CHOYOH 31 - AMÜSA BAIBEL (BSI)

Yangthsarü te Athsüchi Yu

¹ Hiri hi yangthsarü Lemuel te atpanü docho yu:

² “Nüh Ihnü müiba tsurü, I dangkhidangnang lalingchoba. Ihnü nüte tu yonung?

³ Khingkurü chah nü re apüm tüpeh ko nü thsi apüm tümüzang, hütsünü yangthsarü adrong thsangnyangsohko.

⁴ Nyieng, Lemuel, yangthsarünü yongkha tüyong mahkhang amüchaba tüyangchi.

⁵ Khode arühnü yongnang, yuzeng nbüchüre ko achongcharü alanglang mükhichire.

⁶ Amüchaba tsü sünungthsarü ko lümtohrü nengdang.

⁷ Arüh yongsohng ko arüh chongchacho ko lümtohcho nbüchüsohnung.

⁸ “Arühbürü nengdang müchochehrü shulüm chojüng. Atrorü müliba tsungtieng.

⁹ Arüh nengdang chojüng ko yuje yukharü thsaang. Ailümrü ko chongcharü alanglang tsungtieng.”

Adekheng Nitpü

¹⁰ Adekheng nitpü ngunung tsü khüta athsah! Abükyü thsidilung tenü awüba!

¹¹ Aniinü abükyü chah longlangre, ko abi khodesü müilümnung.

¹² Akangli ayung abi nengdang atsa du nguchire ko khodesü müdhsakehjüre.

¹³ Abükyünü shü alangchi ko anana müpahnü kyahre.

¹⁴ Abükyünü tsuyongnung ashulanü shithsabhüleh kihkuhnü roh-i hirore.

¹⁵ Abükyünü mütoh suronü chongkyare ko kulilarü te nguchinung thongure.

¹⁶ Abükyünü alih yangchi lihre ko abükyünü shehcho thsinü shükusih khyümre.

¹⁷ Abükyü tsü amüküp, tase azeh ko anguchinyü.

¹⁸ Abükyünü külüpcho apüm amii abükyünü müdhele, ko yürüp nguchire.

¹⁹ Abükyü jangjang she yere ko abükyü shü kyahre.

²⁰ Abükyünü ailümrü ko achongcharü müire.

²¹ Abükyünü müdhrang longnye mülümxüre, tunüo akukhi la shü alangchi lile.

²² Abükyünü yüpji khyangba külüpre ko anyahrüm shü anana müpire.

²³ Anii tsü atümungnü müdheba, surokhung yola aying.

²⁴ Abükyünü shü ko rungrüm kyahre, ko shithsabhülehrü te ire.

²⁵ Abükyü tsü tase azeh ko atümungnü jengreng jüba ko aronung nengdang mülümxüre.

²⁶ Abükyünü aküna lümlongnü chotare.

²⁷ Abükyü müpah du lire ko kukhi dhsütah apüm dhingre.

²⁸ Abükyü tsurütinü akünyang ngusohre ko aniinü nengse jüre.

²⁹ Abinü yore: “Nitpürü atsa khingkurü adrong lile, ta atümung tenü nüh atsau.”

³⁰ Adhingnyünung tsü kihyochüba ko atsah atsa tsü changpehnung, ta khingkurü sünü Abüdongba yocho nyiro abükyü senung.

³¹ Abükyünü nguchicho apüm nengdang nengse jüng. Atümungnü jengreng jünung adekheng.