CHOYOH 25 - AMÜSA BAIBEL (BSI)

Solomon Choyoh Yu

¹ Hiri hi Solomon choyoh yu, Juda yangthsaba Hezekia yola athrahrütinü thrahyohcho lile.

² Tsingrangba ahechi tsü nguchi khüdu rangpüchehba; ta yangthsarü adhichi tsü hütsü yangchichehba.

³ Ning thsengcho ko kihjü sohcho kyo, yangthsarü lümcho tsü Ihsa tenü asoh-uba.

⁴ Taripi lanü iichüh tsü tahpehng ko akengba tsünü atsah atsa külüpchehnung.

⁵ Amütsarü tsü yangthsaba tenü iipehng, ko abi yanglih yuje la zinung.

⁶ Yangthsarü bete yade abi kihchonung, mahkhang nüh tsü adhsütah nyitsarüepü ngusohnung tümüküp.

⁷ Tunüo nütenü adiuba khyang nü pümji jüsohnung tenü, pümji adiubala küro pümpü nüte yoba tsü atsau.

⁸ Nühnü ngucho züzahnü yukhachah hi tüwü. Akhanglang aparünü nüyu tsü arahkheh kangsoh yuzi jükhang, nühnü tu nguchinung?

⁹ Nü kurümrü te khiyu likhang nühjübünyü tsidsapehng, ko hütsü tümisha.

¹⁰ Mahkhang nühnü arangyu müyohpürepü atümungnü müdhenung ko hiba arah tsü müchangnung.

¹¹ Yu phishuta chochehba tsü hon-nü mükingcho taripi la yoh külüpcho kyole.

¹² Yocho nyirü te lümjingrünü müzahnung yoba yu tsü hon müshi mahkhang amüluchehcho hon-nü külüpcho kohro tenü awüu.

¹³ Maxa bekhyah kih arüh kyo, longlangchehba riwürü tsü abi riwüsohba nengdang atbachi lile.

¹⁴ Abi kohro khodesü bürü khyang müjüba nyitsarü tsü, tsing müzehba nyükhi ko nyübong kyole.

¹⁵ Rangcho kihchiba tsünü ayatiba adiuba tsüsü kohchehre ko yangthsarü mii kichore.

¹⁶ Khodesü thsakukih alaa tütsu, alaa tsukhang mülünung.

¹⁷ Kurümrü kulang alaa tüwü; abinü müthohnung ko nüh thrünyipehnung.

¹⁸ Arahkheh yuzi tsü nohsheng singdümpi mahkhang tbüdeng kyole.

¹⁹ Dhsürüla yuje müchorüchah longlangba tsü aha lülohrü yangtsucho mahkhang jingjahrü tsehcho kyole.

²⁰ Lasih dhsa lirü te khithsa yoba tsü athsahde shü khohpehcho mahkhang madhsa la mih yohjücho kyole.

²¹ Nü rorüh yangkhang yangtüpm, abi xokhang kih tieng.

²² Abinü shah lümchehnung, ko Abüdongba-nü nüh müwajünung.

²³ Kihku lang nyübongnü tsing forocho kyo tsupohyupohnü zichürosohre.

²⁴ Ajüjünyangnyang khingkurü te linung tenü drexang chah linung atsau.

²⁵ Limih ashulanü yusi atsa yuchiba tsü xosehde kirüh yongcho kyole.

²⁶ Amünyi khyang kohsohba nyitsarü atsa tsü chongbong yongna mahkhang münyicho kihkong kyole.

²⁷ Thsakukih alaa tsucho mütsacho kyo, nengse alaa yangchiba tsü amütsa.

²⁸ Arahseh müliba nyitsarü tsü, amahchehcho ko tbü müliba yangdi kyole.