AZIKA YU 32 - AMÜSA BAIBEL (BSI)

¹ “Ning ko alih, Iyu nyieng, Ihnü yocho longi nyieng.

² I adoba tsingkih kyo longnung ko limih chah yingkih kyo kangnung. Iyu sing anu chah tsing longcho kyo, zanu chah tsing longkehcho kyo.

³ Ihnü Abüdongba senung, abi müyurünü abi dicho chonung.”

⁴ “Abüdongba-nü tsungtirü, apüm la adekheng ko yuje; Nührü Tsingrang yuje ko longlangba; atsa du ko athsalang du Abinü nguchire.

⁵ Ta nührü yuje mücho, Abi müyurü thsanung müdekheng, amünyi ko kihyochüba yucho.

⁶ Abüdongba hiroh-i bichinung do? Nührü amüsithsa ko lümlong müli nyitsarü. Abi nührü au, nührü külüpbong, Abinü nührü yucho khüdu kangsohcho.”

⁷ “Atsicho ko papade lümdhing; tu tikehcho nührü tpurü te tsingdhing. Azirü te atsicho nengdang tsingdhing.

⁸ Amichahbanü apa yuchoti khyang arüh lih jücho; müyurü khüde linung Abinü changjüre. Abinü yucho müipi khyang tsingrang khüdu jüre,

⁹ ta Jakob trah apu nengdang throchehcho.”

¹⁰ “Abinü arüh lipilih la rümchi ngucho, anaying, afükungcho akunglih la. Abinü tsungticho ko arüh xükümcho, apu tsungticho kyo.

¹¹ Müdinü aza te mongnung docho kyo, aqo la arüh bipü. Abüdongba-nü Israelrü mülongsoh yohpüre.

¹² Abüdongba anabinü müyurüti nücho. Shuparü tsingrang atroba müzeh.”

¹³ “Abinü akhang lih arüh khyang jücho. Luh la tu chürocho arühnü tsucho. Lungrah la thsakukih ngucho; lungsüh la olive singdong zicho.

¹⁴ Arüh misü ko mizanü nyikih bholo jücho; arüh san, miza ko misü atsauba licho, atsauba litoh ko amichahba yongkha.”

¹⁵ “Abüdongba müyurü alirü kangcho ta anyümrü; tsuyongnungnü arüh shukeh küwümcho. Arühnü Tsingrangba arüh külüprü pehcho, arüh khümchorü mükhyücho.

¹⁶ Arüh kyothrinü Abüdongba nahmohsohcho: amünyinü Abi wahsohcho.

¹⁷ Arahkheh tsingrang khyang kangmübü jücho, tsingrang asi arüh jümürünü mümüdheba. Israelrünü müdikehdhingcho tsingrang.

¹⁸ Arühnü arüh Tsingrang nbüchücho, akohba arüh khümchorü arüh khyang akang jübong.”

¹⁹ “Abüdongba-nü hi ngude, Abi zii chürocho, ko Abi tsurü ko tsularüti mükhyüchocho.

²⁰ ‘Ihnü adelü arüh mütronung,’ Abinü yocho, hütsüpü arüh chah tu tikehnang Ihnü dhingnung. Ahongzi ko yuje müchorü nyitsarü.

²¹ Arüh kyothrinü I zichürosohcho, arühnü tsingrang dsiba te tsü nahmohsohcho; arahkheh tsingrang. Hütsünü arüh zichürosohnung Ihnü yucho khüdu bichinung; amüsithsa yucho khüdu arüh khyang mükhyahsohnung.

²² I rihlong michang kyo chüronung ko limih chah lüpcho trüp-pehnung. Hütsünü asü yang chihnung ko azongti müdongkehsing müyahpehjünung.”

²³ “Arüh chah müchangkaba achangba jünung ko I tbüdeng apüm arüh nyüm bichinung.

²⁴ Arüh adrünung dhsaranü sünung. Arüh benung rangmü kanglungrü müthehnung ko müyüh mürü müthehnung.

²⁵ Khatanü yanglongla asüba hironung; adrübanü kukhi la chihsohnung. Dhreza lazarü sünung; akhungarü mahkhang ashirü mii müpehjünung.

²⁶ Ihnü arüh riri changsohba thsako, Hütsünü du sünüsü arüh mülümkehnung.

