CHOYOH 12 - AMÜSA BAIBEL (BSI)

¹ Sünü amüdhe müiro abinü thsamehde mülichijücho müire. Ta adohrünü mülichijücho thrünyire.

² Abüdongba-nü nyitsarü atsa te künyangre, ta amütsa lümrü mülangjüre.

³ Akhürahnü atsikehchah müjücheh, ta Amüsa nyitsarü drengdreng yare.

⁴ Nitpürü atsa tsü anii kuthri, ta ashah hirojüba khingkurü tsü anii rüh la sengra kyole.

⁵ Amüsarü lümlong tsü amüchong, ta akhürahrünü kihyochünung du müküpre.

⁶ Amütsarü yu tsü shühthrehba, ta Amüsarü yunü dhsürüla lirü iichore.

⁷ Akhürahrü khülupehre ko mülohre, ta Amüsarü kukhi lidu lire.

⁸ Thsehdhsakhang nü neng senung; ta nüh dohkhang aparünü nüh nyümnung.

⁹ Adirü kyopü yangseh rachinung tenü azikyarüthsa akang linung nguchi liba tsü atsa.

¹⁰ Nyitsarü atsanü apu kanglungrü xükümre, ta amütsarünü arüh khingchire.

¹¹ Thrung nguchirü tsuyongnung thangchi lire, ta adengting la bekhyah pehba tsü adohrü.

¹² Amütsarünü amünyi nguchinung du yangchire, ta Amüsarü drengdreng yare.

¹³ Amütsarü abürü yula xohre, ta yuje chorü chongchalanü tsiphure.

¹⁴ Nü khyang jiyünung tsü nü chocho ko nü nguchichochah kehle; nü nguchicho aichi ngunung.

¹⁵ Adohrünü arüh du athsalangepü lümre, ta lümlong lirünü aparünü thsingyucho khyüre.

¹⁶ Adohrünü zichürocho zah dhingchehsohre, ta lümlong lirünü nyüpmüsehcho rangchore.

¹⁷ Nühnü yuje chode yuje yuzi jüre, ta arahkheh yuzinü akihyochü yu chore.

¹⁸ Amülümdhing yunü nohshengnü roh-i khee dhsakejüre, ta lümdhingpü choba yunü kyangjüre.

¹⁹ Arahkheh akang azachah du lire, ta yuje lede lire.

²⁰ Amütsa lümlong külüprü lasih la kihyochüba lile, ta sürünü atsa chungro akünyang lile.

²¹ Amüsarü chah suro amütsa mütikehre, ta amütsarü achongchanü jengre.

²² Arahkheh chorü Abüdongba-nü thrünyire, ta yuje chorü te Abinü künyangre.

²³ Lümlong lirünü müdhenye sahmüthsare, ta adohrünü arüh lümlong müdhesohre.

²⁴ Müküp nguchichonü tase hirojüre; dserechonü ayurü kangsohre.

²⁵ Lümtpananü akünyang changjüre, ta khiyu atsanü künyangsohre.

²⁶ Amüsarü tsü shangrü nengdang langnürü, ta amütsarü langla arüh nümülare.

²⁷ Adsererünü ayangchicho khodesü müngure, ta müküp nguchirünü thsidi kuthsi ngure.

²⁸ Amüsaba tsü akang lang, ta akhüraba tsü asüba lang.