CHOYOH 29 - AMÜSA BAIBEL (BSI)

¹ Mülichijü müipi hongzikhang, müsurochehnungthsa nyümong khüdu nüh ngahsehnung.

² Amüsarü yangthsade mono atümung künyangre; ta amütsarünü yangthsade mono atümung rühchire.

³ Sünü lümlong müinang, au künyangre; nahtrahnaxeng la kuthsi müzangba tsü amüsithsa.

⁴ Yangthsarünü khode yuje tsü müinang, alimih drengdrengre, ta khode abinü thsi nengdang du lümnang, alimih thsangnyangre.

⁵ Sünü kurümrü arahkheh neng sero, apu jangjang zengthsare.

⁶ Amünyi nyitsarü arüh münyila xohre, ta Amüsarü khithsa künyangre.

⁷ Amüsarünü ailümrü alanglang müdhere, ta amütsarünü hütsü münyicheh.

⁸ Müthsamünyürünü yangdi khüdu mihmüle la dhiyohchüre, ta lümlong lirünü tbachijüre.

⁹ Amüdherünü adohrü te lengtakhang, adohrü tsü zichürore, münyüre ko müchümükehre.

¹⁰ Shüh yongrünü yuje chorü thrünyire, ko abi akang yangchire.

¹¹ Amüsithsa nyitsarünü misha zichürore, ta anyichehrünü rangcho nyümlire.

¹² Yangthsarünü arahkheh yu nyikhang, abi dikehrü atümung yuje mücho kangre.

¹³ Ailümrü ko arüh khingchirü müjang shirütare; Abüdongba-nü anyüding khyang nahtse jüre.

¹⁴ Yangthsarü sünü ailümrü te phülari yukharo, abinü anyahli yangthsare.

¹⁵ Mülichijüba ko rahsehba tsü azarü nengdang atsa. Ta azarü khüdu tsü müdhingpü pehjükhang atpa khyang ashah hirojüre.

¹⁶ Amünyi nyitsarü yangthsade, amünyi zikehre; ta Amüsarünü arüh khülusohcho ngunung.

¹⁷ Nü tsurü rahsehng ko nüh künyang linung. Abinü ashah mühirojünung.

¹⁸ Tsingrangba khyang münüsohba yucho tsü yuzeng müliba yucho lile. Sünü Tsingrangba yuzeng nyiro abi akünyangnung.

¹⁹ Kulirü tsü yu dunü rahsehnung mükoh, tunüo abinü yuchinye lasih müjünung.

²⁰ Mülümdhingpü chorü tenü amongdongrü chah alongdi aliba.

²¹ Sünü kulirü khyang azadenü akhyünyücho apüm jünang nyümong khüdulü abinü nü licho apüm khyüjünung.

²² Zii thsüthsahrünü yubejarong ko adhsangthsi adrong hirore.

²³ Müthsehmülanü nyüh khüdu jowüsohre, ta alonglümnü nengse hirojüre.

²⁴ Aführü te trümtaba tsü apu akang thrünyire. Yu khacho abinü khohchehde abi khingchinung, ko hütsü müyokhang Tsingrangba-nü abi chokehcholanung.

²⁵ Nyitsarü drüba tsü zeng khyangpüre, ta Abüdongba chah longlangba tsü abi khümcho lile.

²⁶ Yangthsarünü trosohnung adrongnü yangchire, ta yuje tsü Abüdongba chahnü du ngure.

²⁷ Amüsanü amütsa thrünyire, ko amütsanü amüsa thrünyire.