²⁷ Ta Ihnü arüh rorüh tüzümükhüm müthsasohnyücho, I müyurü arühnü kohchoepü, achangsohba tsülü Ipu licho.”

²⁸ “Israel tsü thohmüzeh yucho khüdu; arüh lümlong seh mühle.

²⁹ Amükoh ngucho arühnü münyicheh; tu tikehro hütsü mümüdhe.

³⁰ Tuepü hajar khüdu nyüh khüdunü ko nyüh anyünü hajar dhüre kohchehro? Abüdongba arüh Tsingrang-nü arüh pehjüko; arüh akohba Tsingrang-nü arüh pehko.

³¹ Arüh rorünü arühbürü tsingrang re müzeh müdhele, Israel Tsingrang kyo tase müzeh pü.

³² Arüh rorüti tsü Sodom ko Gomora kyo athsangnyang, akha ko müyüh kehba shükusih kyo,

³³ mürü müyühnü külüpcho yongkha kyole.”

³⁴ “Abüdongba-nü arüh rorünü nguchicho lümkehre; Abinü akyang arüh khingchinung yingre.

³⁵ Abüdongba-nü arüh rühyang khingchinung; arüh khülunung akyang ronung; arüh achangba nyümong amünyeh lile.

³⁶ Abüdongba-nü Abi müyurü khümchonung arüh re müzeh kangre. Abinü Abi dikehrü chomangnung arüh atrorü mülide.

³⁷ Hütsüde Abüdongba-nü müyurü te tsingdhingnung, ‘Nührünü longlangba tsingrang tsü khülo?

³⁸ Nührü kangmübü asunü arüh kangcho, ko ayongnung yongkha jücho. Ade arüh ro nührü trosohng; arüh ro nührü khümchosohng.’”

³⁹ “Ih, ko Ih du Tsingrangba; apa yuje tsingrang mühle. Ihnü kyüsehre ko Ihnü akang jüre, Ihnü dhsakehjüre ko Ihnü kyangjüre. Ko I nguchi sünüsü münyümcheh.

⁴⁰ Yuje Ih akang liba Tsingrang, Ihnü I kheh dhimüsu yuchümre,

⁴¹ Ihnü I ariri nohsheng zanung ko yuje tsü tikehsohnung. Ihnü I rorüh chah rühyangnung ko I thrünyirü khingchinung.

⁴² I tbüdeng arüh shüh la thsangnung, ko I nohshengnü I nyümrü atümung kyüsehnung. Ite khatarü süsü münyingjünung; lerohpehrü ko arangyohrüsü süsohnung.”

⁴³ “Yuchoti, nührünü Abüdongba müyurü seing, arüh kyüsehrü atümung Abinü khingchire. Abinü Abi rorüh rühyangre ko Abi müyurü mülang pehjüre.”

⁴⁴ Mosa ko Nun tsurü Joshua nyühnü khi hi thsacho ko Israelrünü hütsü nyicho.

Mosa Achangka Yu

⁴⁵ Mosa-nü yu hiri müyurü te chokade,

⁴⁶ abinü yocho, “Ihnü chünye jüba yuzeng hiri apüm bichinung tünbüchü. Nührü tsuzarü te loli young ko arühnü yochonyi bichinung.

⁴⁷ Hiri adoba hi adeng mah; arüh tsü nührü akang lile. Hütsüri bichieng, khang nührünü khyünung liba Jordan khüulang alih la tsü nührü kutsüp linung.”

⁴⁸ Hütsü nyümong tsü Abüdongba-nü Mosa te yocho,

⁴⁹ “Jeriko dükeh Moab lih la Abarim Zonglang küdung; ko Nebo khang chah küdupü Ihnü Israelrü khyang jünungba Kanan lih tsü dhingdhing.

⁵⁰ Hor Zong la nü mung Aron sücho kyo nühsü azongchah tsü sünung,

⁵¹ tunüo Israelrü bete nühjüdingnü Ite yocho münyicho. Nührü Zin akungaselih, Kadesh yangdi shündhün Meriba kih la lide, müyurü bete nührünü Ih mükhimüngucho.

⁵² Hütsünü nühnü ashulanü alih tsü ngunung, ta Ihnü Israelrü khyang jüba lih la tsü nüh müzüdunung.”