CHOYOH 24 - AMÜSA BAIBEL (BSI)

-19-

¹ Amünyirü tümükhyah, ko arüh te shangrü tüthsa.

² Arüh lümlong shühkhatohnung du arah yangchire ko arüh bela amütsa du chürore.

-20-

³ Lümlong ko anyichehba kuphi la kuh thsare.

⁴ Amüdhenü thsidi ko atsah atsa kohronü kuh chongsah apüm la sehyahre.

-21-

⁵ Lümlong liba tsü tase azeh nyitsarü tenü awüu, amüdhe tsü re tenü adhsütahba.

⁶ Tunüo lümlong lirü langnüchola rothsanung nühnü wüchehnung ko arükurü kükyo lichonü chita kohre.

-22-

⁷ Choyoh yu tsü adohrünü nyichehnung dee athsah. Adhsütah yu chotade abinü yonung tu mühlire.

-23-

⁸ Nühnü amünyi nguchinung du chungkhang, nüte yubejarongsohrüepü dsire.

⁹ Adohrü lümcho apüm tsü amünyi. Müthsamünyürülü atümungnü thrünyire.

-24-

¹⁰ Thsamütsa mütohde nehkhang, nüh remüzeh.

-25-

¹¹ Arahkheh la khürü süsohnung notsikhang abi khümchonung tüdrü.

¹² Hütsü I nguchi mah pü nühnü yonung kohle, ta Abüdongba-nü nü lümcho müdhele ko nüyu khanung. Abinü nüh dhingyale ko müdhele. Nü nguchi aleng Abinü nü khyang jiyünung.

-26-

¹³ Itso, thsakukih müyahng; hütsü atsae. Ko thsakukih nü mülela nyiyahcho kyo,

¹⁴ nü nbü nengdang lümlong tsü atsaepü müdheing. Lümlong yangching ko nü suro tsanung.

-27-

¹⁵ Yuje chorü arahnü kengchonung mahkhang abi kuh lanü fühnung arah külüprü akhürahrü tükyo.

¹⁶ Amüsa nyitsarü dhünyehpi khülunye thali shemüsure; ta amütsarülü athsangnyangnü changjüre.

-28-

¹⁷ Nü rorüh khülude nüh tükünyang, ko abi ngahsehde tülongnyüp.

¹⁸ Mahkhang Abüdongba-nü hütsü ngu mükünyangnung ko Abi zichürocho zahpehnung.

-29-

¹⁹ Münyirü khyang nüh tülümxüsoh; arüh tümükhyah.

²⁰ Amütsa nyitsarü aronung alongdi tu mühle; arüh dsi tsü mehpehnung.

-30-

²¹ Itso, Abüdongba drüng ko yangthsaba dhiching. Arüh nyüm yarü te tümükhong,

²² hitari nyitsarü dhrongyengnü changpehnung. Tsingrangba mahkhang yangthsabanü jünungba dhsürü tsü nühnü mümüdheo?

Choyoh Yu Mütozah

²³ Lümlong lirünü hirisü yo lile: Yukharünü khüpakhüla yu khaba tsü amüthsalang.

²⁴ Thsamehrü abinü langjükhang, atümungnü abi thrünyinung.

²⁵ Yukharü sünü athsamehrü mülangjüro abi müwanung ko aneng atsa ngunung.

²⁶ Yuje lalingba tsü shangrü khung amünbüchünung.

²⁷ Jungchah nü nguchi rungnüm, luh nguchi apüm thüm, hütsüpü du nü linung kuh thsaang.

²⁸ Khehyüm atsa mülipü khürü nyüm yuzi tüjü, mahkhang abi nyüm arahkheh tücho.

²⁹ “Abinü Ite nguchicho roh-i Ihnü nguchinung; abinü tu nguchicho hütsü thali mülihnung” pü nühnü tücho.

³⁰ Adohrü adsererü khüdu shükusiluh khu Ihnü wücho.

³¹ Luh tsü zeng ko zanunü chiti licho. Amükang lung tbü apüm khülupü licho.

³² Hütsü dhingmükang lümdhingde Ihnü anyichoba khüdu ngucho.

³³ Azachah ngakehde, azachah yüpsehde ko azachah hongkoh müthsüpü yade,

³⁴ aführü roh-i ailümnü ro nüh betinung.