CHOYOH 21 - AMÜSA BAIBEL (BSI)

¹ Kihrü nümülacho kyo Abüdongba-nü yangthsarü lasih nüchire.

² Nü nguchicho apüm tsü athsalangepü nühnü lümnung; ta Abüdongba-nü nü lasih xodhingre.

³ Kangmübü jücho tenü yuje ko atsa nguchiba tsü Abüdongba-nü khyünyüre.

⁴ Akhürah nyitsarü tsü arüh mülahmüshi ko müthsehchonü langnüre, ko hütsü amünyi.

⁵ Lümchung tsanü chung ko nüh kükyo linung, dhsüdhsara nguchikhang khodesü kükyo mülinung.

⁶ Yujemücho hiroba kuthsi tsü müsüenü zah changnung.

⁷ Amütsarü arühbürü akohtitang nguchinü changre; arühnü atsa nguchinung dhsonglire.

⁸ Athsamehrü lang tsü akureng, ta achomükehrünü yuje du nguchire.

⁹ Jüjünyangnyang khingkurü te linung tenü drexang chah linung atsau.

¹⁰ Nyitsarü amütsanü lede amünyi du mürure; sütesü yanglilüm müngure.

¹¹ Amüthsehrü khingchide, nyitsarü lümzire ko lümlong lirü te thülakhang alaa müdhe kangre.

¹² Amüsa Tsingrangba-nü akhürahrü kukhi la tu tikehro müdhere, ko Abinü akhürahrü tsü changsohnung.

¹³ Nühnü ailümrü kihchicho münyikhang, nühnü kihchicho müyuchinung.

¹⁴ Khürünü nüte zichürokhang, jiyü rang jüchonü abi kihchonung.

¹⁵ Yujeba nguchide, nyitsarü atsa künyangre, ta münyirü wahre.

¹⁶ Sü yuje lang lanü thrümeh tsiro asübanü yingyale.

¹⁷ Sünü künyangküshi müinang abi iilümnung; sünü yongkha ko tuji müinang abi alirü mükangnung.

¹⁸ Akhürahrülü atsarü chah tikehsohnung külüpba aroto tsü arühbürü chah tikehre.

¹⁹ Jüjünyangnyang ko athsüthsah khingkurü te linung tenü lipilih la licho atsau.

²⁰ Lümlong lirü kuh la kuthsi sühpüre, ta amüsithsarünü nguyeng müzangkhangre.

²¹ Sünü Amüsaba ko amüi yangchiro, abinü akang ko adhichi ngure.

²² Asithsarünü athrungrü yangdi thseh mahchehre, ko arühnü dümpiba tbü thsangnyangjüre.

²³ Athsangthsi lanü tsiphu linyükhang nüyu müzah choung.

²⁴ Künyangküshi, hongzi, tüzümükhüm, ko müthseh nguchirü te “Müthsamünyürü” pü dsire.

²⁵ Adsererü sünü münguchiro apu jangjang müpsehre.

²⁶ Akhürahrünü lede mükhyahre, ta Amüsarünü müxükehpü jüre.

²⁷ Akhürahrü kangmübüba tsü Abüdongba-nü thrünyire, khang, abinü amümüsa lümlongnü hirode tu khütoh-i thrünyinung.

²⁸ Yuje müchoba yuzi müyudsire, ta sünü tsa lümdhingro abi yu khyüchore.

²⁹ Yuje chorünü abürü chah longlangre; akhürahrünü atsauba dhingchehsohnung müküpre.

³⁰ Abüdongba nüte müzehkhang, nyitsarü lümlong, axangcheh ko asithsanü tu mükülüpcheh.

³¹ Kuri tsü chita nengdang rungnümnung kohle, ta akoh tsü Abüdongba-nü jüre.