CHOYOH 15 - AMÜSA BAIBEL (BSI)

¹ Küna lalingchonü zichürocho zahsohre, ta yu akakonü thsümüsure.

² Lümlong lirünü chode amüdhe tsü amükhyahnung ngusohre, ta adohrünü amükhyüba du chochehchüre.

³ Abüdongba-nü apümlang tikehcho ngure; atsa amütsa nguchicho apüm Abinü Ihsa dhingyale.

⁴ Yu aküna tsü akang singdong, ta amüchomang yunü nü anbü changjüre.

⁵ Amüpisa nyitsarünü au thülacho münyire, ta lümlong lirünü hütsü nyire.

⁶ Amüsarü kuh la kuthsi adrong lire, ta amütsarü kuthsinü achongcha hirojüre.

⁷ Amüdhe tsü adohrünü mah; ta lümlong lirünü shure.

⁸ Nyitsarü atsanü dangkhidangnangde Abüdongba künyangre, ta amütsarünü amübü hiroba tsü Abinü thrünyire.

⁹ Amütsarü lang tsü Abüdongba-nü thrünyire, ta sürünü yuje nguchiro Abinü müire.

¹⁰ Nühnü amüthsalang nguchikhang dee khingchinung; mülichijüba mükhyünyükhang nüh sünung.

¹¹ Asülihnü mii Abüdongba bete mürangchehkhang; khang nyitsarü lasih Abüdongba bete khüta rangnung?

¹² Müthsehmülarünü müchongchijücho mükhyünyüre; lümlong lirü yang müwüre.

¹³ Khode künyang linang nyitsarünü münyüre; ta khode wahnang romih mükhümre.

¹⁴ Athoh zehrünü nyichonyüre, ta adohrünü arüh amümüdhechola longsüre.

¹⁵ Ailümrü akangla adhsangthsi tsü achangka mühle; ta adekhengrü akang tsü lede akünyang.

¹⁶ Alirü thsapü mükyahshang linung tenü Abüdongba yochonyi ailümrü thsanung atsau.

¹⁷ Athrünyitarü yola atsauba tsuyongnung tenü amüitarü yola himütrung te yangtsunung atsau.

¹⁸ Zii thsüthsahchonü yubejarong chürosohre, ta arangchonü yangtsa hirore.

¹⁹ Nüh dserekhang apümlang adhsangthsi mütohre, ta yuje chokhang achongcha tu mümütohnung.

²⁰ Lümlong liba tsurünü au künyangsohre; ta amüpisarü dunü atpa mükhimüngure.

²¹ Adohrünü apu amüsithsa te künyangre, ta lümlong libanü yuje nguchire.

²² Nühnü kohnyükhang atümung chahnü lümlong khyüng, nüh akoh ngunung.

²³ Shikhe te phishu yu atsa nguba tsü khütoh-i akünyangnung.

²⁴ Lümlong lirünü ayonglang Asülih pehjüpü amilang akang yang nüre.

²⁵ Mülahmüshirü kuh Abüdongba-nü thsangnyangjünung, ta chomilarü kuthsi nyahjünung.

²⁶ Amünyi lümlong Abüdongba-nü thrünyire, ta yu atsanü Abi künyangre.

²⁷ Yuje müchonü ajingcho ngunung müküpkhang, nü kukhi la chongcha ngunung. Pohsa tükhyü ko nüh kutsüp linung.

²⁸ Nyitsarü atsanü lümdhingpü du chore, ta amütsarünü thotho lalingre ko alongmüzi chürosohre.

²⁹ Amüsarü dangkhidangnangde Abüdongba-nü nyire, ta amünyirü tenü ashu zare.

³⁰ Romih atsingsenü nüh künyangsohre, ko yusi atsanü alaa künyangsohre.

³¹ Mülichijüde nühnü nyikhang nüh apisa.

³² Nyichonung dhsonglikhang nüpu jangjang lerohpehre. Mülichijüde nyikhang nüh amüdherü kangre.

³³ Abüdongba drüba tsü lümlong akükyüe, ko adhichi bekhu alonglüm würe.