AZIKA YU 4 - AMÜSA BAIBEL (BSI)

Yocho Nyinung Thsüchicho

¹ Hütsüpü Mosa-nü müyurü te yocho, “Ihnü nührü te yoba yuzeng apüm nührünü bichieng, ko Abüdongba nührü Tsingrang-nü nührü jümürü khyang jüba lih la tsü nührünü linung.

² Ihnü mülacho chah nührünü yu tu tülahkeh, mahkhang tübeh. Ihnü nührü khyang jüba Abüdongba nührü Tsingrang yuzeng bichieng.

³ Peor zong la Abüdongba-nü tu nguchicho hütsü nührübürünü nguko. Baal mübürü atümung Abinü hütsüla changjücho,

⁴ ta nührü khütoi Abüdongba nührü Tsingrang te yochonyi licho arüh chünye yingcheh lile.

⁵ “Ihnü nührü te Abüdongba I Tsingrang-nü yocho yuzeng apüm doko. Nührünü ade kohcheh khyünung liba lih la tsü hütsüri bichieng.

⁶ Hütsüri yuje cho bichieng, khang hütsünü nührü thsehdhsacho aparü yuchonü müdhenung. Khode arühnü yuzeng hi apüm yuchinang arühnü yonung, ‘Hiba yucho arangcheh hi lümlong ali ko anyicheh lile!’

⁷ “Khütoh-i mülahnye, tu yuchosü Abüdongba Ihsa Tsingrang kyo arüh dhsütahla trochehba tsingrang mühle. Khodederü Ihsanü Abi dhsütahro Abinü lalingre.

⁸ Khütoh-i mülahnye, tu yuchosü Ihnü chünye nührü te doba kyo yuje yuzeng mühle.

⁹ Müzahmükieng! Nührü akangli ayung, nührünü tu ngucho hütsü münbüchünung lümkehng.

¹⁰ Sinai zong la Abüdongba nührü Tsingrang bete nührü yaba nyümong nengdang tsü nührü tsurü ko nührü shümtsurü te young. Abinü Ite yocho, ‘Müyurü tsü shimükhongsohng. Arühnü nyipü arüh akangli ayung bichinung ko arüh tsuzarütinüsü bichisohnung arühtesü dosohnung Ihnü yoba tsü arüh khyang nyisohnyüre.’

¹¹ “Nyükhi ko mikhunü shütiba ko ning chii phung küduba michangnü müshütiba zong jingdümpi khüta wü yacho hütsü nührü tsuzarü te young.

¹² Abüdongba-nü nührü te khüta michang lanü chotacho, ko Abinü chotacho yuchinye khüta Abi tsah müngucho hütsüri arüh te young.

¹³ Abinü nührü te azengtacho khüta nührünü bichinung ko Abinü lungtpah anyüh chah thrahcho Yuzeng Dhüre tsü bichinung nührü te yocho.

¹⁴ Nührünü mahcheh khyünung liba lih la tsü bichinung yuzeng apüm nührü te donung Abüdongba-nü Ite yoko.

Kyothri Nyüm Amüzahnung

¹⁵ “Khode Abüdongba-nü Sinai zong lanü nührü te michang lanü chotacho, nührünü tu müngu.

¹⁶ Khang, nührübürü tsanung nengdang nührünü khingkurünye adhrerünye,

¹⁷ kanglungrünye uzanye,

¹⁸ mahkhang chiitsibanye ngunye, hiri kyonü tu kyothri tükülüp.

¹⁹ Nührünü ningchah nguba nyü, chonu ko chenghi hiri ngu arüh mübünung mahkhang dikehnung tüthsadsüsoh. Abüdongba nührü Tsingrang-nü hiri apüm aparü nyitsarü khyang mübüsohnung jüko.

²⁰ Ta nührülü Abinü trüp yaba michang Ijip lanü nüchehchoba lile. Nührü chünye hita Abi müyurü kang linung Abinü nührü nüchehcho.

²¹ Nührü thsacholanü Abüdongba-nü Ite zichüro nührü khyang jüba asu lih la tsü Jordan yongkhi keh müzüdunung yuchüm yoko.

²² Ih yongkhi tsü mükehpü hiba lih la sünung, ta nührülü yongkhi tsü keh wüpü asu lih tsü khyünung thsako.

²³ Ta Abüdongba nührü Tsingrang-nü nührü te azengtacho külüpba tsü khodesü tünbüchü. Abi yuzeng nyi nührübürü nengdang nührünü tu kyothri tükülüp,

²⁴ tunüo Abüdongba nührü Tsingrang tsü achangjüba michang; nahmoh Tsingrang lile.

²⁵ “Hütsüla tsuzarü thsa ko shümtsurü ro anyahli linye, kyothri külüpnü amünyi tüshitbah. Hütsü Abüdongba jingte amünyi lile ko hütsünü Abi rihlong chürosohnung.

