CHOYOH 27 - AMÜSA BAIBEL (BSI)

¹ Atu nengdang tümüthseh, tunüo nyümong tsünü tu hirojünung mümüdhe.

² Aparü khyang nüh sesohng; khodesü abürü jangjang tüse.

³ Amütsarünü hiroba adhsangthsi tsü lung ko lihpi amüling tenü awüu.

⁴ Rihlong tsü akhürah ko athsangnyang, ta nahmoh te kihtanung mükoh.

⁵ Aranglangnü müicho tenü mishanü mülichijücho atsau.

⁶ Thsakehjünye shangrü chahlü longlangre; ta arorühnü nüh khyahride müzahng.

⁷ Mijeng lidelü thsakukih mii mütsunyüre, ta yangdelü akha mii anyiyah kangre.

⁸ Kuh lanü za liba nyitsarü tsü asüp pehjüpü rachiba uza kyole.

⁹ Tuji ko axümlichinü lasih künyangsohre, ta adhsangthsinü akünyang shühnyangsohre.

¹⁰ Nü shangrü thsanye, nüu shangrü thsanye tünbüchü. Nüh dhsangthside nü jünirü tüyangchi; nü kurümrünü ashula liba nü jünirü tenü awüba tronung.

¹¹ Lümlong lieng, Itso, ko Ih künyangnung; I nyümrü te lalingnung Iyu linung.

¹² Amüzahrünü dhsürü rocho ngupü müripehre, ta khoto nyitsarünü ningtoh wü dhsükehre ko akhanglang wahre.

¹³ Adohrü sünü nyühmürü thsite nengdang ajüyeh jünang abi kuthsi hütsüba thsite ngang khyüjünung athsalang.

¹⁴ Sünü mütoh suropü züdenü akurümba te salüm yonang, hütsü müchümükehrü roh-i lile.

¹⁵ Jüjünyangnyang khingkurü tsü shodu shoba tsing kyole.

¹⁶ Hütsü zahsohnung tsü nyübong yaticho ko akheh la tuji kii bicho kyole.

¹⁷ Idhsenü idhse zacho kyo, nyitsarünü nyitsarü chahnü nyichore.

¹⁸ Sünü ngurüsih xükümro abinü asih tsunung, ko sünü abi michah lirü xükümro abi nengse ngunung.

¹⁹ Kih la tsah tehmüla ngucho roh-i, lasihnü nüpu ngusohre.

²⁰ Asülihnü khodesü mülongnyüpcho roh-i nyitsarü nahtse khodesü müjengre.

²¹ Hon ko taripi michangnü tahdhingre; hütsüta nengsenü nyitsarü tüzüdhingre.

²² Adohrü tsü nühnü sotsi lahnye, abi dohcho tsü nühnü xüpchehpehnung mükoh.

²³ Nüyo san ko misü longi xüküm,

²⁴ tunüo kuthsi tsü lede nengdang mah, ko yanglih tsü shangnü shang müyare.

²⁵ Nühnü madong tsü xabülung ko madong anu chichide azonglang tsünü za xabülung.

²⁶ Nü san nbüh lanü shü kyahng ko nü miza khürü icho lanü alih linung.

²⁷ Anyingcho mizati chahnü nüh ko nü kukhi ko nü kulilarü nengdang nyikih ngunung.