CHOYOH 30 - AMÜSA BAIBEL (BSI)

Agur Yu

¹ Hiri hi Jakeh tsurü Agur yu lile: “Tsingrangba Ite mühle, Tsingrangba Ite mühle, ko I trorü mühle.

² Ih kanglungrü du kyole; Nyitsarü lümlong I chah müzeh.

³ Lümlong tsü Ihnü khodesü münyicho, ko Tsingrangba nengdang tusü mümüdhe.

⁴ Ninglangrü lümlong sünü müdhekhangcho? Sünü nyübong rangdhingcho? Mahkhang sünü shü la kih tümdhingcho? Mahkhang alimih lurü rühsahcho? Nühnü müdhekhang abi süo? Abi tsurü süo?

⁵ “Tsingrangba-nü anyengchocho apüm yohpüre. Abi khyang tsungtisohnung yangchirü atümung nengdang Abi tsü tsung.

⁶ Nühnü Abinü müchocho khüdu chokopü rikhang, Abinü nüh yübünung ko nüh tsü arahkheh chorepü ngusohnung.”

Choyoh Yu Mütozah

⁷ Ihnü kihchire, Tsingrangba, Ih müsüde lang anyüh I khyang jüng;

⁸ Ih arahkheh lanü za lisohng, ko Ih alirü mahkhang ailümrüsü tükangsoh. I tsuxah dükeh du I khyang jüng.

⁹ Ih alaa likhang, Nüh müdhsütah pü Ihnü yonung. Ta Ih iilümkhang, Ih fühnung ko I Tsingrang khyang ashah hirojünung.

¹⁰ Khodesü Abüdongba te akuliba nyüm tüyo. Nüh chokehcholanung ko chongchanung.

¹¹ Nyitsarü khürünü au chokehcholare ko atpa neng müsere.

¹² Khürünü athrünyinung khüdu lipü müsarü roh-i lümre.

¹³ Khürünü khütang atsa roh-i lümre, khüta atsau pü arühnü lümre.

¹⁴ Khürünü ailüm dhsangthsirü chahnü ajingcho khyüre; hütsüta arüh akang lire.

¹⁵ Aveh tsü aza anyüh lile ko anyüh neng tsü “I khyang khülo!” Khodesü long münyüpba lang müyü lile:

¹⁶ Asürü limih, azarü müliba khingkurü, tsing dhsütahba alih akung, ko mümüpmehchehba michang.

¹⁷ Sünü au münyüjünang mahkhang atpa ashilang mükhimüngunang abi müdinü tsunung mahkhang rangmü khüyahlanü anahtse mükyücheh pehjünung.

¹⁸ I nengdang nyichehnung khütang athsah anyemüyangnung lang müyü lile.

¹⁹ Ningwümla mongba müdi lang, lung chah chichiba mürü, kihdi la kihkuhnü lang ngu tsiba, ko adhrerü khingkurü müitaba.

²⁰ Yujemücho nitpürünü hita nguchire: Nahtrahnaxengpü mütsahpehnung ko “Ihnü tu amütsa münguchi” pü yore.

²¹ Alimihnü mürangchoba lang müyü lile:

²² Ayurünü yangthsarü kangcho, adohrü atsunyücho lüpcho licho,

²³ athrünyinung khingkurü xengcho, ko kulilarünü abüdongtpü iichehcho.

²⁴ Limih la kanglungrü anümnüm müyü lile, ta khütang athsehdhsa:

²⁵ Tsangsüh: arüh sumüzeh, ta arühnü müyüde tsuyongnung khyübülung zahkehre.

²⁶ Dhingtsü: arühsü tase müzeh, ta arühnü lungdhong la arüh kuh külüpre.

²⁷ Khengqu: arüh yangthsaba mühle, ta arühnü achungnü tsehre.

²⁸ Lekyangkyang: abi nü müyola binung kohre, ta arüh yangthsarü kuh la du ngure.

²⁹ Adhingnung jengreng keh tsehba akang müyü lile:

³⁰ Kihkhünying, kanglungrü apüm tenü tase azehba ko tusü müdrüre;

³¹ Miza, hünapung mütrahcho, ko mono bekhu yangthsarü tsehcho.

³² Amüsithsarü kyo hongzinü amünyi lümchungkhang zahng ko lümdhing!

³³ Nühnü nyikih xükhang, asu chürore. Nühnü bürü nabong la shingkhang, ashüh shore. Nühnü zichürosohkhang, adhsangthsi la züdure.