CHOYOH 20 - AMÜSA BAIBEL (BSI)

¹ Yongkha tsü müthsamünyüjürü, alaa yongba tsü yubejarong lile; ko sü hütsünü nümülasohro abi lümlong mühle.

² Rihlong chüroba yangthsarü tsü kihkhünying rengcho kyole; sünü abi ruhwachehnang abürü xohsehre.

³ Yubejarong lanü shehkhu liba tsü jengreng; ta adohrünü rehtare.

⁴ Bechola müchisiba amüngang luthsarü maxanung tu mülire.

⁵ Nyitsarü lasih tsü kihkong asoh la zehba kih kyole, ta sü sihthsaro abinü khachehre.

⁶ Atümungnü abi tsacho chore, ta yujeba atsa tsü sünang yangchidhing.

⁷ Yuje ko amüsa au khüdu tsü tsuzarü nengdang amüwanung.

⁸ Yukhaba pümji chah pümba yangthsabanü abi nahtsenü amütsa apüm dhingchehre.

⁹ I lasih amüsa ko Ih Amüsarüe pü sünü yochehnung?

¹⁰ Ahosing ko akihsing yuje mücho bichirü Abüdongba-nü thrünyire.

¹¹ Akhunga mii abi nguchinü abi tunang ngusohre; abi yuje ko tsacho nührünü yochehre.

¹² Abüdongba-nü ayuchinung nangkhi ko angunung nahtse anyüding külüpcho.

¹³ Ayüpnung tümükhyah mahkhang nüh iilümnung; müpah-müdeng lieng ko nüh thangchi linung.

¹⁴ Kohro lihrünü abi thsahralepü rehtare, ta hitsipü khanglang abinü rehchocho nengdang künyangre.

¹⁵ Nühnü tu chorünang hütsü tsüpkhang, hon ko thsidilung tenü awüba lango lile.

¹⁶ Adohrü sünü nyühmürü thsite sahnung phungchonang, hütsü müsahde abi ajüyeh yohpübae.

¹⁷ Yujemücho hiroba tsuyongnung tsü anyiyah, ta akhanglang be tsü alihnü jengnung.

¹⁸ Athsüchiba atsa nyieng, khang nühnü akoh ngunung; lümchung mükülüp-pü chitalang thsung tüwü.

¹⁹ Sünü tsupohyupoh rachinang arangyu mishare, hütsüeko yu alaa chorü te tümükhong.

²⁰ Sünü tpurü chokehcholanang abi akang amala dsi mehpehcho kyo kangnung.

²¹ Adikehla dhsüdhsanü khyübülungba kuthsi tsü achangkala mümüwanung.

²² Amütsa mülih nüpu jangjang türüyang, Abüdongba chah longlang ko Abinü nüh rükunung.

²³ Ahosing ko akihsing ko yuje mücho bichirü Abüdongba-nü thrünyire.

²⁴ Nyitsarü lang tsü Abüdongba-nü chungjüre; khang nyitsarünü khüta hütsü müdhenung.

²⁵ Tsingrangba khyang amübü jünung longi lümdhingpü du nyengchoung; mahkhang akhanglang nü long mütsanung.

²⁶ Lümlong liba yangthsarünü thsamehrü rangchenung, ko müchomangpü khingchinung.

²⁷ Nyitsarü nbü tsü afü yonglang liba yangchiba Abüdongba dsi lile.

²⁸ Yangthsarü khüdu tsü abinü yuje athsalang ko phülari thsa tashi, abi pümjila pümnung.

²⁹ Kunu nengse tsü arüh tase, ta ashirü adhingtangba tsü kutpoh.

³⁰ Ihsa akang lang mülichinung khüpilü athsah mütohre.