DANIEL 10 - AMÜSA BAIBEL (BSI)

Tigris Yongkhi te Daniel Müngucheh

¹ Persia la Cyrus yangthsaba kang asangula, Belteshazar dsiba Daniel te yu khüdu mishacho. Yu tsü yuje ta anyichehnung dira thsahcho. Hütsü abi te münguchehla changnah yocho.

² Hütsütade, Ih nyükhih asang meshü licho.

³ Nyükhih asang tsü mükhude Ihnü tsuyongba atsa mahkhang shuh mütsucho, yongkha müyongcho, mahkhang I thah müsühcho.

⁴ Kang la akhudiba choo nyümong mükyüpü müyüuba nyümong, Ih Tigris Yongkhi bekhümla yacho.

⁵ Ihnü tsungmüsu dhingde nyüh khüdu shü anana müpipü ko hon kihrüm rümpü ngucho.

⁶ Afü tsü beryl lung kyo ariri licho. Ko aromih tsü ningmüla kyo avisa ko anah tsü michang kyo trucho. Ajingkhehrü ariri imüyeng kyo, ko abi yuva sühdi khongcho kyo licho.

⁷ Müngucheh tsü Ihnü du ngucho. Ite yarü sünüsü müngucho, ta arüh drümüyang rang tsicho.

⁸ Hütsüla I müleng anyemüyang müngucheh tsü nyekaseh dhingyacho. Ih re müzehpehcho, ko I tsah romih thsangnyangchonü sünüsü Ih müdhingchehcho.

⁹ Ihnü abi yuva yuchide, Ih hütsüla khülu I romih alih la hapkeh thsürang sütücho.

¹⁰ Hütsüde kheh khüdunü ro I chah thahpücho; ko Ih khamüsu I jingkhehrü dhridhri yasohcho.

¹¹ Riwürü tsünü Ite yocho, “Daniel, Tsingrangba-nü nüh müire. Shemüsung ko Ihnü choba yu hi lasih jo nyieng. Ih nü yanglang müthehcho lile.” Abinü hütsüta yode, Ih shemüsu dhridhri yacho.

¹² Hütsüde Abinü yocho, “Daniel, tüdrü. Nühnü nyichehnung nengdang nüh longlüm kangnung dhrongchehba nyümongnü Tsingrangba-nü nü kihchicho lalingko. Nü dangkhidangnang laling Ih rocho lile.

¹³ Persia yanglih la yangthsabanü Ih nyümong mükyüpü-kheh yaticho. Hütsüde riwürü yola aying khüdu Maikael-nü ro Ih trocho, tunüo hütsüla I müleng Persia la pehjücho.

¹⁴ Aronungla nü müyurü chah tu tikehnung hütsü nüte müdhesohnung Ih rocho. Ko aronung nengdang müngucheh tsü hi lile.”

¹⁵ Abinü hi yode, Ih alih la yu müchochehpü nyeh-ee dhing yacho.

¹⁶ Hütsüde adhingnung nyitsarü kyoba riwürü tsünü akheh müyungchü I beküp chah thahpücho. Ihnü abi te yocho, “Abüdongba, hiba müngucheh khu Ih tase müzehsoh dhridhridure.

¹⁷ Ih ayurü khüdu abüdongrü bete yacho kyo lile. Ihnü khüta Nüte chotanung? I chah tase ko sah thümko.”

¹⁸ Anyüpiu Abinü I chah thahpücho ko rezehsohcho.

¹⁹ Abinü yocho, “Tsingrangba-nü nüh müire, hütsüeko tunüsü nü lümtütpanasoh mahkhang tüdrüsoh.” Abinü hi yode, Ih alaa rezeh müdhe Ihnü yocho, “Abüdongba, Nüh ayonung tu liro young. Nühnü Ih atsau kangsohko.”

²⁰ Abinü yocho, “Tuepü Ih nü yanglang rocho nühnü mümüdheo? Nüte Yuje Vakha la zehba mishanung Ih rocho.

²¹ Ade Ih thali wünung ko Persia nyahba riwürü te khatanung. Hütsü khanglang Greek nyahba riwürü chüronung. Israelrü nyahba riwürü Maikal chah khu Ih tronungthsa süsü mühle.