CHOYOH 11 - AMÜSA BAIBEL (BSI)

¹ Ahosing yuje mücho bichirü Abüdongba-nü thrünyire, ta yuje cho hoba te Abi künyangre.

² Amüthsehrü zah ashah khyünung. Longlüm liba tsü lümlong.

³ Nüh tsakhang, yujenü nüh nüre, Longmülangchehba nyitsarü abürü yuje müchobanü changjüre.

⁴ Asü mütoh nyümong kuthsinü tu münguchicheh, ta yujenü nü kang khümchochehre.

⁵ Yujenü nyitsarü atsa akang tsü müringsohre, ta amütsarünü apu akang khülusohre.

⁶ Amüsabanü yuje chorü khümchore, ta long mülangchehrü apu müxümüngula xohre.

⁷ Amütsarü süde, alongdi changre, ko amütsarü alongdi adeng kangre.

⁸ Amüsarü adhsangthsi lanü tsungtire; arüh mülih amütsarü chah küdure.

⁹ Tsingrangba mümüdherü khiyunü changjünung kohle, ta Amüsarü lümlongnü nüh khümchonung kohle.

¹⁰ Yuje chorü suro tsade yangdi khüdu künyangre, ko amütsarü süde künyangtare.

¹¹ Amüsarünü müwajüde yangdi khüdu jare; ta amütsarü khiyunü hütsü khülusohre.

¹² Bürü züdusoh choba tsü amüsithsa. Alümjingrünü sahmüthsare.

¹³ Tsupohyupohrü te arangyu müyochehre, ta sürü chah longlangro, arüh te longdire.

¹⁴ Langnürü mülikhang yucho khüdu khülure; ta langnürü adrong lichonü khümchore.

¹⁵ Nyühmürü thsite sahjünung chechokhang, suhsünung. Nü nengdang hitarila müzehcho atsau.

¹⁶ Achomangkeh khingkurünü adhichi ngure, ta saying amütsa khingkurünü ashah ngure. Adsererü khodesü mülire, ta müküp nguchirü alirü kangre.

¹⁷ Amüi bichirünü apu jingchore, ta alungkharü abürü du dhsakehre.

¹⁸ Alungkharü tusü müjingchore, ta tu yuje liro hütsü nguchikhang, nüh jiyü nguriri.

¹⁹ Sünü yuje nguchinung dhrongchehro abi akang linung. Ta sünü amütsa nguchinung müküpro abi sünung.

²⁰ Abüdongba-nü akhürahrü thrünyire, ta yuje nguchirü müire.

²¹ Amünyi nyitsarü khingchire, ta Amüsarü tsiphurepü nühnü tsüptsieng.

²² Amüpisa atsah atsa khingkurü tsü shüka nabong chah hon müshi yohjücho kyole.

²³ Nyitsarü atsanü khyünyücho lede tikehre; amütsarünü khyünyücho tikehde atümung zichürore.

²⁴ Khürünü müxükehpü jüre, ta alaa du lire. Khürünü ajühnung athsalang mii müjüre, ta alaa du iilümre.

²⁵ Tüxükeh, ko nüh bholo linung, aparü troung ko nüh tronung.

²⁶ Angang kyükehde inung sünü fürü rangpüro, nyitsarünü chokehcholare, ta sünü ainung müshapüro abi sere.

²⁷ Nü nahdhingkeh tsakhang, nü jengreng drünung, ta aroto yangchikhang hütsü tikehnung.

²⁸ Sünü kuthsichah longlangro abi mamüki singva kyo trülohnung, ta Amüsarü müyü singva kyo müyah kangnung.

²⁹ Kukhi la adhsangthsi hirorü achangkala tusü mülinung. Amüpisarü lede lümlong lirü kulirü thsanung.

³⁰ Amüsabanü akang jüre, ta shüh threhbanü hütsü hitsire.

³¹ Hiba limih la nyitsarü atsa jiyükhang, amütsarü ko amünyirü khütoh-i khingchinung.