CHOYOH 16 - AMÜSA BAIBEL (BSI)

¹ Nyitsarünü lümlong külüpre, ta alalingba tsü Tsingrangba chahnü rore.

² Nyitsarünü nguchicho apüm tsü athsalang roh-i lümre, ta Abüdongba-nü alümcho tsü jodhingre.

³ Nü lümcho tsü Abüdongba khyang yohpüjüng, ko hütsü nühnü nguchichehnung.

⁴ Abüdongba-nü thricho apüm la achangka khüdu lile; ko amütsarü achangka tsü achangnung.

⁵ Hongzirü atümung Abüdongba-nü thrünyire; ko Abinü arüh mükhingchipü mülinung.

⁶ Yocho nyi ko yudsinü amünyi thsütohjüre; ko Abüdongba drüchonü amünyi lanü tsiphure.

⁷ Abüdongba künyangsohkhang, nü rorüh tsü shangrü kangpehnung.

⁸ Yuje chonü azikyah shehba tsü yuje mücholanü amülah ngucho tenü atsau.

⁹ Nyitsarünü lümchung külüpre, ta Tsingrangba-nü nührü nguchi thongure.

¹⁰ Yangthsarünü Tsingrangba tasela chore; abinü yukhaba tsü lede yuje.

¹¹ Abüdongba-nü ahosing ko akihsing athsalang ko shithsacho apüm yuje bichisohnyüre.

¹² Yangthsarünü amünyi mürangchore, tunüo adrengdreng thsaxüküm yujenü külüpre.

¹³ Yangthsarünü yuje nyinyüre ko abinü yuje chorü du müire.

¹⁴ Lümlong lirünü yangthsarü künyangsohnung müküpre; yangthsarü rihlong chürokhang khürü sünung.

¹⁵ Yangthsarünü müruba tsü chisi bekhyah tsing hiroba nyükhi kyole, hütsüla akang lile.

¹⁶ Lümlong ko amüdhe tsü hon ko taripi tenü dee atsau.

¹⁷ Nyitsarü atsanü amünyi müriba langla tsehre; sünü alang la müzah tsehro akang khümchore.

¹⁸ Amüthsehnü athsangnyanglang nüre, ko hongzichonü khülure.

¹⁹ Amüthsehrü yola afühcho kuthsi changnah pümcho tenü longlümnü ailümrü yola pümcho atsau.

²⁰ Docho nyieng ko nü suro tsa linung; Abüdongba chah longlang ko nüh künyang linung.

²¹ Lümjingrü te anyichehrü dsire. Yu alaa nyiyahde aparü alaa kihchochehre.

²² Lümlong tsü asithsarü nengdang akang yongna, ta adohrü te donung müküpba tsü bekhyah pehcho alaa.

²³ Thohzehrünü lümdhingpü chore; achocho apüm tsü akhyüchochehnung.

²⁴ Yu aküna tsü thsakukih roh-i müyahnung anyiyah ko fü nengdang atsa.

²⁵ Yuje langepü nühnü lümba tsünü asülang nünung kohle.

²⁶ Nguchirü bekyüba tsünü alaa müküpsohre, tunüo abinü mi jengnyüre.

²⁷ Amütsarünü bürü lerohpehsohnung yangchire; ko arüh yu tsü mii michangnü roh-i tahre.

²⁸ Amütsarünü tsupohyupohre; ko arühnü yubejarongsoh shangrü zasohre.

²⁹ Shühkhatohrünü arüh shangrü kihyochüre ko athsangnyanglang nüre.

³⁰ Sünü nü chah aha mütrekehpü nahxidhingnü dhingro, hütsü dhingkyaang, abinü nü nengdang amütsa lümle.

³¹ Kutsüpba tsü yuje chorü jiyü ko kutpoh tsü ahechi kuthri.

³² Arangcho tsü tase azeh tenü atsau, ko abürü rahsehba tsü yangdi khüdu khyücho tenü adiu.

³³ Tsingrangba lümcho müdhenung nyitsarünü zii thsare; ta alalingba tsü Tsingrangba Apunü jüre.