²⁶ Nührünü I yocho münyikhang, hiba lih lanü tunyah mülipü changpehnungepü nührü nyüm chünye Ihnü ning ko alih nengla yuchümre. Jordan keh wüpü liba limih la tsü nührü anyahli mülinung. Nührü riri changnung.

²⁷ Abüdongba-nü aparü yuchotila nührü tsishosohnung ko aikyah du nyingnung.

²⁸ Hütsüla nührünü khehnü külüpcho ngunung, yuchinung, tsunung mahkhang xümnung mükohba sing ko lung tsingrang dikehnung.

²⁹ Hütsüla nührünü Abüdongba nührü Tsingrang yangchinung ko nührünü nührü lasih apümnü Abi yangchikhang, Abi ngunung.

³⁰ Nührü chah lüpcho tikeh chongcha mütohde du, nührünü Abi yang ximüla Abi te nyinung.

³¹ Abi yanglilüm Tsingrang. Abinü nüh müpehjünung mahkhang müchangjünung ko apunü nührü jümürü te külüpba azengtaba tsü münbüchünung.

³² “Nührü müsuroede limih la Tsingrangba-nü nyitsarü thriba atsicho shikhe tsü yangching. Limih apüm yangching. Hitoh-i mütikehdhingo? Hi kyo müyuchidhingo?

³³ Nührü roh-i Tsingrangba-nü arüh te michang lanü chotacho yuchipü akang licho khürü mülio?

³⁴ Abüdongba nührü Tsingrang-nü nührü nengdang Ijip la nguchicho kyo, wü bürü yucho lanü noro apu müyurü kangsohba tsingrang sü mülio? Nührünü ngu Abinü Abi tase ko zii bichiko; Abinü arüm ko khata hirojüko, anyemüyangnung ko thsayahiya nguchiko ko Abinü adrünung tikehsohko.

³⁵ Apa tsingrang mühle ko Tsingrangba tsü Abi duepü nührü te ngusohnung nengdang Abüdongba-nü hi nguchicho.

³⁶ Abinü nührü khyang athülaba jünung nengdang ninglangnü nührü khyang yuva yuchisohcho; ko limih hila Abinü Abi Amüsa michang ngusohcho ko hütsülanü Abinü nührü te chotacho.

³⁷ Abinü nührü jümürü müichonü, nührü throchehcho ko apu zii amülah khu Abinü Ijip lanü nührü nüchehcho.

³⁸ Nührü wüde, ade nührünü biyaba arüh lih hi nührü khyang jünung nengdangnü nührü tenü adiu ko re azeh-u yuchoti Abinü iipehjücho.

³⁹ Hütsüeko chünye hi lümchehng ko khodesü tünbüchü: Abüdongba tsü ninglih Tsingrang. Apa Tsingrang mühle.

⁴⁰ Chünye Ihnü jüba Abi yuzeng apüm bichieng, khang nührü ko nührü shümtsurü tsa linung. Lede shulüm Abüdongba nührü Tsingrang-nü nührü khyang jüba lih la tsü nührü lidu linung.”

Nyüchüro Jordan la Tsikeh Yangditi

⁴¹ Hütsüpü Mosa-nü nyüh khüdunü dhsata mülipü thsameh nyüh khüdu kyüsehde tsiwü tsiyohnung shulüm

⁴² yangdi asang pathsa throcheh yohpücho. Abinü hiri yangdi khüdula mükyüsehsohpü tsiyoh khümchonung kohle.

⁴³ Reuben hung nengdang rangmü müjoh ngah la Bezer yangdi licho; Gad hung nengdang Gilead lih la Ramoth licho; ko Manase hung nengdang Bashan lih la Golan licho.

Yuzeng Yupohtpheh

⁴⁴ Mosa-nü Israelrü khyang yuzeng ko adoba jücho.

⁴⁵ Abinü yuzeng hiri arüh Ijip lanü chüropü Bethpeor yangdi dükeh nyüchürolang Jordan Yongkhi ngah la lide jücho.

⁴⁶ Hiba Yangdi tsü Heshbon yangdi Amor-rü yangthsaba Sihon lih la licho. Mosa ko abi nyitsarünü arüh Ijip lih lanü chüropü kohchehcho.

⁴⁷ Arühnü abi lih ko nyüchürolang Jordan la liba aparü Amor-rü Bashan la yangthsaba Og lihsü khyücho.

⁴⁸ Hiba lih tsü Arnon Yongkhi nanglang liba Aroer yangdi lanü wü Hermon zong kihku lahpi Sirion zong chii licho.

⁴⁹ Hütsüla Jordan yongkhi nyüchürolang kihjinglang Asü kihdi chii ko nyüchürolang Pisga zong jingdümpi chii licho.