CHOYOH 5 - AMÜSA BAIBEL (BSI)

Nahtrahnaxeng Nengdang Amüzahnung

¹ Itso, I lümlong ko Iyu lasih jo nyieng.

² Hütsüde khüta linung nühnü müdhenung ko nü yunü lümlong lirü nyitsarüepü ngusohnung.

³ Mabomashi khingkurü be tsü thsakukih roh-i anyiyah ko abükyü khiyu tsü olive tuji roh-i anana,

⁴ ta achangkala abükyü tsü akha ko tohdhsa du hirojüre.

⁵ Abükyünü asülihlang nüh nünung; abükyü tsehba lang tsü asülih yang nüre.

⁶ Abükyünü akang langla mütsehre; ko tu tikehrünang mümüdhe.

⁷ Ade, I tsurüti, Iyu nyieng ko Ihnü tu yoro khodesü tünbüchü.

⁸ Hitari khingkurü te tümükhong! Abükyü amünyethsa mii tüwü!

⁹ Mahkhang nü nengse tsü aparünü khyünung ko achomang mükehrü kheh la alongde nüh sünung.

¹⁰ Yangpirünü nü kuthsi apüm khyünung ko nü nguchichehcho aparü yo kangnung.

¹¹ Nüfüla suhre thümpehpü asü chongnong chah nüh rühchi yüp-pehnung.

¹² Ko nühnü yonung, “Tuepü Ihnü ayocho münyicho? Tuepü thsingyude münyicho?

¹³ Athsingyurü yu Ihnü münyiko. Arüh thülacho Ihnü nyipehko.

¹⁴ Ko dhrongyengnü yang michah Ih ashah kyopehko.”

¹⁵ Nü nitpü te yuje choung ko abükyü du müing.

¹⁶ Aparünü nümüsucho tsurünü nü khyang atsa tu mühirojünung.

¹⁷ Nyühmürü tsurü mah, ta nüh dikehsohnung nüpu tsurüti nümüsung.

¹⁸ Hütsüeko nü dhrezade khyüba lazatpü,

¹⁹ atsah atsa ko amüinung keh shümüshü kyo abükyü te du longphi künyangtaang. Abükyü amüinü akang ayung nengdang nüh mürüpsohng.

²⁰ Itso, tuepü aparü te müitaro? Tuepü bürü nitpürü mükhyahro?

²¹ Abüdongba-nü nü nguchi lüpcho ngure ko nü wücho apümlang Abinü dhingyehre.

²² Amütsarü münyi tsü uzathsa ko apu münyila apu xohre.

²³ Abürü mürahsehchonü süre ko müsihthsachonü changre.