AZIKA YU 9 - AMÜSA BAIBEL (BSI)

Müyurünü Yocho Münyicho

¹ “Nyieng, Israelrü! Chünye nührünü Jordan Yongkhi keh wü nührü tenü adiu ko rezeh-urü yo alih khyünung lile. Arüh yangditi tsü tbünü ning chii chongti lile.

² Arühbürüsü athsengthseng ko re azeh lile; arüh akurahrüti lile ko arüh bete sünüsü müyachehrepü nührünü yuchiko.

³ Ta ade Abüdongba Tsingrang, michang kyo nührü bekhu wücho nührünü ngunung. Nührü züdude, Abinü nyengchocho roh-i nührünü arüh changjü iipehnungthsa Abinü arüh kohnung.

⁴ “Abüdongba Tsingrang-nü nührü nengdang arüh iipehjüpü khanglang, nührü aleng thsachonü, Abinü nührü noro hiba lih hi khyüsohchoepü nührü lüm la tülüm. Mah, arüh mütsachonü Abüdongba-nü nührü yolanü arüh iipehjünung.

⁵ Nührü tsachonü ko athsalang du nguchichonü, Abüdongba-nü nührü khyang arüh lih khyüsohrü mah. Arüh mütsachonü ko Abinü nührü jümürü Abraham, Isak ko Jakob-rü te Abi anyengchocho yohpünyülangnü, Abinü arüh iipehnung.

⁶ Nührü aleng thsachonü Abüdongba-nü hiba asu lih hi nührü khyang jürü mah pü müdheing. Mah, nührü ahongzi nyitsarüti lile.

⁷ “Nührünü akungaselih la Abüdongba nührü Tsingrang khüta zichürosohcho hütsü tünbüchü. Ijip pehjüba nyümong tinü, hi ro chihba nyümong chii, nührünü Abi nyümko.

⁸ Sinai zong chah mii, nührü changkhangsohnung thsa nührünü Abi zichürosohcho.

⁹ Abüdongba-nü nührü te külüpba azengtacho thrahkehba lungtpah khyüchonung Ih azonglang tsü tuwücho. Ih hütsüla tu mütsuyongpü nyümong yüre ko romang yüre licho.

¹⁰ Hütsüde Abüdongba-nü I khyang, nührü azong jingdümpi shibülungde michang lanü tuturü yocho, hütsüri apu khehnü thrahcho lungtpah anyüh jücho.

¹¹ Ho, hütsüri nyümong yüre ko romang yüre khanglang, Abüdongba-nü azengtacho thrahcho lungtpah anyüh I khyang jücho.

¹² “Hütsüpü Abüdongba-nü Ite yocho, ‘Azongla tsünü zah jowüng, tunüo nühnü Ijip lanü nüchehba nyitsarüti tsü mütsa kangko amünyi nguchiko. Ihnü arüh te mülacho lanü arühnü ximüla tsiko ko arühnü arühbürü nengdang kyothri khüdu külüpko.’

¹³ “Abüdongba-nü hisü yocho, ‘Hiri nyitsarü khüta hongziro Ihnü müdhele.

¹⁴ Ih yatinung tümüküp. Sünüsü arüh mülümkehnungthsa Ihnü arüh changsohnung lümle. Hütsüpü Ihnü nüh arüh tenü adiu ko re azeh-u yucho khüdu au kangsohnung.’

¹⁵ “Achotsü Ihnü azengtaba thrahcho lungtpah anyüh tsü bipü azongla tsünü jowücho. Azongla tsünü michang mihmüle chürocho.

¹⁶ Nührünü Abüdongba nührü Tsingrang-nü mülacho yuzeng mühnyi ko nührübürü nengdang imüyengnü misüpung kyothri külüpnü amünyi shitpahcho Ihnü müdhecho.

¹⁷ Achotsü hütsüla nührü bete lungtpah tsü dhichahchü müpnahcho.

¹⁸ Hütsüpü, adesü Ihnü Abüdongba jingte alih la I romih hapkeh nyümong yüre ko romang yüre tusü mütsuyongpü licho. Nührünü Abüdongba nyüm amünyi shitpah ko Abi zichürosohchonü Ihnü hütsüta nguchicho.

¹⁹ Ihnü Abüdongba adrünung rihlong tsü drücho, tunüo nührü changjünung Abi rihlongchüro licho; ta adesü Abinü Ite nyicho.

²⁰ Abüdongba-nü Aron tesü abi süsohnungthsa rihlongchüro licho, hütsünü Ihnü abi nengdangsü kihchijücho.

²¹ Nührünü külüpba athrünyinung imüyeng idhse misüpung tsü hirocho ko michang la dhiyohchücho. Hütsüpü Ihnü hütsü zangzang asongsong kangsohcho ko azong lanü pohchehba yongkhi la tsü thohyohcho.

²² “Nührü Tabera, Masa ko Kibrot Hattava la lidesü Abüdongba nührü Tsingrang zichürosohcho.

²³ Ko khode Abinü nührü Kadesh Barnea lanü yuzeng bipü wü Abinü jüba lih tsü khyünung yocho, hütsüdesü nührünü Abi nyümcho; nührünü Abi chah long mülangcho ko mühnyicho.

²⁴ Ihnü nührü müdhetinü, nührünü Abüdongba nyüm rore.

²⁵ “Achotsü Ihnü Abüdongba jingte nyümong yüre ko romang yüre mükhukehcho, tunüo Abinü nührü changjünung dhrongchehko pü Ihnü müdhecho.

²⁶ Hütsüpü Ihnü kihchicho, ‘Akohba Abüdongba, Nüpunü Ijip lanü Nü zii ko re amülahnü khümcho nücheh roba Nü müyurü tüchangsoh.

²⁷ Hiri nyitsarü hongzicho, mütsacho ko münyi tüdhing, ta Nü dikehrü Abraham, Isak ko Jakob lümchehng.

²⁸ Mahkhang, Ijiprünü Nühnü anyengchocho lih la tsü arüh münozüducheh pü chonung. Nühnü arüh thrünyicho khu, Nü müyurü kyüsehnung lipilih lang nowüchoepü yonung.

²⁹ Tunüo, Nühnü Nüpu yo thsanung Nüpu zii ko re la throcheh Ijip lanü nüchehba nyitsarü tsü hiri lile.’