AZIKA YU 5 - AMÜSA BAIBEL (BSI)

Yuzeng Dhüre

¹ Mosa-nü Israelrü atümung dsimükhong arüh te yocho, “Israelrü, Ihnü chünye nührü khyang jüba yuzeng hiri nyieng. Hütsüri nyichoung ko bichinung lümkehng.

² Sinai zong la Abüdongba Ihsa Tsingrang-nü

³ Ihsa tpurü te du mah, ta chünye Ihsa akang lirü atümung te azengtaba tsü külüpcho.

⁴ Hütsüba zong la Abüdongba-nü nührü te michang lanü romih e romih dhsükehta chotacho.

⁵ Hütsü nyümong yu thungtanung Ih nührü e Abüdongba nyüh kahla yacho, tunüo nührünü michang tsü drü azonglang tsü müküducho. “Abüdongba-nü yocho,

⁶ ‘Ijip la nührü ayurü suro lanü khümchoba Abüdongba nührü Tsingrang Ih lile.

⁷ “‘Nühnü I chah khu apa tsingrang tümüpü.

⁸ “‘Nühnü ninglang liba mahkhang alih la liba mahkhang alih yonglang kih pohki liba tusü khyo nü nengdang kyothri tükülüp.

⁹ Kyothri tu tesü tümükhukeh mahkhang tümübü, tunüo Ih Abüdongba, nührü Tsingrang ko Ih nahmoh Tsingrang lile. Ihnü I thrünyirü tsuzarü shang asang ko müyü chii khingchire.

¹⁰ Ta I müirü ko I yuzeng bichirü te shang hajar adrong I amüi ngusohre.

¹¹ “‘Nührünü adeng la Abüdongba, nü Tsingrang neng tüdangchi, tunüo I neng masü bichirü Ihnü khingchinung.

¹² “‘Sabath nyümong Müsa yohpünung lümchehng. Ih nührü Tsingrang Abüdongba-nü yuzengjücho kyo.

¹³ Nü nguchi nguchinung nyümong dhüroh lile,

¹⁴ ta dhünyeh nyümong tsülü I nengdang müsachehba akyahshang nyümong lile. Hütsü nyümong nührü, nührü tsuzarü, nührü yurü, nührü kanglungrü mahkhang nührü lih la liba shuparü thsanye, süsü münguchinung. Nührü roh-i du, nührü yurüsü kyahshangnungbae.

¹⁵ Nührü Ijip la ayurü thsa licho, Ih Abüdongba, nührü Tsingrang-nü I tase ko azii la nührü khümchochoepü lümchehng. Hütsünü Sabath nyümong mungnung Ihnü yuzeng jüre.

¹⁶ “‘Nü tpa ko nüu jengreng drüng, Ih Abüdongba nührü Tsingrang-nü yuzengjücho kyo; hütsünü nührü tsa ko kutsüp Ihnü jüba lih la tsü linung.

¹⁷ “‘Nühnü tümüpseh.

¹⁸ “‘Nühnü nahtrahnaxeng tübichi.

¹⁹ “‘Nühnü tüfü.

²⁰ “‘Nühnü arahkheh la süsü tümülangjü.

²¹ “‘Nühnü aparü kukhi tümükhyah; abi nitpü, akulirü, amisü, agadu mahkhang abi licho tusü tümükhyah.’

²² “Yuzeng hiri hi azong chah nührü atümung shimükhongde Abüdongba-nü nührü khyang jüba tsü lile. Khode Abinü michang lanü ko nyükhi acheh lanü yuva arangchehnü chotacho, Abinü apa mah ta yuzeng hiri jücho. Hütsüpü Abinü hütsüri tsü lungtpah anyüh la thrahcho ko I khyang jücho.

Müyurünü Drücho

²³ “Khode azongshünü michang trucho ko amarürah la tsünü nührünü yuva yuchicho, nührü langnürüti ko hung müipi lanü ayingtinü ro Ite yocho.

²⁴ ‘Abüdongba Ihsa Tsingrang-nü michang lanü Ihsa te chotaba tsünü Abi dicho ko ahechi ngusohko. Ko Tsingrangba-nü nyüh khüdu te chotapü mii akang lirepü Ihsanü chünye nguko.

²⁵ Khang tuepü Ihsanü asüba hironung? Hiba adrünung michang tsünü Ihsa changjünung. Abüdongba Ihsa Tsingrang-nü thali chotadelü Ihsa süriri.

²⁶ Nyitsarü khürü akang liba Tsingrang-nü michang lanü chotapü akang lirü do?

²⁷ Thali wüng, Mosa, ko Abüdongba Ihsa Tsingrang-nü tu yoro lüpcho nyidhing. Hütsüpü Abinü nüte tu yoro hütsü thali ro ihrü te young. Ihrünü nyinung ko bichinung.’

²⁸ “Khode Abüdongba-nü hütsü yuchicho, Abinü Ite yocho, “Hiri nyitsarünü yoba tsü Ihnü yuchiko ko hütsü yuje lile.

²⁹ Arühnü hita lede lümkhang! Arühnü lede Ih dhichi ko I yuzeng apüm bichikhang, lede arüh ko arüh trah tsa linung.

³⁰ Wüng ko arüh te arüh shükuhlang thalieng pü young.

³¹ Ta Mosa, nühlü hila Ite lieng, Ihnü nü khyang I yuzeng ko amülaba apüm jünung. Ihnü arüh khyang jüba lih la tsü arühnü hütsüri bichi linung, müyurü te hütsüri doung.

³² “Israelrü, Abüdongba nührü Tsingrang-nü nührü te mülacho lüpcho nguching. Abi yuzeng khüdusü tübeh!

³³ Anyengchocho lih la tsü nührü mütozah tsa linung nengdang, hütsüri apüm bichieng.