüh te arühsü Babylon-rü asithsa müdherü yola müsünungthsa melang tsü mishajüngpü ning Tsingrang te kihchinung yocho.

¹⁹ Hütsü romang melang tsü münguchehla Daniel te mishacho. Achotsü abinü ning Tsingrang nengse yocho:

²⁰ “Tsingrangba neng achangka müli seing! Lümlong ko zii tsü Abi yo.

²¹ Abinü bekhyah ko tsingkang müyü mülihchijüre; Abinü yangthsarü külüpre ko jowüsohre; lümlong ko anyichehba Abinü jüre.

²² Abinü asoh ko rang licho mishajüre; abinü amarürah la rang licho müdhere, ko abi te avisa lile.

²³ Ihnü Nüh sere ko dhichire, I jümürü Tsingrang. Nühnü I khyang lümlong ko re jüko; Ihnü kihchicho Nühnü lalingko ko Nühnü ihrü te yangthsaba melang müdhesohko.”

Daniel-nü Melang ko Adüzü Yocho

²⁴ Achotsü Daniel-nü yangthsabanü asithsamüdherüti süsohba nguchinung nyümkehjüba Ariok yanglang wücho. Abinü abi te yocho, “Arüh tüsüsoh. Yangthsaba yanglang Ih nowüng, ko Ihnü abi te abi melang adüzü tsü yonung.”

²⁵ Hütsüde tsünü Ariok-nü yangthsaba Nebukadnezar yanglang Daniel nozüdu abi te yocho, “Nü melang adüzü yochehnungthsa Ihnü Jihudarü yangtsirü yolanü nyüh khüdu nguko.”

²⁶ Yangthsabanü (Belteshazar dsiba) Daniel te yocho, “Nühnü Ite I melang ko hütsü adüzü yochehnung do?”

²⁷ Daniel-nü lalingcho, “Yangthsaba, amongrü, rahzikehrü, amüchehrü mahkhang ninglihkhirü sünüsü hütsü nüte müyochehnung.

²⁸ Ta rang licho mishajüba, ning Tsingrang khüdu lile. Abinü atikehnung licho nüte yore. Nühnü melangba tsü Ihnü nüte yonung.

²⁹ “O yangthsaba, nüh yüpjo lide, nühnü aronung nengdang melangcho; ko rang licho mishajüba Tsingrang-nü nüte tu tikehnung liro hütsü ngusohcho.

³⁰ Ko hütsü aparü tenü Ih amüdheu thsachonü mah, ta nüh adibongnü nü melang adüzü müdhenung ko nü chah atikehnung liba tsü nyichehsohnung nengdang ade hiba rang liba tsü Ite mishako.

³¹ “O yangthsaba, nü münguchehla nü bete kyothri arangcheh khüdu, ahechi keh ko adrünung khüdu nühnü ngucho.

³² Athah tsü hon amüdhsengnü; adreng ko akheh tsü taripi; ami ko aphüm tsü imüyeng;

³³ ajing tsü idhse, ko ajingtpah tsü changsho idhse ko changsho lihshenü külüpcho.

³⁴ Nühnü hütsü dhingyade, sünüsü müthahpüpü lungrah lanü lung khüdu khülu jüro idhse ko lihshenü külüpba ajing tsü kengzangzangcho.

³⁵ Khüdupinü lishe, idhse, taripi imüyeng ko hon apüm tsü trümnah müyüde pungkhyangla mayü kyo asongsong kangcho. Ko nyübongnü tusü münying fükhang tsicho. Ta lung tsü azong kangcho ko limih jengcho.

³⁶ “Melang tsü hütsü licho. Ade Ihnü nüh adibong te hütsü adüzü yonung.

³⁷ O yangthsaba, yangthsarü apüm michah nüh adiuba. Ning Tsingrang-nü nüh yangthsarü kangsoh zii, tase ko adhichi jüko.

³⁸ Abinü nüh limih müyurü, kanglungrü ko uzati apüm michah yangthsaba kangsohcho. Hon athah tsü nüh lile.

³⁹ Nü khanglang, nü yanglih tenü azau yanglih khüdu chüronung, ko asanguba imüyeng yanglih khüdunü limih apüm michah yangthsa thsanung.

⁴⁰ Hütsü khanglang lüpcho thsangnyangjüba idhse kyo amüyüuba yanglih khüdu chüronung. Ko idhsenü lüpcho thsangnyangjücho kyo, hiba yanglih tsünü apa yanglihti apüm changjünung.

⁴¹ Adesü nühnü ajing ko amüyungzati changsho idhse ko changsho lihshenü külüpcho nguko. Hütsü adüzü achangnahcho yanglih thsanung. Hütsü idhse roh-i tase linung, tunüo idhse lishe la yohrütacho licho.

⁴² Müyungzati changsho idhse ko changsho lishe adüzü yanglih changsho rezeh linung ko changsho re müzehnung.

⁴³ Nühnü adesü idhse tsü lishe la yohrütapü ngucho. Hütsü adüzü yanglih yangthsarütinü xengyangpicho khu arüh kukhiti yohrütanung müküpnung, ta idhse lishe te müyohrütachehcho kyo arüh müyohrütachehnung.

⁴⁴ Hütsüri yangthsarü bekhyah ning Tsingrang-nü khodesü müchangkaba yanglih khüdu külüpnung. Hütsü aparünü khodesü mükohnung, ko hütsünü apa yanglihti apüm changjüpü

⁴⁵ lungrah lanü lung khüdu khülu jüro idhse, imüyeng, lishe, taripi ko hon-nü külüpcho kyothri khüta müpnahcho nühnü ngucho. Arangcheh Tsingrang-nü nüh adibong te aronungla tu tikehnung hütsü yoko. Nühnü tu melangcho ko hütsü adüzü Ihnü nüte yoko.”

Yangthsabanü Daniel Jiyücho

⁴⁶ Hütsüde yangthsaba Nebukadnezar-nü alih la mükhukeh Daniel khyang kangmübü ko amübü jünung yuzengjücho.

⁴⁷ Yangthsabanü yocho, “Nü Tsingrang tsü tsingrangti apüm tenü adiuba ko yangthsarüti michah Abüdongba, ko rang liba mishajübong lile. Hi nühnü rang licho mishacho khu Ihnü müdhere.”

⁴⁸ Hütsüpü abinü Daniel amichahba jingkihla yohpo, Jiyü adrong jo, Babylon yanglih la yangthsarü kangsoh ko Babylon la asithsa müdherü atümung michah athah kangsohcho.

⁴⁹ Daniel-nü yangthsaba te kihchi Shadrak, Meshak ko Abednego Babylon yanglih michah ayingthsarü kangsohcho, ta Daniel-lü yangthsaba kuh la licho.