CHOYOH 6 - AMÜSA BAIBEL (BSI)

Apa Amüzahnung

¹ Itso, aparü thsite sahnung nühnü teechocho do?

² Nü yula ko nüpu nyengchochola nüh xohcho do?

³ Hütsükhang, Itso, nüh hütsüba nyitsarü pohki lile, ta hütsülanü tsichehnung hi lile. Abi yang shang ko nüh lehchehnung kihchieng.

⁴ Nüh tüyüpseh, mahkhang akyahshang mii tükyashang.

⁵ Uza kyo jingmünyüp lanü tsieng mahkhang shümüshü kyo shu-iirü tenü tsichehng.

⁶ O ayungsüh nyitsarü, tsangsüh chahnü wü nyichoung.

⁷ Arüh langnürü azirü mahkhang yangthsarü mühle,

⁸ ta tsingkang nengdang arühnü müyüde tsuyongnung khyübülungre.

⁹ O ayungsüh nyitsarü, nührü khütoi nyahli yüpnung? Nührü khode suronung?

¹⁰ Azachah ngakehde, azachah yüpsehde ko azachah hongkoh müthsüpü yade

¹¹ ailümnü aführü roh-i ro nührü betinung.

¹² Akhyüchah müliba ko amütsa nyitsarünü arahkheh cho rachire.

¹³ Arühnü nah makehjüta nührü kihyochünung rah külüpre;

¹⁴ mütozah apümlang adhsangthsi jo arüh lasih akurengla amütsa du chungre.

¹⁵ Hütsünü arüh chah athsangnyang mümüdhepü tikehnung ko mükyangnungthsa arüh lerohpehnung.

^16-19 Abüdongba-nü thrünyiba ko mürangchoba nguchi dhünyeh lile: Amüthseh, arahkheh müle, achomükeh nyitsarü müpsehba kheh, amütsa lümchung lümba lasih, amünyi nguchinung shangba jing, arahkheh mütozah cho yuzithsaba, ko shangrü yola athsangnyang chürosohba.

Nahtrahnaxeng Nengdang Amüzahnung

²⁰ Itso, nüu nü yocho nguching ko nü tpanü docho khodesü tünbüchü.

²¹ Arüh yu lede yohpüng ko nü lasih la tahkeing.

²² Nü lang tsehde hütsünü nüh nünung; nüh yüpjode hütsünü nüh nyahnung; ko nüh surode hütsünü nüte chotanung.

²³ Arühnü thülaba tsü avisa dsi; arühnü khataba tsü akang lang lile.

²⁴ Hütsünü amütsa khingkurü ko bürü nitpürünü münyehchiba lanü tsiphu lisohnung.

²⁵ Arüh tsah tsachonü nüh tüthsadsüsoh; arüh nah makehjübanü nüh tüxohsoh.

²⁶ Hümdhse tpah-o amiinü mabomashilarü ngunung kohle; ta nahtrahnaxengchonü alicho apüm müzangkhangnung.

²⁷ Shü mütahsohpü nü dreng chah michang hinung kohnung do?

²⁸ Nü jing mütahsohpü michüh chah tsehnung kohnung do?

²⁹ Hütsüta bürü nitpürü te yüpnung tsü dhsürü lile. Sünü hütsüta nguchinang mükhingchipü mülinung.

³⁰ Yangsehde fühcholü nyitsarünü mümüthsamünyüre;

³¹ ta khode rangchehnang, dhünyehpinü alaa sahsohre ko alicho apüm khyüjüre.

³² Ta sünü nahtrahnaxengro abi athoh müzeh. Abinü abürü akang du thsangnyangre.

³³ Abi ashah khyüsohnung ko kengsehnung; abi lede mükhiyohnung.

³⁴ Anii khüdu tsü nahmohde alaa zichürore ko abinü mürüyangpü müpehjünung.

³⁵ Abinü thsitsu tu mükhyünung: jiyü tunüsü abi mükihchochehnung.