CHOYOH 23 - AMÜSA BAIBEL (BSI)

-6-

¹ Adirü te tsuyongnung pümde abi tsü sünang müdheing.

² Nüh münyonye khü nyehlieng.

³ Tsuyongnung atsa ngu tümüxümüngu; tunüo nüh kihyochünung külüprüsü mümüdhe.

-7-

⁴ Kuthsi yangde nüpu müchangnung müzahng.

⁵ Nü kuthsi tsü nahsüp müthsade aqo chicho roh-i müdi kyo mongtsinung.

-8-

⁶ Axükehrü kuh la tütsuyong mahkhang abinü tüpcho tsuyongnung atsa nengdang tümükhyah.

⁷ “Rung ko khü tsung” pü abinü yore, ta hütsü yuje mah. Abi lasihlü yujeba nüte mühle.

⁸ Nühnü tsuba apüm mülüpehnung, ko nü be suba apüm tsü amükang kangnung.

-9-

⁹ Amongdongrü te akhyüba yu tüchota; tunüo nüyu tsü abinü hoh-müthsa.

-10-

¹⁰ Jümürü lurü tülohmüi mahkhang mürürü lih tükengcho.

¹¹ Abüdongba tsü arüh khümrü, Abinü nüh nyüm arüh nengdang yanung.

-11-

¹² Nührü athsingyurü te nyieng ko akohcho nyichoung.

-12-

¹³ Azarü rahsehnung tütütohnyünyeh. Akhehnü tangchonü abi müsünung, ta

¹⁴ hütsünü abi akang khümchonung.

-13-

¹⁵ Itso, nüh lümlong lirü kangkhang, Ih dee künyangnung.

¹⁶ Lümlong li yu chocho yuchide Ih künyangnung.

-14-

¹⁷ Amünyi nyitsarü tümükhyah; Abüdongba jengreng dronü nü kang lieng.

¹⁸ Hütsüta likhang aronungla nü kang alongdi lile.

-15-

¹⁹ Nyieng Itso, lümjing ko nüh khüta lirünang soh lümdhing.

²⁰ Yongkha müxüprü mahkhang tsukhuyongkhurü yola tümükhong.

²¹ Amüxüprü ko tsukhuyongkhurü iilümnung. Tsupü yüpjodukhang tunyah mülipü nüh shüthreh müpinung.

-16-

²² Nüh nümüsuba nüu yu nyieng, ko nütpa ashilarü kangde tüthrünyi.

²³ Yuje tsü lih-eng ko hütsü tüi; lümlong athülaba ko anyicheh lieng.

²⁴ Amüsarü khüdu au tsü khütang künyangnung aleng, tunüo asithsa atsurü khyanglang künyangre.

²⁵ Nü khyanglangnü nüu ko nütpa künyangsohng; nütpa khyang hiba akünyang tsü jüng.

-17-

²⁶ Itso I yocho nyieng, ko I kang adüzü khyüng.

²⁷ Nahtrahnaxeng ko mabomashi khingkurü tsü asüba shukuh lile.

²⁸ Arühnü fükhohrü roh-i thseh pümre ko adrong yuje mücho kangsohre.

-18

²⁹ Sürü ahohahro? Sürü longriro? Sürü yupejarong liro? Sürü longmüsüro? Amükangnü sü chah iha kehro? Sürü nahtse mohro?

³⁰ Arüh tsü müyüp müxüprü ko yongkha asi yangchirüti lile.

³¹ Shingla yongkha amoh tsüchinü nyehkeh ngude nühnü tümükhyah.

³² Achangkala hütsünü müyüh zehba mürünü roh-i mükyühnung.

³³ Nü nahtse la amüngu ngunung ko nühnü amücho chonung.

³⁴ Kihkuh mungthri chah pümpü kihjü longla mülingchi rachirü roh-i nüh kangnung.

³⁵ “I khyang khürünü shingko, Ih xüpsehko, ta Ihnü mülümchehre. Tuepü Ih müshemüsuchehro? Ih adesü yongkha yongnyüre pü nühnü yonung.”