CHOYOH 17 - AMÜSA BAIBEL (BSI)

¹ Yubejarongnü jeng liba kuh khüdula thsüti tsunung tenü longlümnü tsangkung tsunung atsau.

² Asithsa kulirünü tulamüyoh abüdongrü tsurü michah abüdongba kangre ko thsiking lanü nohlüm ngure.

³ Hon ko taripi michang la tahdhing düzüre, ko nyitsarü lasih Abüdongba-nü düzüre.

⁴ Amütsa nguchirünü amütsa khiyu nyire, ko yuje müchorünü arahkheh yu nyire.

⁵ Sünü ailümrü müthsamünyüro abinü Akülüpbong müchümükehre; sünü bürü suro mütsacho ngu künyangro abi mükhingchipü mülinung.

⁶ Shümtsurüti tsü ashialongrü kuthri, ko tsuzarü ahechi tsü tpurü.

⁷ Adirünü arahkheh müchore, ko amüpisarünü akhyüba yonung tu mühle.

⁸ Pohsa tsü ajühba nahtse te zii khüdu kyo lile; abi khüde wünang apümlang müware.

⁹ Bürünü müisohnyükhang arühnü thsamehde arüh mülang pehjüng. Thsamehchonü shangrü zasohrepü lümkehng.

¹⁰ Adohrü khyang thsihpi lahcho tenü athoh zehrü te khüdupi yübüchonü alaa nyichehre.

¹¹ Amütsarü sürünü lede adhsangthsi chürosohro, arüh yang alungkha yusi hirü kyo asüba rore.

¹² Amükhyüba lümchung hirü amüsithsarü shirünung tenü aza chahpü rachiba shühmü atpa shirücho atsau.

¹³ Nühnü atsa mülih amütsa jükhang, nü kuh lanü amünyi khodesü mütsinung.

¹⁴ Yubejarong adikeh tsü kih dümticho rohphohcho kyole; alaa adiu mükangde dümtieng.

¹⁵ Amütsarü langjüba ko Amüsarü mülangjüba anyüding tsü Abüdongba jingte athrünyinung.

¹⁶ Amüpisarünü thsi pehnü lümlong yangchinung müdhsüdah, tunüo abi athoh müzeh.

¹⁷ Suro apüm la shangrünüsü müire, ko jünirü tsü suro mütsade dhingtanung nengdang lire.

¹⁸ Athoh müzehrünü du bürü thsite sahjünung phungchore.

¹⁹ Sünü amünyi müiro abinü athsangnyang müire, Sünü alicho dee ngusohro abinü adhsangthsi chingre.

²⁰ Akureng lümlong hirü mümüwanung, ko müle mütsarü achongcha la züdure.

²¹ Amongdongrü tsü au nengdang longmüwümnung; ko adohrü au tsü akünyang mühle.

²² Akünyang lasih tsü moi atsa; ta lümtohba tsünü arüh kungsohre.

²³ Yujemücho yu kharünü rangnü pohsa khyüre, ko yujeba tsü münguchire.

²⁴ Athoh zehrünü nguchi atsa nengdang dhingre, ta adohrünü apümlang dhingre.

²⁵ Amüpisa tsurünü au khyang awah ko atpa khyang alongmüzi hirojüre.

²⁶ Achomükehrü te thsi tsuba tsü amüthsalang; nyitsarü atsa khingchiba tsü yuje chümbhisohre.

²⁷ Asithsarünü dee müchore. Anyichehrünü yah-adu lire.

²⁸ Adohrü mii yuva müchüro pümkhang bürünü lümlong lirü ko amüdherü roh-i lümre.