AZIKA YU 6 - AMÜSA BAIBEL (BSI)

Yuzeng Arangcheh

¹ “Hiri yuzeng apüm Abüdongba nührü Tsingrang-nü nührü te chonung yoko. Anyengchocho lih la tsü nührünü hiri bichieng.

² Nührü akangli ayung nührü ko nührü chahnü trahchochoti, nührü kutsüp linung Abüdongba dhichi hiri apüm bichieng.

³ Israelrü, hütsüri nyieng ko bichieng. Khang, Abüdongba Tsingrang-nü Ihsa jümürü te nyengchocho kyo, asu lih la tsü nührü tsa linung ko akurah yucho khüdu kangnung.

⁴ “Israelrü, hi müdheing! Abüdongba du tsü Ihsa Tsingrang. Abüdongba tsü khüdu du.

⁵ Abüdongba nü Tsingrang nü lasih apümnü, nü nbü apümnü ko nü re apümnü müing.

⁶ Ihnü chünye jüba yuzeng hi khodesü tünbüchü.

⁷ Hiri nührü tsuzarü te doung. Nüh kuh la lide ko rachide, kyahshang lide ko nguchide arüh te hiri tsü doung.

⁸ Lümkehnung hiri tsü nührü kheh chah ko kikhangchah rahkehng.

⁹ Nührü trahtri ko kukhangchah hütsüri tsü thrahkehng.”

Yocho Münyicho Amüzahnung

¹⁰ “Abüdongba nührü Tsingrang-nü nührü jümürü Abraham, Isak ko Jakob te nyengchocho kyo, nührünü mükülüpcho azehzang yangditi zehpü Abinü alih khüdu nührü khyang jünung.

¹¹ Kuh la tsü nührünü müyohpücho kohro atsanü jeng linung, nührünü müjucho kihkong linung ko nührünü mükhyümcho shükusih yo ko singsih yo linung. Khode Abüdongba-nü hiba lih la nührü noronang ko nührü tsunyücho tsunung linang,

¹² hütsüde Ijip lih la ayurü suro lanü nührü nüchehbong Abüdongba tünbüchü.

¹³ Abüdongba nührü Tsingrang dhiching, Abi du mübüng ko Abi nengla du yuchüm.

¹⁴ Nührü mükangmüshü lirü aparü tsingrang tümübü.

¹⁵ Nührünü aparü tsingrang mübükhang, nührü michah Abüdongba rihlong michang kyo ronung ko nührü riri changjünung, tunüo nührü te liba Abüdongba Tsingrang tsü nahmoh Tsingrang lile.

¹⁶ “Nührünü Masa la nguchicho kyo, nührünü Abüdongba nührü Tsingrang tüthsadsü.

¹⁷ Abinü nührü khyang jüba yuzeng apüm bichinung tünbüchü.

¹⁸ Abüdongba-nü nührü te yuje ko athsalang yocho tsü nguching ko lüpcho tsa linung. Abüdongba-nü nührü jümürü te nyengchoba asu lih tsü nührünü ngunung,

¹⁹ ko Abinü nyengchocho kyo, nührünü nührü rorüh iipehnung.

²⁰ “Aronung shangla nührü tsuzarünü nührü te tsingdhingnung, ‘Tuepü Abüdongba Ihsa Tsingrang-nü yuzeng hiri apüm bichinung Ihsa te khangcho?’

²¹ Hütsüde arüh te hita young, Ihsa Ijip yangthsaba pohki ayurü surola lide Abüdongba-nü Abi zii amülahnü Ihsa khümchocho.

²² Abinü thsayahiya nguchicho ihrü nahnü nguko ko adrünung nguchi Ijiprü te, yangthsarü te ko adirü te thsayahiya nguchicho ihrünü nguko.

²³ Ihsa jümürü te nyengchocho kyo, abinü Ijiprü khehlanü Ihsa nüchehcho ko hila noro hiba lih hi Ihsa khyang jücho.

²⁴ Hütsüpü Abinü Ihsa te yuzeng hiri apüm bichinung ko Abi drünung mülacho. Ihsanü nguchikhang, Abinü Ihsa yucho lede dhingyeh müwajünung.

²⁵ Tsingrangba-nü Ihsa te mülacho lüpcho Ihsanü yochonyi bichikhang, Abinü Ihsa te künyangnung.