CHOYOH 7 - AMÜSA BAIBEL (BSI)

¹ Itso, Iyu nyieng ko I yuzeng yohpüng.

² Ihnü yocho nguching ko nüh tsa linung. Nü nahtse nengdang müzahcho kyo I yuzeng yohpünung müküpm.

³ Ihnü docho lede lümkehng; nü lasih la thrahkeng.

⁴ Lümlong tsü nü nilarü kyo ko asithsa tsü nü shangrü khung kyo bichieng.

⁵ Hütsünü khingkurü amütsa chahnü ko abükyü münyehchi yu lanü nüh khümchonung.

Mabomashi Khingkurü

⁶ Nyümong khüdu Ihnü kuh nyübongkhi lanü dhingchahchücho,

⁷ ko dhrezarü adrong yola pathsa amüpisa dhrezarü khüdu ngucho.

⁸ Ananglang khingkurü khüdu liba amünyeh,

⁹ amalang, nahnü müngude abi hütsü kuh lahkhu tsiyacho.

¹⁰ Ko dhing, abükyü tsü nahtranaxenglarü jengki khyüpü ro abi shirünung chürocho.

¹¹ Abükyü tsü müci amülah ko ashahmükeh, lede lang tung du rachi,

¹² khüpi yanglongla khüpi shithsachah ananglang ying rachicho.

¹³ Dhrezaba tsü khyaripü be müthsüpcho ko dhingkehnü yocho,

¹⁴ “Chünye Ih amübü jüchoe ko hütsülanü hirocho shuh lile.

¹⁵ Hütsünü nüh yangchi rochoe. Nüh shirünyü yangchicho ade nguko.

¹⁶ Ijip lih lanü hirocho shü anananü I chongnong khyang yohpüle.

¹⁷ Hütsüla Ihnü aloes ko shingsheng axümlichi xahkehko.

¹⁸ Rung, Ihjü müyüp müitanung. Wüptanü Ihjü künyangtanung.

¹⁹ I nii kuh la mühle. Abi ashulang shitseh tsiko.

²⁰ Abi thsi kükyo hipü tsiko ko anyü mülihpü du ronung.”

²¹ Hütsüta abi müshülicho ko yu anyiyah tsü abinü nyicho.

²² Khütang dhsüdhsanü misüpung amüpsehnung hitsi yacho ko zeng yang khakhu thranung mütsüp-pü shümüshü khyachi wücho kyo.

²³ Abi akang dhsürü lilepü mümüdhepü uza kyo abükyü yola wücho.

²⁴ I tsurüti, ade Iyu nyieng. Ihnü yocho tüpehjü.

²⁵ Hitari khingkurü khyang tükichosoh; hitari yang tüwü.

²⁶ Abükyünü nyitsarü adrong akang thsangnyangjüko ko mükhilong süsohko.

²⁷ Abükyü kuh yang wükhang nüh asürü lih yang würe. Hütsü asülang alahtsah lile.