AZIKA YU 3 - AMÜSA BAIBEL (BSI)

Israelrünü Yangthsaba Og Kohcho

¹ “Hütsüpü, Ihsanü Bashan lih kihku lang lahpi ximülacho, ko yangthsaba Og-nü anyitsarü atümung nüpü Ihsa te khatanung Edrei yangdi shündhün rocho.

² Ta Abüdongba-nü Ite yocho, ‘Abi tüdrü. Ihnü nü khyang apu, anyitsarü ko abi lih apüm jünung. Heshbon la yangthsarü Amor-rü yangthsaba Sihon te nguchicho akyokyo tsü nguching.’

³ “Hütsüta Abüdongba-nü yangthsaba Og ko abi nyitsarüti Ihsa kheh la jücho ko Ihsanü arüh rümsohcho.

⁴ Hütsüte müjang Ihsanü arüh yangditi mahchehcho Ihsanü tusü münyingjücho. Bashan-rü yangthsaba Og-nü yangthsathsaba Argob lih apüm la apüm yohrüta Ihsanü yangdi rohre mahchehcho.

⁵ Yangdi hiri apüm tsü tbü athsengnü tbütipü ko tbükhüm ko hütsü khangtinung azihji licho ko mütbütiba yangdongtisü licho.

⁶ Ihsanü yangditi apüm thsangnyangjücho ko khingkurü adhrerü ko azarü apüm Heshbon-rü yangthsaba Sihon yo yangditi chah nguchicho kyo nguchi süsohcho.

⁷ Ihsanü kanglungrü apüm khyücho ko yangditi changsohcho.

⁸ “Hütsütade Ihsanü hütsüri Amor-rü yangthsarüti anyüh chahnü arüh lih nyüchürolang Jordan yongkhi Arnon yongkhi lanü Hermon zong chii khyücho.

⁹ (Hermon zong te Sidon-rünü Sirion ko Amor-rünü Senir dsicho.)

¹⁰ Ihsanü Bashan-rü yangthsaba Og lih apüm khyücho: angah la liba yangditi, Gilead ko Bashan-rü lih Saleka ko Edrei yangditi chii khyücho.”

¹¹ (Yangthsaba Og tsü Refaim-rü achangkaba yangthsarü thsacho. Abi kong tsü lungnü külüpcho, ashenglang khehap düku ko akihchocho adilang khehap müyü licho. Hütsü ade mii Amon-rü yangdi Raba la ngunung.)

Nyüchürolang Jordan la Liba Yuchoti

¹² “Khode Ihsanü alih tsü khyücho, Reuben ko Gad hung khyang Arnon Yongkhi shündhün Aroer yangdi kihku lahpi ko Gilead azonglih changsho zeh Ihnü jücho.

¹³ Manase hung changsho khyang Gilead achangsho ko Argob lih apüm Og-nü yangthsathsaba Bashan tsü jücho.” (Bashan tsü Refaim-rü lih-epü müdhe licho.

¹⁴ Manase hung lanü Jair-nü Argob-rü lih, hütsü Bashan, wünü Geshur ko Maka chiinü khyücho. Abinü yangdongti tsü apu nengla dsicho ko arüh ade yingcheh Jair yangdongti pü dsire.)

¹⁵ Ihnü Manase hung la Makhir tsutpu khyang Gilead jücho.

¹⁶ Ko Reuben ko Gad hung khyang Gilead lih lanü Arnon Yongkhi chii jücho. Kihjinglang lahpi arüh lurü tsü yongkhi alongtüshung tsü thsacho ko kihku lang lahpi lurü tsü Amon-rü lurü azikyah zehba Jabbok Yongkhi tsü licho.

¹⁷ Nyüzüdulang Jordan yongkhi chii, Galil kihdi lanü kihku lahpi Asü Kihdi ko nyüchürolang Pisga zong jingdümpi chii licho.

¹⁸ “Hütsüte müjang Ihnü arüh khyang athülaba hiri jücho: ‘Abüdongba Ihsa Tsingrang-nü Jordan nyüchürolang hi nührü lisohnung jüko. Ade Jordan khüulang tsü aparü Israel münguh alih tsü khyünungla tronung, nührü nyitsarü thsunohrü bipü wüsohng.

¹⁹ Ihnü nührü khyang jüba lih la tsülü, nührü nitpürü ko tsuzarüti ko nührü kanglungrüti lisohng. (Nührü kanglungrü khütang lilepü Ihnü müdhele.)

²⁰ Nührü jünirü Israelrünü Abüdongba-nü arüh khyang jüba lih Jordan nyüzüdulang tsü mümükuh-ede, ko Abinü hila nührü nengdang nguchicho kyo hütsüla Abinü arüh tbachinü mülide, nührünü arüh troung. Hütsüpü du Ihnü nührü khyang jüba lih lang tsü nührü thali rung.’

²¹ “Hütsüpü Ihnü Joshua te thülacho: ‘Abüdongba nührü Tsingrang-nü yangthsarü anyüh, Sihon ko Og nyüh chah tu nguchicho apüm nührünü nguko; ko nührünü sürü lih mahro arüh atümung chah Abinü hütsü akyokyo nguchinung.

²² Arüh tüdrü tunüo Abüdongba nührü Tsingrang-nü nührü nengdang khatajünung.’”

Mosa Kanan Lih la züdunung Mümülacho.

²³ “Hütsüde Ihnü dee khükhah dangkhidangnangcho.

²⁴ ‘Amichahba Abüdongba, Nühnü arangcheh ko anyemüyangnung nguchinung liba tsü adikeh du I khyang ngusohkopü Ihnü müdhele. Nühnü nguchicho kyo nguchinungthsa ninglang ko alih la tu tsingrang mühle.

²⁵ Abüdongba, I khyang Jordan Yongkhi tsü kehsohng ko kihkeh khüulang alih asu, atsah atsa azonglih ko Lebanon zong I khyang ngusohng.’”

²⁶ “Ta nührü thsacholanü Abüdongba-nü Ite zichürocho ko Ite mühnyicho. Hütsü mahpü Abinü yocho, ‘Kükyüko! Thali tüdangchi.

²⁷ Pisga khang chah küdung ko kihku lahpi ko kihjing lahpi, nyüchüro ko nyüzüdulang dhing. Nühnü tu ngunang hütsü dsatsa dhing, tunüo nühnü khodesü Jordan keh müwüchehnung.

²⁸ Joshua khyang abi athülaba jüng. Abi rezehsohng, tunüo nühnü nguba lih tsü abinü nowünung ko khyünung.’

²⁹ “Achotsü Ihsanü Bethpeor yangdi khüulang angah la tsü licho.”